ورتا سالماقتاعى قازاقستاندىق بوكسشى جانىبەك ءالىمحان ۇلى كەلەسى جىلى WBO تۇجىرىمى بويىنشا الەم چەمپيونى اتاعى ءۇشىن جۇدىرىقتاسادى. بۇل تۋرالى وتانداسىمىزدىڭ ءىسىن جۇرگىزەتىن ايگىلى Top Rank پروموۋتەرلىك كومپانياسىنىڭ باسشىسى بوب ارۋم مالىمدەدى.
«مەنىڭ كومپانيامداعى قازاقستاندىق بوكسشى جانىبەك ءالىمحان ۇلى كەلەسى جىلدىڭ باسىندا ورتا سالماقتاعى WBO ۇيىمىنىڭ چەمپيوندىق بەلبەۋىن ساراپقا سالادى. ول – ورتا سالماقتىڭ الەمدەگى ەڭ ۇزدىك بوكسشىسى» دەپ جازدى ارۋم ءوزىنىڭ الەۋمەتتىك جەلىدەگى پاراقشاسىندا.
بۇعان دەيىن بۇكىلالەمدىك بوكس ۇيىمى (WBO) وتانداسىمىزدى وسى سالماقتاعى WBO چەمپيونى امەريكالىق دەمەتريۋس اندرادەگە (31-0, 19 KO) مىندەتتى ۇمىتكەر قارسىلاس ەتكەن بولاتىن. ەكى تاراپ ءبىر مامىلەگە كەلۋ ءۇشىن اتالعان ۇيىم كەلىسسوزدەرگە 20 كۇن بەرگەن ەدى. بىراق ەكى جاق ءبىر شەشىمگە كەلە الماعان سوڭ, جەكپە-جەك ءباس ساۋداعا شىعارىلدى. ول 15 قاڭتاردا وتەدى.