بۇل كۇندەرى الماتىدا كاراتەدەن كەزەكتى ازيا چەمپيوناتى ءوتىپ جاتقانى بەلگىلى. سارى قۇرلىق دوداسىنىڭ كەزەكتى كۇنىندە جەرلەستەرىمىز ءۇش التىن, ءبىر كۇمىس مەدال جەڭىپ الدى.
اتاپ ايتقاندا, ەرلەر اراسىنداعى باسەكەدە اندرەي اقتاۋوۆ (55 كگ), ايەلدەر جارىسىندا ءمولدىر جاڭبىرباي (50 كگ) توپ جاردى. سونىمەن قاتار كوماندالىق سايىستا قازاقستاننىڭ ەرلەر قۇراماسى دا ازيانىڭ ۇزدىگى اتاندى. اندرەي اقتاۋوۆ التىن مەدال ءۇشىن بولعان كەزدەسۋدە ساۋد ارابياسىنىڭ وكىلى بارگي ياسيردان باسىم تۇسسە, ءمولدىر جاڭبىرباي فيليپپيندىك دجۋن تسۋكتى جەڭىپ, التىننان القا تاقتى.
كوماندالىق جارىستىڭ فينالىندا قازاقستان ەرلەر قۇراماسى يران سپورتشىلارىمەن كەزدەستى. دانيار يۋلداشەۆ, نۇرقانات اجىقانوۆ جانە نۇرنياز ەلداشەۆ باستاعان جەرلەستەرىمىز قارسىلاستارىن ايقىن باسىمدىقپەن جەڭىپ, ءانۇرانىمىزدى شىرقاتتى. سونىمەن قاتار توكيو وليمپياداسىنىڭ قولا جۇلدەگەرى سوفيا بەرۋلتسەۆا ەل قورجىنىنا كۇمىس جۇلدە سالدى. 68 كيلو سالماقتا ونەر كورسەتكەن سوفيا فينالدا جاپونيالىق يۋدزۋكي ساۆايگە ەسە جىبەردى.