سىبايلاس جەمقورلىققا قارسى قىزمەت تالعات اردان مەن قانات سۇلتانبەكوۆ ينتەرپول تىزىمىندە جوق ەكەنى تۋرالى باق-تاعى اقپاراتقا قاتىستى جاۋاپ بەردى, دەپ حابارلايدى Egemen.kz.
«استانا قالاسى اكىمدىگىنىڭ لاۋازىمدى تۇلعالارىنا جانە LRT, BRT/ITS جوبالارىن ىسكە اسىرۋعا بولىنگەن اقشا قاراجاتىن جىمقىرۋ فاكتىلەرى بويىنشا وزگە دە تۇلعالارعا قاتىستى قىلمىستىق ءىس اياسىندا ت. اردانعا جانە ق. سۇلتانبەكوۆكە «قىزىل بيۋللەتەن» بويىنشا (قاماۋعا الۋ جانە ەكستراديتسيالاۋ ماقساتىندا) حالىقارالىق ىزدەۋ جاريالاندى.
جۇرگىزىلگەن ءىس-شارالار ت. ارداننىڭ تۇركيادا ورنالاسقاندىعىن انىقتادى. سوت ونى قاماۋعا الۋ ءۇشىن سىرتتاي سانكتسيا بەردى. وسى مەملەكەتتىڭ قۇقىق قورعاۋ ورگاندارى ونىڭ ورنالاسقان جەرىن انىقتاۋ جانە ۇستاۋ بويىنشا ءىس-شارالار جۇرگىزۋدە. سونىمەن قاتار ق. سۇلتانبەكوۆتىڭ اقش اۋماعىندا ەكەندىگى انىقتالدى. ونى ۇستاۋ جانە ەكستراديتسيالاۋ تۋرالى وتىنىشتەر بىرنەشە رەت جولداندى. الايدا, اقش زاڭى بويىنشا ەگەر ول كوشى-قون رەجيمىن بۇزباسا, «قىزىل بيۋللەتەننىڭ» بولۋى ىزدەۋدە جۇرگەن ادامدى ۇستاۋعا نەگىز بولمايدى. سونىمەن قاتار ءبىزدىڭ ازاماتتى ەكستراديتسيالاۋ قىلمىسكەرلەردى ۇستاپ بەرۋ تۋرالى ەكىجاقتى كەلىسىمنىڭ بولماۋىمەن قيىنداپ وتىر. بۇل ماسەلەنى ۋاكىلەتتى ورگان پىسىقتايدى», دەلىنگەن اگەنتتىك حابارلاماسىندا.
سونداي-اق ءمالىم ەتىلگەندەي, ينتەرپول سايتىندا تەك كىسى ءولتىرۋ, تەرروريزم, ەكسترەميزم سىندى قىلمىستار ءۇشىن ايىپتالۋشىلاردىڭ مالىمەتتەرى ەنگىزىلەدى.
حالىقارالىق قىلمىستىق پوليتسيا ۇيىمى – ينتەرپولدىڭ تالاپتارى مەن ەرەجەلەرىنە سايكەس, ينتەرپولدىڭ جاريا ۆەب-سايتىندا قىلمىسكەردى ىزدەستىرۋ جانە جاريالاۋ تۋرالى مالىمەتتەر تەك ۇلكەن قوعامدىق رەزونانس تۋدىرعان, سونداي-اق قوعامعا جوعارى قاۋىپ توندىرەتىن (كىسى ءولتىرۋ, تەرروريزم, ەكسترەميزم جانە ت.ب.) قىلمىس جاساعان ادامدارعا قاتىستى جاريالاناتىنىن اتاپ وتكەن ءجون.
ءدال وسى تالاپتار ىزدەستىرىلەتىن ادامداردى بارىنە قول جەتىمدى تىزىمگە قوسۋعا نەگىز بولادى. جاريا ۆەب-سايتتا مالىمەتتەردى جاريالاۋ تۋرالى تۇپكىلىكتى شەشىمدى ينتەرپولدىڭ باس حاتشىلىعى (ليون, فرانتسيا) قابىلدايدى.