قازاقستاننىڭ جۇپتىق سىنداعى ءبىرىنشى راكەتكاسى اننا دانيلينا اۋستراليا اشىق چەمپيوناتىنىڭ فينالىنا شىقتى, دەپ حابارلايدى Egemen.kz.
ا.دانيلينا برازيليالىق بەاتريس حادداد مايامەن بىرگە جارتىلاي فينالدا جارىستىڭ 2-راكەتكالارى, جاپونيالىقتار سيۋكو اوياما – ەنا شيباحارامەن شەبەرلىك بايقاستى.
جۋىردا سيدنەي WTA تۋرنيرىندە اننا مەن بەاتريس قارسىلاستارىن تىزە بۇكتىرگەن بولاتىن. بۇل جولى ءبىرىنشى پارتيادا قازاقستاندىق-برازيليالىق جۇپ باسىم ءتۇستى – 6:4. ەكىنشىسىندە جاپونيالىقتار ەسە قايىردى – 7:5. ءۇشىنشى, شەشۋشى سەتتە اننا مەن بەاتريس قايتادان تارازى باسىن وزدەرىنە اۋداردى – 6:4.
قازاقستاندىق-برازيليالىق جۇپ 2 ساعات 20 مينۋتقا سوزىلعان تارتىستى باسەكەدە 2 ەيس جاساپ, 9 برەيك-پوينتتىڭ تورتەۋىن پايدالاندى. قارسىلاستارى 1 ەيس, 3 برەيكپەن (11 برەيك-پوينت) شەكتەلدى.
وسىلايشا اننا دانيلينا ءوز سپورتتىق جولىندا العاش رەت «ۇلكەن دۋلىعا» ءتۋرنيرىنىڭ فينالىنا شىقتى. اننا مەن بەاتريس فينالدا دودانىڭ 1-راكەتكالارى, چەحيالىقتار باربورا كرەيچيكوۆا – كاتەرينا سينياكوۆا نەمەسە رەسەيلىك ۆەرونيكا كۋدەرمەتوۆا – بەلگيالىق ەليزا مەرتەنس جۇپتارىنىڭ قاي جەڭگەنىمەن باس جۇلدەنى ساراپقا سالادى.