پەتروپاۆلدا كۇدىكتىلەر مەملەكەتتىك تۇرعىن ءۇي قورىنان پاتەردى زاڭسىز جەكەشەلەندىرىپ العان.
پەتروپاۆل قالاسىنىڭ پروكۋرورى قونىسبەك يبراەۆتىڭ حابارلاۋىنشا, قالالىق پروكۋراتۋرا تۇرعىن ءۇي-كوممۋنالدىق شارۋاشىلىق, جولاۋشىلار كولىگى مەن اۆتوكولىك جولدارى بولىمىنە تەكسەرۋ جۇرگىزگەن. تەكسەرۋ بارىسىندا مەملەكەتتىك تۇرعىن ءۇي قورىنان پاتەردى زاڭسىز جەكەشەلەندىرۋ فاكتىسى انىقتالدى.
قولدانىستاعى زاڭناماعا سايكەس ۇسىنىلاتىن باسپانا تۇرعىن ءۇيدىڭ قالدىق قۇنى بويىنشا جەكەشەلەندىرىلەدى. دەگەنمەن, ءۋاليحانوۆ كوشەسىنىڭ بويىندا ورنالاسقان ۇيدەگى پاتەرلەردىڭ ءبىرىن جەكەشەلەندىرۋ كەزىندە جەرگىلىكتى اتقارۋشى ورگانعا تۇرعىن ءۇي قۇنىنىڭ تولەنگەنى تۋرالى جالعان تۇبىرتەك ۇسىنىلعان. سالىق قىزمەتىنىڭ دەرەگى بويىنشا, اتالمىش پاتەردى جەكەشەلەندىرۋدەن تۇسكەن قاراجات مەملەكەتكە اۋدارىلماعان.
الاياقتىق ارەكەت سالدارىنان مەملەكەتكە 1 291 864 تەڭگە كولەمىندە ماتەريالدىق شىعىن كەلتىرىلدى. «قارجى پوليتسياسى بۇل فاكتى بويىنشا قىلمىستىق ءىس قوزعاپ, تەرگەۋ امالدارىن باستادى», – دەپ مالىمدەدى ق. يبراەۆ.
ايدار ورىسباەۆ,
«ەگەمەن قازاقستان».