قازاقستان رەسپۋبليكاسى سىرتقى ىستەر مينيسترلىگى ەلدە قالىپتاسقان جاعدايعا بايلانىستى مالىمدەمە جاسادى, دەپ حابارلايدى Egemen.kz ءسىم ءباسپاسوز قىزمەتىنە سىلتەمە جاساپ.
2022 جىلعى 5 قاڭتاردا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىقتارىمەن ەلدىڭ بۇكىل اۋماعىندا توتەنشە جاعداي رەجيمى ەنگىزىلدى.
ماڭعىستاۋ وبلىسىندا باستالعان ميتينگتەردە تۇرعىندار سۇيىتىلعان گاز باعاسىن تومەندەتۋ تالابىمەن شىقتى. وسىعان جاۋاپ رەتىندە مەملەكەت باسشىسىنىڭ تاپسىرماسىمەن ۇكىمەت ولاردى تومەندەتۋ بويىنشا شۇعىل شارالار قولدانىپ, الەۋمەتتىك ماڭىزى جوعارى ازىق-ت ۇلىك تاۋارلارى, جانارمايدىڭ جانە كوممۋنالدى قىزمەتتەردىڭ باعالارىنىڭ وسۋىنە موراتوري جاريالادى.
نارازىلىق شارالارىنىڭ ءبىرىنشى كۇندەرىندە قامالعانداردىڭ ءبارى بوساتىلدى. دەگەنىمەن, باسقا ءىرى قالالارداعى شەرۋلەر جاپپاي تارتىپسىزدىكتەر مەن بيلىك ورگاندارىنا شابۋىلعا اكەلىپ سوقتى.
ونىڭ ۇستىنە الماتىداعى وقيعالار – اكىمشىلىك جانە اسكەري نىساندارعا شابۋىلدار, اۋەجايدى باسىپ الۋ جانە شەتەلدىك جولاۋشى جانە جۇك ۇشاقتارىنىڭ ۇستالۋى شابۋىل جاساۋشىلاردىڭ ءىس-ارەكەتتەرىنىڭ جوعارى دەڭگەيدە دايىندالعانىن جانە ۇيلەستىرگەنىن ايعاقتايدى. تالداۋ كورسەتكەندەي, قازاقستان شەتەلدە دايىندىقتان وتكەن تەرروريستىك توپتاردىڭ قارۋلى باسىپ كىرۋىنە تاپ بولدى.
جاعدايدىڭ كۇرت شيەلەنىسۋىنە بايلانىستى پرەزيدەنت قاسىم-جومارت توقاەۆ قازاقستان رەسپۋبليكاسى قاۋىپسىزدىك كەڭەسىنىڭ توراعاسى قىزمەتىنە كىرىسىپ, ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەرگە تەرروريزمگە قارسى وپەراتسيا جۇرگىزۋگە اسكەري كومەك كورسەتۋ تۋرالى ءوتىنىش ءبىلدىردى.
جاريالانعان توتەنشە جاعداي قوعامدىق قاۋىپسىزدىكتى جانە زاڭدىلىقتى ساقتاۋعا باعىتتالعان شارالار كەشەنىن قامتيدى. قۇقىق قورعاۋ ورگاندارى مەن قازاقستان رەسپۋبليكاسىنىڭ قارۋلى كۇشتەرى كەز كەلگەن زاڭسىز ارەكەتتەردىڭ جولىن كەسۋگە ۋاكىلەتتى.
سونىمەن قاتار مەملەكەت كوپۇلتتى جانە كوپكونفەسسيالى حالقىمىزدىڭ بارلىق وكىلدەرىنىڭ قۇقىقتارى مەن مۇددەلەرىن جانە ديپلوماتيالىق كورپۋس پەن جۋرناليستەردى قوسا العاندا ەلىمىزدەگى شەتەل ازاماتتارىنىڭ قاۋىپسىزدىگىن قامتاماسىز ەتۋدى جالعاستىرادى.
شەتەلدىك ينۆەستيتسيالار مەن شەتەلدىك كومپانيالاردىڭ بيزنەسىنە قورعاۋ بەرىلەدى. قازاقستان رەسپۋبليكاسى ادام قۇقىقتارى سالاسىنداعى حالىقارالىق مىندەتتەمەلەرىن ورىنداۋعا جانە قر پرەزيدەنتى ق. توكاەۆ جۇزەگە اسىرىپ كەلە جاتقان «حالىق ۇنىنە قۇلاق اساتىن مەملەكەت» تۇجىرىمداماسى اياسىنداعى رەفورمالار كۋرسىنىڭ جالعاسۋىنا مۇددەلى.
«قازاقستان رەسپۋبليكاسى سىرتقى ىستەر مينيسترلىگى ەكىجاقتى جانە كوپجاقتى ىنتىماقتاستىقتىڭ اعىمداعى ماسەلەلەرى بويىنشا حالىقارالىق سەرىكتەستەرىمەن ۇدايى بايلانىستا», دەلىنگەن حابارلامادا.