گەرمانيانىڭ ينتسەل قالاسىندا كونكيمەن جۇگىرۋ سپورتىنان جاسوسپىرىمدەر اراسىنداعى الەم كۋبوگىنىڭ ەكىنشى كەزەڭى باستالدى.
وسىدان ءبىر اپتا بۇرىن ينتسەلدە وتكەن العاشقى كەزەڭدە ءبىر كۇمىس, ءبىر قولا مەدال جەڭىپ العان قازاقستاندىق الينا داۋرانوۆا بۇل جولى دا جۇلدەگەرلەر قاتارىنان كورىندى. 500 مەتر قاشىقتىقتا سىنعا تۇسكەن وتانداسىمىز جارىس جولىن 00:39.08 سەكۋندتا ءجۇرىپ ءوتىپ, كەزەكتى قولا مەدالىنە قول جەتكىزدى. بۇل سىندا التىن جانە كۇمىس جۇلدەنى نيدەرلاند وكىلدەرى جەڭىپ الدى. باس جۇلدە پيەن سميتكە بۇيىرسا, كۇمىستى دجيدۋ حوكسترا ەنشىلەدى.
وسىلايشا, الينا داۋرانوۆا الەم كۋبوگىنىڭ ەكى كەزەڭىندە ءۇش جۇلدە ولجالادى. ءبىرىنشى كەزەڭدە ول 1000 مەترگە جارىسۋدا كۇمىس, 1 500 مەتردە قولا جۇلدەگەر اتاندى.