كەشە وبلىس اكىمى قىرىمبەك كوشەرباەۆ جاڭاقورعان اۋدانىنا بارىپ, سۋ تاسقىنى قاۋپى تۋىنداعان اۋىل تۇرعىندارىمەن كەزدەستى. ءتيىستى ورگان باسشىلارىمەن سەلەكتورلىق بايلانىس ارقىلى كوشپەلى ءماجىلىس وتكىزىپ, ولاردىڭ باياندامالارىن تىڭدادى جانە جاڭاقورعان مەن ارال اۋداندارى ارالىعىنداعى جاعدايدى ۇنەمى باقىلاۋدا ۇستاۋدى تاپسىردى. بيىل جاۋىن-شاشىن مول, شاردارا سۋ قويماسى تولدى, ال كوكساراي 1,5 اپتا ىشىندە تولىپ قالادى, سوندىقتان ەشبىر جاۋاپتى تۇلعا قازىر دەمالىسقا شىقپايدى, دەدى وبلىس باسشىسى. قاراجات جاعى تولىق شەشىلدى.
سونداي-اق, وسى جيىندا وبلىس باسشىسى اۋدان اكىمىنىڭ ورىنباسارى قارجىبەك بۇركىتباەۆقا قاتاڭ ەسكەرتۋ جاسادى. ەستەرىڭىزدە بولسا, بىرنەشە كۇن بۇرىن جاڭاقورعان اۋدانىنداعى ۇيلەردىڭ اۋلالارىن سۋ العان كەزدە تۇرعىندار ابدىراپ قالعان-دى. دەر كەزىندە ارنايى تەحنيكالارى بار ماماندار كەلىپ كومەك كورسەتتى. دەگەنمەن, زالالدى جويۋ بارىسىندا جاعىمسىز وقيعا ورىن الدى. جەرگىلىكتى تۇرعىن كوشەدەگى سۋدىڭ سالدارىنان كولىكپەن ءجۇرۋ مۇمكىن ەمەس ەكەندىگىن ايتىپ, شاعىمدانعان. وعان ق.بۇركىتباەۆ: «ول ءبىزدىڭ شارۋامىز ەمەس, سەن ونى ءوزىڭ جوندە», دەپ دورەكى جاۋاپ قايتارعان.
وسى وقيعا بويىنشا ق.كوشەرباەۆ جاڭاقورعان اۋدانىنىڭ اكىمى سۇلتانبەك تاۋىپباەۆقا ورىنباسارىنا قاتاڭ ەسكەرتۋ جاساۋدى تاپسىردى. «اۋدان اكىمىنىڭ ورىنباسارى ق.بۇركىتباەۆقا قاتاڭ ەسكەرتۋ جاسالسىن. قانشا كۇردەلى ماسەلە بولسا دا مەملەكەتتىك قىزمەتتىڭ ەتيكاسىن ساقتاۋ – ءبىزدىڭ پارىزىمىز», دەلىنگەن نۇسقامادا.
ەرجان بايتىلەس,
«ەگەمەن قازاقستان».
قىزىلوردا وبلىسى.