بىلتىر زاتوبول دەگەن ەسكى اتاۋىن تاريحقا وتكىزىپ بەرىپ, قالا مارتەبەسىنە يە بولعان ەڭ جاس قالا توبىل شاھارىنىڭ بۇگىندە ۇلت مادەنيەتىنىڭ جارشىسى, ءداستۇرلى ونەردىڭ ناسيحاتشىسىنا اينالا باستاعانى قۋانتادى. قالانىڭ قاق ورتاسىنا ورنالاسقان «التىن ءدان» مادەنيەت ۇيىندە قازاقتىڭ اقىنى, سازگەر, كەزىندە ىبىرايدىڭ اعارتۋشىلىق يدەياسىن ناسيحاتتاپ, ۇلى ۇستازعا كوپ قولداۋ كورسەتكەن نۇرجان ناۋشاباي ۇلى اتىنداعى رەسپۋبليكالىق جىر-تەرمە, ءداستۇرلى ءان ورىنداۋشىلار بايقاۋى ءوز مارەسىنە جەتتى.
وبلىستىق مادەنيەت باسقارماسى ۇيىمداستىرعان ءداستۇرلى ونەر بايقاۋىنا ەلىمىزدىڭ ءار وڭىرىنەن كەلگەن 18 ونەرپاز قاتىستى. كىلەڭ كۇمىس كومەي انشىلەر باس قوسقان ءداستۇرلى ءان مەرەكەسىندە نۇرجاننىڭ بۇرىن كوپ ايتىلماي كەلگەن «كوكەن-اي», «باتيماعا», «ارا-اي», «اسىل-اي», «جان ساۋلەم», «نازىم» اتتى شىعارمالارى شىرقالدى. بايقاۋعا قاتىسقان جىرشى-تەرمەشىلەر نۇرجاننىڭ نازىمدارى مەن اندەرىن ورىنداۋمەن قاتار, بۇرىننان وزدەرىنىڭ ءان قورجىنىندا جۇرگەن مۋزىكالىق شىعارمالارىن شىرقاپ, ءداستۇرلى انگە سۋساپ قالعان كورەرمەن قاۋىمنىڭ قۇلاق قۇرىشىن قاندىردى.
بايقاۋعا قاتىسۋشىلاردىڭ ونەرىن بەلگىلى جىراۋ, فولكلور زەرتتەۋشى الماسبەك الماتوۆ باستاعان قازىلار القاسى باعالاپ وتىردى.
– قوستاناي وڭىرىندە وسى كۇزدىڭ وزىندە جۇرتتى ەلەڭ ەتكىزەرلىك ەكى بىردەي اۋقىمدى شارا بولىپ ءوتتى. وتكەن ايدا ىبىراي ءالتىنساريننىڭ 180 جىلدىعىنا ارنالعان رەسپۋبليكالىق الامان ايتىسقا ارنايى كەلىپ قاتىستىم, ەندى مىنە, ءساتى ءتۇسىپ توبىل قالاسىنداعى جىرشى-تەرمەشىلەر بايقاۋىنا تاعى كەلىپ وتىرمىن. مۇنىڭ ءوزى توبىل-تورعاي وڭىرىندەگى ءداستۇرلى ونەرىمىزدىڭ دامۋى ەرەكشە ەكەنىن كورسەتەدى. بۇگىنگى بايقاۋعا دا ءار وڭىردەگى ءداستۇرلى جىر-تەرمە مەكتەپتەرىنىڭ وكىلدەرى كەلىپ, ونەر كورسەتىپ جاتىر. ونەرپازداردىڭ ولقىسى جوق, كىلەڭ مىقتىلار. ءبىر ەسكەرە كەتەتىن دۇنيە, مۇنداي بايقاۋلاردا جىرشىلاردى بولەك, تەرمەشىلەردى بولەك باعالاۋ كەرەك, ايتپەسە قازىلارعا قيىن ءتيىپ جاتىر, – دەدى ايگىلى جىراۋ.
وبلىستىق مادەنيەت باسقارماسىنىڭ باسشىسى ەرلان قالماقوۆ بۇل ەسكەرتپەنىڭ ورىندى ەكەنىن, الداعى جىلى وتەتىن بايقاۋدا قاپەرگە الىناتىنىن ايتتى.
بايقاۋدىڭ باس جۇلدەسىن قىزىلوردا وبلىسىنان كەلگەن كۇمىس كومەي جىرشى ماليكا الدامجاروۆا جەڭىپ الدى. 1-ورىنعا ەلوردالىق جاس دارىن ءبىرجان ايتاحمەتوۆ يە بولدى. ال بايقاۋعا الماتى قالاسىنىڭ اتىنان قاتىسقان جاسۇلان وتەمۇراتوۆقا 2-ورىن بۇيىرسا, شىمكەنتتىك ونەرپاز قىلىشبەك سىناداي مەن ەلوردالىق ۇلدانا نۇرتۋعان ءۇشىنشى ورىندى ءوزارا ءبولىستى. ونەرپازداردىڭ بارىنە نۇرجان اندەرى بايقاۋىنىڭ ارنايى مۇسىنشەسى مەن اقشالاي سىيلىق تابىس ەتىلدى.
قوستاناي وبلىسى