سىر بويىندا مەملەكەت-جەكەمەنشىك سەرىكتەستىگى اياسىندا اتقارىلعان باستاما كوپ. بيلىك پەن بيزنەس بايلانىسىنىڭ جاڭا فورماتىنىڭ شاراپاتىن اسىرەسە شالعاي اۋىلداعىلار كورىپ وتىر. ەل تاۋەلسىزدىگىنىڭ 30 جىلدىعى قارساڭىندا وبلىستا اتالعان سەرىكتەستىك اياسىندا بوي كوتەرگەن بىرقاتار الەۋمەتتىك نىساندار اشىلدى.
وسىنداي شارالاردىڭ العاشقىسى وبلىس اكىمى گۇلشارا ابدىقالىقوۆانىڭ قاتىسۋىمەن جاڭاقورعان اۋدانىنداعى تومەنارىق اۋىلدىق وكرۋگىندە ءوتتى. اۋىلداعى سپورت كەشەنىن «ايارۋ» جك سالعان. ون ەكى ادامدى جۇمىسپەن قامتىعان كەشەندە 170-كە جۋىق بالاعا ەركىن كۇرەس, دزيۋدو جانە باسكەتبولمەن اينالىسۋعا مۇمكىندىك تۋىپ وتىر.
تومەنارىق – اۋدانداعى ەڭ ىرگەلى ەلدى مەكەننىڭ ءبىرى. التى مىڭعا جۋىق تۇرعىنى بار اۋىلداعى سپورت مەكتەبى توقسانىنشى جىلدارى جابىلىپ قالعان ەدى. سول كەزەڭدەگى قيىندىقتان بىرلىگىن بۇزباي امان شىققان اۋىلدا شەشىمىن تاپپاعان ماسەلە جوقتىڭ قاسى.
– اۋىلدى قاق جارىپ تەمىر جول جەلىسى ءوتىپ جاتقانىن كوردىڭىزدەر عوي. بيىل سول جولدىڭ ارعى بەتىندە 9 كوشە اسفالتتالدى. كەلەسى جىلى تاعى 11 كوشە جوسپاردا تۇر دەگەندى ەستىپ وتىرمىز. سوڭعى 5-6 جىلدا اۋىل كوشەلەرىنە سپورت الاڭدارى سالىنىپ, دەنەشىنىقتىرۋمەن اينالىساتىن بالالار قاتارى كوبەيگەنىنە قۋانعانبىز. ەندى مىنا جابىق سپورت كەشەنى سول قۋانىشىمىزدى ەسەلەپ وتىر, – دەيدى اۋىلدىق ارداگەرلەر كەڭەسىنىڭ توراعاسى تەمىربەك قۇتجانوۆ.
وبلىس اكىمى اۋىلعا سپورت كەشەنىن سىيلاعان كاسىپكەرمەن پىكىرلەسىپ, جاڭا عيماراتتا جاتتىعىپ جاتقان جاسوسپىرىمدەرمەن سويلەستى. اقساقالداردىڭ اۋىلدى دامىتۋ باعىتىنداعى ۇسىنىس-تىلەكتەرىن تىڭدادى.
اۋدانداعى ەڭ شالعاي اۋىل قاندوزدە دە بيلىك پەن بيزنەس ارىپتەستىگىنىڭ اياسىندا سپورت كەشەنى قولدانىسقا بەرىلىپ وتىر. بۇگىندە مۇندا 126 بالا سپورتتىڭ 3 ءتۇرى بويىنشا جاتتىعادى. وبلىس اكىمى اۋىل تۇرعىندارىمەن كەزدەسۋدە ينفراقۇرىلىم ماسەلەلەرىنە قاتىستى ۇسىنىس-پىكىرلەرىنە قۇلاق ءتۇرىپ, ولاردىڭ كەزەگىنە قاراي شەشىلەتىنىن ايتتى.
گۇلشارا ناۋشاقىزى تۇرعىندارمەن جۇزدەسۋدە وڭىردەگى 2 156 بالانى قامتيتىن مەملەكەتتىك سپورتتىق تاپسىرىستى قارجىلاندىرۋعا بيىل 212 ملن تەڭگە قارالسا, كەلەر جىلى قارجىنى 638 ملن تەڭگەگە ۇلعايتۋ جوسپاردا بار ەكەنىن جانە وسى ارقىلى 4 312 بالانى بۇقارالىق سپورتقا تارتۋ كوزدەلگەنىن ايتىپ ءوتتى. اۋىل سپورتىن كوتەرۋگە اتسالىسىپ, جەكە قاراجاتى ەسەبىنەن نىسان سالىپ مۇددەلەستىك تانىتقان كاسىپكەرلەرگە العىسىن ءبىلدىردى.
اۋدانداعى جاڭارىق ەلدى مەكەنىندە دە اۋىلدىق دارىگەرلىك امبۋلاتوريا اشىلدى. ءوڭىر باسشىسى ۇلت دەنساۋلىعىن نىعايتۋ مەملەكەتتىك ساياساتتىڭ باسىم باعىتتارىنىڭ ءبىرى ەكەنىن, جاڭا دارىگەرلىك امبۋلاتوريا اۋىل تۇرعىندارىنا مەديتسينالىق كومەكتى قولجەتىمدى ەتۋگە مۇمكىندىك بەرەتىنىن اتاپ ءوتتى.
– مەملەكەت باسشىسى وتكەن جىلعى جولداۋىندا دەنساۋلىق ساقتاۋدىڭ ءتيىمدى مودەلىن قۇرۋ ارقىلى 3 جىل ىشىندە بارلىق اۋىلدىق ەلدى مەكەندى فەلدشەرلىك-اكۋشەرلىك پۋنكتتەرمەن جانە دارىگەرلىك امبۋلاتوريالارمەن قامتاماسىز ەتۋ قاجەتتىگىن ايتتى. وسى تاپسىرماعا سايكەس ايماقتىڭ بارلىق اۋداندارىندا مەديتسينالىق نىساندار جاڭادان سالىنۋدا. بىلتىر جالاعاش اۋدانىندا 100 توسەكتىك زاماناۋي ورتالىق اۋرۋحانانى پايدالانۋعا بەرسەك, وسى جىلى تامىز ايىندا وبلىس ورتالىعىنان ءمودۋلدى جۇقپالى اۋرۋلار اۋرۋحاناسى اشىلدى. جىل سوڭىنا دەيىن قازالى اۋدانىنان 250 كەلۋشىگە ارنالعان ەمحانانى ەل يگىلىگىنە تابىستايتىن بولامىز,– دەدى گ.ابدىقالىقوۆا.
وبلىستاعى ىسكەر ازاماتتار اراسىندا ەشكىمنەن ءوتىنىش, تاپسىرما كۇتپەي-اق اۋىلداستارىنا قولدان كەلگەن كومەگىن كورسەتىپ وتىرعاندار از ەمەس. سولاردىڭ ءبىرى – شيەلى اۋدانىنداعى «اقمايا» شارۋا قوجالىعىنىڭ جەتەكشىسى داۋلەت جۇمبەكوۆ. وبلىس باسشىسى اۋدانعا ساپارىندا قوجالىقتا جۇمىس ىستەيتىن كوپبالالى 2 وتباسىعا باسپانا سالىپ بەرگەن كاسىپكەردىڭ جۇمىسىنا ساتتىلىك تىلەدى.
اۋدانداعى كەردەلى اۋىلدىق وكرۋگىندە باعلان اشىربەكوۆ اتتى ىسكەر ازامات مەملەكەت-جەكەمەنشىك ارىپتەستىك اياسىندا سپورتتىق ساۋىقتىرۋ كەشەنىن سالىپ ءبىتىردى. وندا كۇرەس, تاەكۆاندو, باسكەتبول, شاحمات جانە اۋىر اتلەتيكا ۇيىرمەلەرى بار. جاڭا نىساننىڭ 11 تۇراقتى جۇمىسپەن قامتىعانىن جانە قوسىڭىز.
– سوڭعى 5 جىلدا مەملەكەت-جەكەمەنشىك ارىپتەستىك شەڭبەرىندە اقمايا, العاباس, بەستام, تۇران اۋىلدىق وكرۋگتەرىندە سپورت كەشەنى پايدالانۋعا بەرىلىپ, سپورتشىلارىمىزدىڭ جەڭىستەرى ەسەلەنە ءتۇستى, – دەدى وبلىس اكىمى. – بۇگىن تاعى ءبىر كەشەندى قولدانىسقا بەرگەلى تۇرمىز. بۇل اۋىلدى دامىتۋعا ايرىقشا كوڭىل ءبولىنىپ وتىرعاندىعىنىڭ دالەلى. وسى سپورت كەشەنىنەن شىڭدالعان جاستارىمىز ءتۇرلى دودالاردا جەڭىسكە جەتىپ, وليمپيادا شىڭدارىن باعىندىرىپ, كوك تۋىمىزدى جەلبىرەتە بەرسىن.
شيەلىدەگى ەل تاۋەلسىزدىگىنىڭ 30 جىلدىق مەرەيتويى اياسىنداعى شارالاردىڭ بىرىندە تۇران ەلدى مەكەنى «كوگىلدىر وتىنعا» قوسىلدى. وبلىس اكىمى گۇلشارا ابدىقالىقوۆا تۇرعىندار قۋانىشىنا ورتاقتاسىپ, سالتاناتتى شاراعا قاتىستى.
جىل باسىنان بەرى جوسالى, جالاعاش, تەرەڭوزەك كەنتتەرى مەن وسى اۋدانداعى بەكەجانوۆ جانە قودامانوۆ اۋىلدارىنا تابيعي گاز جەتسە, از كۇندە «كوگىلدىر وتىنعا» قازالى قالاسىن قوسۋ جوسپارلانۋدا.
قىزىلوردا وبلىسى