جاقىندا جەدەل ىزدەستىرۋ شاراسىن وتكىزۋ بارىسىندا اقتوبە قالالىق ءىىب قىزمەتكەرلەرى ەسىرتكى ساتۋشىلاردىڭ قىلمىستىق ارەكەتىنىڭ جولىن كەستى. ەسىرتكى بيزنەسىنىڭ جولىن كەسۋشى پوليتسەيلەر ەكى كۇندە ەسىرتكى ساتۋمەن اينالىسىپ جۇرگەن ەكى قالا تۇرعىنىن قولعا ءتۇسىردى. ۇستىمىزدەگى جىلدىڭ 13 ناۋرىزىندا ەسىرتكى بيزنەسىنە قارسى كۇرەس ءبولىمىنىڭ قىزمەتكەرلەرى 43 جاستاعى قالا تۇرعىنىن ۇستاپ, ونىڭ قولىنداعى پوليەتيلەندى پاكەتتەن ىشىندە جاسىل ءتۇستى, وزىندىك ءيىسى بار وسىمدىك زات سالىنعان, سكوتچپەن ورالعان ەكى تۇيىنشەكتى تاركىلەدى. وتكىزىلگەن ساراپتاما قورىتىندىسىنا سايكەس, الىنعان زات جالپى سالماعى 2 كەلى قۇرايتىن كەپتىرىلگەن ماريحۋانا ەكەندىگى انىقتالدى. وسىدان ءبىر كۇن بۇرىن ەسىرتكى زاتىن ساتۋدىڭ تاعى ءبىر دەرەگىن ءدال وسى ءتارتىپ ساقشىلارى جەدەل-ىزدەستىرۋ شاراسى كەزىندە انىقتاعان بولاتىن. سونىمەن, ەسىرتكى ساۋداسىنا قارسى ارەكەت ەتۋشى پوليتسەيلەر 38 جاستاعى تاعى ءبىر قالا تۇرعىنىن ۇستادى. ونىڭ جالپى سالماعى 20,66 گرامم ماريحۋانانى 18 000 تەڭگەگە وتكىزگەنى انىقتالدى.
اتالعان ەكى دەرەك بويىنشا دا قىلمىستىق ءىس قوزعالدى. كۇدىكتىلەر ۋاقىتشا ۇستاۋ وقشاۋلاعىشىنا وتىرعىزىلدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.