قاھارمان رۋحى قاناتتاندىرادى

اتىراۋدا قازاقتىڭ قايسار قىزى حيۋاز دوسپانوۆاعا ەسكەرتكىش اشىلدى ەكىنشى دۇنيەجۇزىلىك سوعىستا اۋەگە جاۋىنگەرلىك تاپسىرمامەن 300 رەت كوتەرىلىپ, فاشيستىك باسقىنشىلاردىڭ توبەسىنەن قىرانداي شۇيىلگەن قازاق قىزى حيۋاز دوسپانوۆانىڭ ەرەن ەرلىگى قاي كەزدە دە ۇلىقتاۋعا لايىق. ەلىمىز تاۋەلسىزدىك العاننان كەيىن اپامىز جايلى باسپاسوزدە تۇراقتى جازىلدى. ونىڭ ەلىمىزدىڭ ەڭ جوعارى ماراپاتى – حالىق قاھارمانى اتاعىنا لايىقتى ەكەندىگى “ەگەمەن قازاقستان” گازەتىندە ۇدايى كوتەرىلدى. بۇل ورىندى ۇسىنىس اياقسىز قالمادى. ەلباسى نۇرسۇلتان نازارباەۆتىڭ جارلىعىمەن ەرلىك پەن ورلىكتىڭ, باتىرلىق پەن قايسارلىقتىڭ ۇلگىسىن كورسەتكەن حيۋاز دوسپانوۆاعا حالىق قاھارمانى اتاعى بەرىلدى. وسىلايشا, ەلىنىڭ اتىن شىعارار ەرگە ءتان ەرلىگىمەن تانىلعان قايسار رۋحتى قازاق قىزىنىڭ مارتەبەسىن تۋعان ەلى كوتەرىپ, مەرەيىن تاسىتتى. قايتالانباس ەرلىك پەن شەجىرەلى ەڭبەككە تولى ءومىر جولىن جاس ۇرپاققا ۇلگى-ونەگە ەتتى. حيۋاز دوسپانوۆانىڭ كىندىك قانى تامعان اتىراۋدا دا ونىڭ ەسىمىن ماڭگى ەستە قالدىرۋ شارالارى قولعا الىنۋدا. ماسەلەن, بىلتىرعى شىلدەدە ءوڭىر ورتا­لى­عىندا جاڭادان بوي كوتەرگەن مۇز ايدىنى سارايىنا ۇشقىش اپامىزدىڭ اتى بەرىلدى. سول كەزدە وبلىس اكىمى بەر­گەي رىسقاليەۆ: “قازاقتىڭ قاھارمان قىزى حيۋاز دوسپانوۆانىڭ ەسىمىن ماڭگى ەستە قالدىرۋ شارالارى كىندىك قانى تام­عان جەردە جالعاسا بەرەدى. الداعى ۋاقىتتا ونىڭ ەسكەرتكىشىن اشۋ ويدا بار”, دەگەن ەدى. سودان بەرى بۇل ماسەلە ءالسىن-ءالسىن قوزعا­لىپ, جەڭىس مەرەكەسى قارساڭىندا تۇپكى­لىكتى تياناقتالدى. تاياۋدا اتىراۋ قالاسىندا قازاقستان­نىڭ حالىق قاھارمانى حيۋاز دوسپانوۆا­نىڭ مىستان قۇيىلعان ەسكەرتكىشىنىڭ اشىلۋ ءراسىمى ءوتتى. وعان وبلىس اكىمى بەرگەي رىسقاليەۆ, قاھارمان ۇشقىشتىڭ ۇلى ەربولات ءامىروۆ, سوعىس ارداگەرلەرى مەن قالا جۇرتشىلىعى كوپتەپ قاتىستى. ەسكەرتكىشتىڭ اق جامىلعىسىن وبلىس اكىمى بەرگەي رىسقاليەۆ پەن سوعىس ارداگەرى ايدىن ايباروۆ بىرلەسە سىپىرعاندا, اۋەدە قىرانداي سامعاعان اسكەري ۇشاقتىڭ شتۋرمانى حيۋاز اپانىڭ اسىل بەينەسى جارق ەتە قالدى. ءوزى دە مايداندا ۇشقىش بولىپ, تالاي رەت جاۋىنگەرلىك تاپسىرمالار ورىنداعان مايدانگەر ايدىن ايباروۆ اقساقال وتان­نىڭ تىنىشتىعى مەن بەيبىت ءومىر ءۇشىن وت پەن وقتىڭ ورتاسىنان ورالماعان بوزداق­تار­ مەن كوزى ءتىرى مايدانگەرلەردىڭ ەرلىگى ەشقاشان وشپەيتىندىگىن تىلگە تيەك ەتتى. “مىنە, بۇگىن سونىڭ ءبىر كورىنىسىنە, قازاقتىڭ قايسار قىزى, حالىق قاھارمانى حيۋاز دوسپانوۆانىڭ ەسكەرتكىشىنىڭ اشىلۋىنا كۋا بولدىق. بۇل – ەرلىككە تاعزىم!”, دەدى مايدانگەر. جولداسبەك شوپەعۇل. اتىراۋ وبلىسى.