«قازاقستان رترك» اق Balapan تەلەارناسى قازاقستان رەسپۋبليكاسى تاۋەلسىزدىگىنىڭ 30 جىلدىعىنا ءتۇرلى جانرداعى 10 جاڭا تۋىندى ازىرلەدى. جوبالار ەگەمەن ەلدىڭ تاريحى مەن مادەنيەتى, عىلىمى مەن ءبىلىمى, بەلەستەرى جانە تابىستارى تۋرالى قىزىقتى دەرەكتەردى قامتىعان ءارى بالا پايىمىنا لايىقتالعان.
ولاردىڭ 8-ءى انيماتسيالىق جوبا بولسا, 2-ءى تانىمدىق باعدارلاما. Balapanنىڭ كورەرمەندەرى «سۇلتان بەيبارىس» (3D) مۋلتحيكاياسىنان ءباھادۇر بەيبارىستىڭ بالالىق شاعىنان مىسىر سۇلتانى بولعانعا دەيىنگى ومىرىمەن تانىسسا, «قاھارماننان» (3D) تۇركىلەر داۋىرىنە ساياحاتتاپ, بابالارىمىزدىڭ جانكەشتى ەرلىگىن كورەدى. باستى قۇندىلىعىمىز –تاۋەلسىزدىگىمىزدى كەلەر ۇرپاققا تابىستاۋدى نەگىزگى وزەك ەتكەن «التىن كىلت» (2D) انيماتسيالىق سەريالى بالدىرعانداردى وتانسۇيگىشتىككە باۋلىسا, «عارىشكەر بالا جىگەر» (2D) ارقىلى جاس جەتكىنشەكتەر قازاقستاننىڭ عارىش سالاسىنداعى جەتىستىكتەرى مەن بايقوڭىر عارىش ايلاعى تۋرالى قىزىق دەرەكتەردى بىلەدى. ال «سەن بىلەسىڭ بە؟» تانىمدىق باعدارلاماسى تاۋەلسىزدىگىمىزدى العاننان كەيىنگى ەلەۋلى وقيعالاردى, تۇعىرلى تۇلعالاردى تاني تۇسۋگە ىقپال ەتەدى.
الداعى مەرەكە كۇندەرى تەلەارنادان ويىن-ساۋىق, وقۋ-تانىمدىق مۋلتحيكايالاردى دا تاماشالاۋعا بولادى. ء«تاپ-ءتاتتى حيكايادا» (3D) كونفي مەن الۋا قورشاعان ورتانى تانىستىرسا, «تومپيدەگى» (2D) ءالي مەن ايشا زاتتاردىڭ ءپىشىنى مەن قاسيەتتەرىن ۇعىندىرىپ, ءمانىن اشىپ بەرەدى. تەلەارنا بيىل الەمدىك ترەندكە اينالعان كوميكس جانرىن دا نازاردان تىس قالدىرماعان. وسىلايشا, تۇڭعىش رەت ۇلتتىق ەرەكشەلىگىمىز ەسكەرىلگەن «ەرجۇرەك ساقشىلار» (2D) اتتى كوميكس ازىرلەنىپ جاتىر. سونىمەن قاتار باتىرلار جىرىن ارقاۋ ەتكەن شىتىرمان وقيعالى «ەر تارعىن» (3D) مۋلتسەريالى كورەرمەنگە ۇسىنىلدى. بۇعان قوسا, كىشكەنتاي كورەرمەندەر تانىمدىق «بىرگە وينايىق!» باعدارلاماسىن تاماشالاي الادى. ايتا كەتەلىك, جىل باسىنان بەرى Balapan تەلەارناسى جالپى 42 جوبانى جۇزەگە اسىردى. تەلەارنا سونىمەن قاتار, «تاۋەلسىزدىكتىڭ 30 جىلدىعىنا – 30 تارتۋ!» شىعارماشىلىق بايقاۋىن ۇيىمداستىردى. جىل بويى وتكەن بۇل بايقاۋدا كىشكەنتاي كورەرمەندەر ازاتتىق تۋرالى پايىم-تۇسىنىگى مەن كەلەشەك ارماندارى جايلى ايتىپ, ءوز ونەرىمەن ءبولىستى.
الماتى