قازاقستاننىڭ ءبىرىنشى, الەمنىڭ 14-راكەتكاسى ەلەنا رىباكينا اۋستراليانىڭ ادەلايدا قالاسىندا ءوتىپ جاتقان تەننيستەن 500 WTA ءتۋرنيرىن جەڭىسپەن باستادى.
وسى دودانىڭ 7-راكەتكاسى بولىپ تىركەلگەن ە.رىباكينا جاڭا جىلداعى العاشقى كەزدەسۋىن دۇنيەجۇزىلىك رەيتينگتە 132-ورىندا تۇرعان اۋستراليالىق ستورم ساندەرسپەن وتكىزدى. ءبىرىنشى پارتيادا قازاقستاندىق تەننيسشى باسىمدىق تانىتتى – 6:4. ەكىنشىسىندە اۋستراليالىق سپورتشى 6:1 ەسەبىمەن ەسە قايتارعانىمەن, ءۇشىنشى, شەشۋشى سەتتە ە.رىباكينا مىقتىلىق تانىتىپ, قارسىلاسىنان باسىم ءتۇستى – 6:1. ەكى ساعاتقا سوزىلعان باسەكە بارىسىندا ەلەنا 9 ەيس جاساپ, 14 برەيك-پوينتتىڭ بەسەۋىن پايدالانا الدى. قارسىلاسى 5 ەيس, 4 برەيكپەن (13 برەيك-پوينت) شەكتەلدى. ە.رىباكينانىڭ ەكىنشى اينالىمداعى قارسىلاسى كەيىن انىقتالادى.