كەلەسى جىلدان باستاپ Astana Qazaqstan Team اتاۋىمەن حالىقارالىق جارىسقا قاتىساتىن قازاقستاندىق ۆەلوكلۋب جاقىندا كوماندانىڭ رەسمي تۇساۋكەسەرىن جاساپ, باق وكىلدەرىنە جاڭادان جاساقتالعان قۇرامىن تانىستىردى. بىرەر جىل بۇرىن «استانا» ساپىندا جاسىنداي جارقىلداپ, «تۋر دە فرانس», «دجيرو د’يتاليا», «يسپانيا ۆۋەلتا» سەكىلدى الەمدىك ماڭىزدى تۋرلاردا ۇزدىك شىققان ۆەلوشاباندوزدار ۆينچەنتسو نيبالي مەن ميگەل انحەل لوپەس قازاقستاندىق كومانداعا قايتا ورالدى. سونداي-اق تىزىمنەن بىرنەشە قازاقستاندىق جاس سپورتشىلاردى دا بايقاپ قالدىق. سونىڭ ءبىرى – نۇربەرگەن نۇرلىقاسىم.
ۆەلوكلۋبپەن ەكى ماۋسىمعا كەلىسىمشارت جاساعان نۇربەرگەن ۆەلوسپورتتان 23 جاسقا دەيىنگىلەر اراسىنداعى توپتىق سايىس بويىنشا قازىرگى قازاقستان چەمپيونى سانالادى. سونداي-اق ول ەۋروپالىق بەدەلدى جارىستاردا جاسوسپىرىمدەر جانە جاستار دەڭگەيىندە ايتارلىقتاي تاجىريبە جيناقتاپ ۇلگەرگەن. جاسوسپىرىمدەر مەن جاستار اراسىنداعى الەم چەمپيوناتىندا, جاستار اراسىنداعى «دجيرو د’يتاليادا» جانە بەدەلدى «تۋر دە ل’اۆەنير» ۆەلوجارىستارىندا ونەر كورسەتتى. وسىنداي باستى ناتيجەسىنىڭ ارقاسىندا Astana Qazaqstan Team باسشىلارىنىڭ كوزىنە ءتۇسىپ, كومانداعا شاقىرتۋ الدى.
«اstana Qazaqstan Team ۆەلوكلۋبىندا ونەر كورسەتۋ تۋرالى ۇسىنىس مەن ءۇشىن كۇتپەگەن جاعداي بولدى. الەم چەمپيوناتىنان كەيىن فەدەراتسيا پرەزيدەنتى نۇرلان سماعۇلوۆ پەن كوماندانىڭ باس مەنەدجەرى الەكساندر ۆينوكۋروۆ حابارلاسىپ, ماعان كلۋب ساپىندا ونەر كورسەتۋگە مۇمكىندىك بەرگىسى كەلەتىندەرىن ايتقاندا ايتارعا ءسوز تاپپاي قالدىم. ءبىر جاعىنان وتە قاتتى قوبالجىپ ءارى قاتتى قۋاندىم. وسى ۇسىنىستان كەيىن ءۇش كۇن ۇيىقتاي المادىم دەسەم دە بولادى. سەبەبى نەشە ءتۇرلى وي مازالادى. سەنىمدى اقتاي الماسام قالاي بولادى, ۆەلوسپورت الەمىن تۇگەل تانىعان اتاقتى سپورتشىلارمەن ءبىر پەلوتوندا بولۋدىڭ ءوزى مەن سياقتى سپورتشىلار ءۇشىن ۇلكەن جەتىستىك قوي. بىراق سول مۇمكىندىكتى ابىرويمەن پايدالانا الامىن با دەگەن وي مازالادى. الەم چەمپيوناتىندا ءبىز فرانتسيا قۇراماسىمەن ءبىر قوناقۇيدە بولدىق. سول كەزدەگى الەم چەمپيونى جيۋليان ءالافيليپپتىڭ ءوزىن كورگەندەگى كوڭىل كۇيىم بۇل جەردە تۇككە تۇرماي قالدى. نۇر-سۇلتان قالاسىندا وتكەن تۇساۋكەسەردە العاش رەت Astana Qazaqstan Team جەيدەسىن كيدىم, كوماندالاستارىممەن جاقىنىراق تانىستىم. نيبالي, لوپەس سياقتى مايتالماندارمەن ءبىر ساپتا تۇردىم. ءالى دە قوبالجۋ بار, قورقىنىش تا بار. بىراق قازىرگى بار ويىم ەل سەنىمىن اقتاۋ, باپكەرلەر سەنىمىنەن شىعۋ. ول ءۇشىن ايانىپ قالمايمىن», دەيدى نۇربەرگەن.
نۇربەرگەن بيىل قازاقستان چەمپيوناتىنىڭ توپتىق جارىسىندا مارەگە ءبىرىنشى كەلدى. جاسوسپىرىمدەر اراسىنداعى ەل چەمپيوناتىندا جۇلدەلى ورىنداردى يەلەنىپ, «بالتيك-كاركونوشە» تۋرىنىڭ كەزەڭدىك جارىسىندا (2019 ج.) 4-ناتيجە, «تۋر دە دمز» جارىسىندا (2017 ج.) جالپى ەسەپتە 9-ناتيجە كورسەتتى.
«مەن – تاراز قالاسىنىڭ تۋماسىمىن. بالا كەزىمنەن ءجۇزۋ سپورتىمەن اينالىسسام دا, ۆەلوسپورت جارىستارىن ۇزبەي قارايتىنمىن. اسىرەسە جاز ماۋسىمىندا ايگىلى «تۋر دە فرانس» دوداسىنىڭ بىردە-ءبىر كەزەڭىن جىبەرمەيتىنمىن. «استانا» جازۋى بار جەيدەنى كيگەن ۆينوكۋروۆ, فوفونوۆتىڭ ونەرىنە ءتانتى بولدىم, قاتتى قىزىعاتىنمىن. اعام ەكەۋمىز باراتىن ءجۇزۋ باسسەينىنىڭ جانىندا ۆەلوسپورت سەكتسياسى جۇمىس ىستەيتىن. ءبىر كۇنى جاتتىعۋدان شىعىپ كەلە جاتسام, سەكتسيا الدىنا ۆەلوسيپەدتەردى ءتىزىپ قويىپتى, شىداماي ىشكە كىردىم. قىزمەتكەر مەحانيك ەكەن, ماعان «ەرتەڭ تاڭەرتەڭ سەگىزدە كەل» دەدى. سول كۇننەن باستاپ ۆەلوسيپەد سەنىمدى سەرىگىمە اينالدى. ماعان قاتتى ۇنادى. ال جارىستارعا قاتىسىپ, جۇلدەلى ورىنداردان كورىنە باستاعاندا تاڭداۋىم دۇرىس بولعانىن ءتۇسىندىم. ءسويتىپ الدىما بەلگىلى ءبىر جەتىستىككە جەتۋىم كەرەك دەگەن ماقسات قويدىم. قازىر جاسىم 21-دە, ۆەلوسيپەدتى تىزگىندەگەنىمە 10 جىلدان استى. ەل ىشىندەگى جارىستارعا جامبىل وبلىسى قۇراماسىمەن شىعامىن», دەيدى جاس شاباندوز.
نۇربەرگەن كلاسسيكالىق جانە ءدوڭ جولداردا وتەتىن جارىستارعا ماشىقتانعان. ونىڭ كەلەر ماۋسىمدا قاي جارىسقا قاتىساتىنى يسپانيادا ءوتىپ جاتقان كوماندانىڭ جاتتىعۋ جيىنىنان كەيىن بەلگىلى بولادى. سپورتتىق مانسابىندا ۇلكەن قادام جاساعان جاس شاباندوزدىڭ كوڭىلى قوبالجىپ, ەرەكشە تولقۋلى. ونىسى تۇسىنىكتى دە. الەمدىك تۋرعا Astana كومانداسىمەن بارۋ بالا كۇنگى ارمانى. بۇدان بولەك الەمدىك تۋر دەڭگەيى جوعارى, ەرەكشە دايىندىق پەن تاباندىلىقتى تالاپ ەتەدى.
«باستى جانكۇيەرىم – اكەم. ماعان قولداۋ كورسەتۋدەن ەش جالىققان ەمەس. ارينە بۇل سپورتتىڭ وزىندىك قيىندىقتارى بار ەكەنىن, جاراقاتى كوپ ەكەنىن ول دا, مەن دە جاقسى تۇسىندىك. وتباسىمىزدا جالعىز ۇلمىن. بىراق مەنىڭ تاڭداۋىم ۆەلوسپورت بولعانىنا قارسىلىعىن بىلدىرگەن جوق. بۇعانامدى سىندىرىپ العاندا, وپەراتسيا جاسالدى. اكەم وسىنداي ساتتەردە قاسىمدا بولادى. جارىس قاي قالادا بولسىن, جانكۇيەرلەر اراسىنان تاباسىڭ. سوندىقتان جارىستان تىس ۋاقىتتا ۇيدە بولىپ, اناما, اكەمە كوڭىل بولۋگە تىرىسامىن», دەپ ءسوزىن تۇيىندەدى نۇربەرگەن.
تارازدىق سپورتشى وسىنداي مۇمكىندىك بەرگەن الەكساندر ۆينوكۋروۆ پەن ۆەلوسپورت فەدەراتسياسىنىڭ پرەزيدەنتى نۇرلان سماعۇلوۆقا العىسىن ءبىلدىردى. العاشقى باپكەرى ۆياچەسلاۆ نەپومنياششيح پەن الەكساندر شۋشەموين باسقاراتىن Vino – Astana Motors كومانداسىنىڭ باپكەرلەر شتابىنىڭ تاربيەسىنە دە ءدان ريزا. ءبىر قىزىعى, فرانتسۋزدار, شەتەلدىك ماماندار ونىڭ ەسىمىن اينا قاتەسىز ايتادى ەكەن. مۇنى مەن جاقسىلىققا جورىدىم, دەيدى سپورتشى.