الماتىداعى جاعداي تۇراقتالدى. قالا اۋماعىندا قابىلدانعان قاۋلىعا سايكەس, 2022 جىلعى 26 قاڭتاردا ساعات 00:00-دەن باستاپ لاڭكەستىككە قارسى وپەراتسيا رەجيمى توقتاتىلىپ, تەرروريستىك قاۋىپتىڭ «قىزىل» دەڭگەيى جويىلدى. بۇل تۋرالى قالالىق جەدەل شتاب قىزمەتى ءمالىم ەتتى, دەپ حابارلايدى Egemen.kz.
اتالعان ۋاقىتتان باستاپ لاڭكەستىك قاۋىپتىلىكتىڭ جوعارى «قىزعىلت سارى» دەڭگەيى بەلگىلەندى.
«ارناۋلى جانە قۇقىق قورعاۋ ورگاندارى تارتىپسىزدىكتەرگە قاتىسۋشىلار مەن ۇيىمداستىرۋشىلاردى انىقتاۋ بويىنشا جەدەل ىزدەستىرۋ شارالارىن جالعاستىرادى», دەپ جازىلعان حابارلامادا.
تەررورلىق قاۋىپتىڭ قازىرگى دەڭگەيىندە قۇقىق قورعاۋ ورگاندارىنا قارۋ-جاراق پەن جارىلعىش زاتتاردى تابۋ ماقساتىندا كولىك قۇرالدارىن تىنتۋگە رۇقسات ەتىلگەن.
«قۇقىق قورعاۋ ورگاندارىنىڭ جۇمىسىنا تۇسىنىستىكپەن قاراپ, شىدامدىلىق تانىتىپ, ولاردىڭ زاڭدى تالاپتارىن بۇلجىتپاي ورىنداۋلارىڭىزدى سۇرايمىز», دەلىنگەن قالالىق شتاب تاراتقان حابارلامادا.