الماتى وبلىسىنىڭ ەسىك قالاسىندا ەكى وقۋشى 20 كۇننەن استام ۋاقىتتان بەرى ۇشتى-كۇيلى جوق. اقپاننىڭ 28-ىندە ۇيلەرىنەن شىعىپ كەتكەن ولار سول بويى قايتىپ ورالماعان.
مىنە, سودان بەرى اتالمىش قالانىڭ تۇرعىندارى ايگۇل جاحاتايقىزى مەن پەردەگۇل قۋناقوۆا 15 جاسار داۋلەت داۋكەن جانە تىنىشبەك اباتوۆتى ىزدەستىرۋدە. بالالاردىڭ ءبىرىنشىسى مادەنيەت ۇيىندە اۋدانداعى مەكتەپتەر اراسىندا وتەتىن «كوڭىلدى تاپقىرلار كلۋبى» ويىنىنا كەتكەننەن ءىز-ءتۇزسىز جوعالعان. ال ەكىنشىسى مەكتەپكە 200 تەڭگەمەن كەتكەننەن كەرى قايتپاعان.
ەكى شاكىرت وقيتىن مەكتەپتەن دە قازىر بەرەكە كەتكەن. ۇستازدار 9-سىنىپ وقۋشىلارىن كۇندىز-ءتۇنى ىزدەپ, اۋرە-سارساڭعا ءتۇسىپ ءجۇر. داۋلەت داۋكەن مەن تىنىشبەك اباتوۆپەن سول كۇنى الماتىعا بىرگە بارعان ءۇش وقۋشىدان اقپارات الۋ ءۇشىن پسيحولوگتار دا جۇمىس ىستەگەن. ازىرگە ولار ماردىمدى ەشتەڭە ايتپاپتى. سوندىقتان جاسوسپىرىمدەردىڭ ۇيدەن نەلىكتەن قاشقانى مۇعالىمدەرگە دە جۇمباق. مەكتەپ باسشىسىنىڭ ايتۋىنشا, اتا-انانىڭ ەكى كۇن جاسىرعانىنا وراي ءبىر جاعداي بولدى دەگەن بولجام بار.
اۋداندىق ىشكى ىستەر باسقارماسى قىزمەتكەرلەرى دە جاسوسپىرىمدەردى ىزدەۋدى توقتاتقان جوق. ءتارتىپ ساقشىلارى ەسىك, تالعار جانە الماتى قالالارىن تۇگەل شارلاعان. ازىرگە بەلگىلىسى, ەكى جەتكىنشەك مەكەن-جايى مەن تەلەفون نومىرلەرىن ءجيى اۋىستىرىپ, ءتارتىپ ساقشىلارىنان ءىزىن جاسىرىپ جۇرگەن كورىنەدى.
قۇرىش نۇرىمبەت.