ۆەنەسۋەلادا مەملەكەت باسشىسى نيكولاس مادۋرونىڭ توراعالىعىمەن بەيبىتشىلىك ماقساتىندا جالپىۇلتتىق كونفەرەنتسيا ءوتتى, دەپ حابارلايدى ريا «نوۆوستي» اگەنتتىگى.
«ميرافلورەس» پرەزيدەنت سارايىندا وتكەن كونفەرەنتسياعا ءتۇرلى ساياسي كۇشتەر مەن بيزنەس وكىلدەرى قاتىستى. وپپوزيتسيا جەتەكشىلەرى بۇل جيىندى ديالوگ قۇرۋعا نەگىزدەلگەن دەپ تاراپتاروعان قاتىسۋدان باس تارتقان ەدى. دەگەنمەن, وپپوزيتسيالىق كۇشتەردىڭ بىرنەشە وكىلى كونفەرەنتسياعا قاتىسۋدى ءجون كورگەن ەكەن. پرەزيدەنت ن.مادۋرو بۇل شارانى ەلدە ورىن الىپ جاتقان جاپپاي نارازىلىق اكتسيالارىنا وراي ۇيىمداستىرعان بولاتىن.
مەملەكەت باسشىسى بۇدان بۇرىن نارازىلىقتار كەزىندە 50-دەن اسا ادامنىڭ قازا بولعانىن مالىمدەدى. «وپپوزيتسيا جاقتاستارى قۇرعان قورشاۋلار مەن بارريكادالار ونداعان ادامنىڭ قازا بولۋىنا سەبەپ بولدى. ناقتى ايتقاندا, جەدەل جاردەم قىزمەتكەرلەرى وپپوزيتسيونەرلەردىڭ بوگەتىنەن وتە الماي, تارتىپسىزدىكتەر كەزىندە جاراقات العاندارعا دەر كەزىندە مەديتسينالىق كومەك كورسەتە الماعان. ماسەلەن, 30 ادام جۇرەك تالماسى مەن دەمىكپەدەن كوز جۇمدى», – دەدى ول.
ۆەنەسۋەلا پرەزيدەنتى ەلدەگى جاعدايدى قالپىنا كەلتىرۋ ءۇشىن تاراپتاردى كونستيتۋتسيانى قۇرمەتتەپ, قاقتىعىستاردى توقتاتۋعا شاقىردى.
ايدار ورىسباەۆ.
دەرەككوز: Ria.ru.
فوتو: Ria.ru.