مەملەكەت باسشىسى نۇرسۇلتان نازارباەۆتىڭ اتىنا ينگۋشەتيا رەسپۋبليكاسىنىڭ باسشىسى يۋنۋس-بەك ەۆكۋروۆتان حات كەلدى, دەپ حابارلادى پرەزيدەنتتىڭ ءباسپاسوز قىزمەتى.
ءوز حاتىندا يۋ.ەۆكۋروۆ ينگۋشتەردىڭ سان عاسىرلىق تاريحىنداعى قاسىرەتتى داتانىڭ ءبىرى 1944 جىلعى 23 اقپان ەكەنىن اتاپ وتكەن. بۇل كۇنى ينگۋش حالقى اياق استىنان تاريحي وتانىنان ايىرىلدى, ال جاپپاي جەر اۋدارۋ مەن قۋعىن-سۇرگىن سالدارىنان جارتىسىنان استامى قازا بولدى.
«قازاقستاننىڭ مىڭداعان قاراپايىم تۇرعىندارى ءبىزدىڭ حالقىمىزدىڭ سول مۇلدە ادام توزگىسىز جاعدايدا امان قالۋىنا كومەكتەستى. ولار جان كۇيزەلىسىمىزگە ورتاقتاستى, باسپاناسى مەن نانىن ءبولىستى, ناۋقاستاردى ەمدەپ, قايتىس بولعانداردى جەرلەدى», – دەلىنگەن حاتتا.
يۋ.ەۆكۋروۆ ينگۋشتەر ءۇشىن قازاقستان ەكىنشى وتانعا اينالعانىن جانە كوپشىلىگى ءالى دە وسى ەلدە تۇرىپ جاتقانىن, ونىڭ تولىققاندى ازاماتى بولىپ سانالاتىنىن اتاپ كورسەتكەن. ول وسىنىڭ ءبارى نۇرسۇلتان نازارباەۆ جۇرگىزگەن ساياساتتىڭ ارقاسىندا مۇمكىن بولعانىنا توقتالعان.
«ينگۋشەتيا رەسپۋبليكاسى حالقىنىڭ جانە جەكە ءوزىمنىڭ اتىمنان بارشا قازاق حالقىنا قيىن-قىستاۋ جىلدارى ءوز وتانىنان ايىرىلعان ادامدارعا كورسەتكەن كومەگى ءۇشىن شىنايى ريزاشىلىق بىلدىرەمىن», دەلىنگەن حاتتا.
سوڭىندا يۋ.ەۆكۋروۆ قازاقستان پرەزيدەنتىنە جانە ەلىمىزدىڭ بارشا كوپۇلتتى حالقىنا باقىت, جاقسىلىق, يگىلىك جانە باق-بەرەكە تىلەگەن.