پرەزيدەنتتىك كادرلىق رەزەرۆ كەزەكتى رەت جاساقتالدى

ورتالىق كوممۋنيكاتسيالار قىز­مەتىندە وتكەن بريفينگكە مەم­لەكەتتىك قىزمەت ىستەرى اگەنت­تىگىنىڭ توراعاسى انار جايىل­عانوۆا, پرەزيدەنت جانىن­داعى مەملەكەتتىك باسقارۋ اكادەميا­سىنىڭ رەكتورى ەرلان ءابىل, «مەم­لەكەتتىك قىزمەت پەرسونالىن باسقارۋ ۇلتتىق ورتالىعى» اق باس ديرەكتورى كەنجەبەك ساناباەۆ قاتىستى.

بيىلعى رەزەرۆ مەملەكەتتىك قىزمەتكە ارنالعان 50 ادامنان قۇرالعان. نەگىزگى تالاپتار ازاماتتىعى, جاسى, ءبىلىمى جانە جۇمىس ءوتىلى بولدى. كونكۋرسقا قا­تى­سۋعا 35 جاستان اسپاعان, جو­عا­رى ءبىلىمى جانە كەمىندە بەس جىل ەڭبەك ءوتىلى بار قازاقستان رەس­پۋب­ليكاسىنىڭ ازاماتتارى جىبەرىلدى.

– بولاشاق رەزەرۆيستىڭ پورت­رەتىن جاساۋ كەزىندە ترانس­فور­­ما­تسيا­لىق كوشباسشىعا ءتان قۇزىرەتتەر جاسالدى, ول ءوزىنىڭ جەكە مانساپتىق امبيتسيالارىنا ەمەس, ەڭ الدىمەن, قوعامدىق مۇد­دەلەرگە نەگىزدەلگەن. تاڭداۋ بارى­سى تالاپ ەتىلگەن ءبىلىمى, داع­­دى­لارى مەن قابىلەتتەرىن انىق­تاپ قانا قويماي, سونداي-اق كان­دي­داتتاردىڭ شىنايى نيەتى مەن قۇندىلىقتارىن باعالاۋعا باعىت­تالدى, – دەدى اگەنتتىك باسشىسى.

تاڭداۋدان ءساتتى وتكەن ۇمىت­كەرلەر 3 جىل رەزەرۆتە بولادى. ىرىكتەۋگە قاتىسۋعا نيەت بىلدىرگەن ازاماتتاردان بار­لى­عى 8 638 ءوتىنىم قابىل­دان­عان. ۇلتتىق كوميسسيا وتىرى­سى­نىڭ قورىتىندىسى بويىن­شا پرەزيدەنتتىك رەزەرۆكە 50 كانديداتتى قابىلداۋ تۋرالى شەشىم قابىلداندى. جۇرگىزىلگەن تالداۋعا سايكەس, رەزەرۆشىلەردىڭ 62 پايىزىنىڭ (31 ادام) شەتەلدىك ءبىلىمى بار, 38 پايىزى (19 ادام) قازاقستاندىق جوعارى وقۋ ورىندارىندا ءبىلىم العان. ولاردىڭ 39-نىڭ ماگيستر دارەجەسى بار. وڭىرلىك بويىنشا رەزەرۆشىلەردىڭ ەڭ كوپ سانى نۇر-سۇلتان قالاسىنان (35), الماتى مەن پاۆلودار وبلىستارىنان 3 ۇمىتكەردەن تاڭدالعان. ولاردىڭ ورتاشا جاسى – 30 جاس, ال ەڭ جاس رەزەرۆشى 25-تە. رەزەرۆكە الىنعان ادامدار پرەزيدەنت جانىنداعى ۋاكىلەتتى كوميسسيانىڭ شەشىمى بويىنشا «ا» كورپۋسىنىڭ ساياسي, اكىمشىلىك لاۋازىمدارىنا, «ب» كورپۋسىنىڭ باسشى لاۋازىمدارىنا جانە «ب» كورپۋسىنىڭ ا ساناتى توبىنىڭ لاۋازىمدارىنا تاعايىندالۋى مۇمكىن.

پرەزيدەنت جانىنداعى مەملە­كەتتىك باسقارۋ اكادەميا­سىنىڭ رەكتورى ەرلان ءابىل جوبانى ىسكە اسىرۋداعى ءتورت باعىتتى اتاپ ءوتتى.

– قاتىسۋشىلاردىڭ مەملەكەت­تىك ءتىلدى ءبىلۋ دەڭگەيىن انىقتاۋعا ارنالعان اقىسىز ونلاين تەست ۇيىمداستىردىق. ەكىنشىدەن, 2021 جىلعى 12-17 قازان ارالىعىن­دا اكادەميالىق ورتا وكىل­دەرى, مەم­لەكەتتىك قىزمەتشىلەر مەن بيزنەس قوعامداستىقتار وكىل­دەرى قا­تارىنان 103 ساراپشى­نىڭ كومەگى­مەن «سيتۋاتسيالىق تاپسىر­ما­لار­­دى شەشۋ» كەزەڭىن وتكىز­دىك. باعا­لاۋ­دى ءبىر ۋاقىتتا ءۇش تاۋەلسىز سا­راپ­شى جۇرگىزدى. 514 ۇمىتكەر سي­تۋا­تسيالىق تاپسىرمالاردى شەشۋ­گە تىرىسىپ, ونىڭ ىشىندە ەڭ جو­عارى بالل جيناعان 235 ادام كەلەسى كەزەڭگە ءوتتى, – دەدى ەرلان ءابىل.