كەشە ورتالىق كوممۋنيكاتسيالار قىزمەتىندە يندۋستريا جانە جاڭا تەحنولوگيالار ءمينيسترىنىڭ ەكى بىردەي ورىنباسارى – البەرت راۋ مەن نۇرلان ساۋرانباەۆ ءباسپاسوز ءماسليحاتىن وتكىزدى. ولار ۇدەمەلى يندۋستريالىق-يننوۆاتسيالىق دامۋ باعدارلاماسى بويىنشا ەكىنشى بەسجىلدىققا جوسپارلانعان ءىس-شارالار جونىندە ايتتى.
ءبىرىنشى ۆيتسە-مينيستر ا.راۋدىڭ سوزىنە قاراعاندا, يندۋستريالاندىرۋدىڭ ەكىنشى بەسجىلدىعىندا تاۋ-كەن مەن مۇناي-گاز سەكتورى نەگىزگى سالالار بولىپ قالا بەرەدى ەكەن. «ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ ەكىنشى بەسجىلدىعى ءبىرىنشى بەسجىلدىققا نەگىزدەلەدى. بيىل ءبىرىنشى بەسجىلدىق اياقتالىپ, قورىتىندىلانادى. مەملەكەت باسشىسى باعدارلامانىڭ ەكىنشى ءبولىمىن ازىرلەگەندە, ءبىرىنشى بەسجىلدىقتىڭ ولقىلىقتارىن ەسكەرۋدى تاپسىردى», دەدى ول. وسى ۋاقىتتا باعدارلاما دايىندالىپ جاتىر ەكەن. ونىڭ ازىرلەنۋىنە بيزنەس قاۋىمداستىعى دا اتسالىسۋدا.
– قارا جانە ءتۇستى مەتاللۋرگيا, ياعني تاۋ-كەن كەشەنى مەن مۇناي-گاز سەكتورى ەكىنشى بەسجىلدىقتا دا نەگىزگى سالا بولىپ قالادى. وسىعان وراي, كەلەسى بەسجىلدىقتا شيكىزاتتى تەرەڭ وڭدەۋ مىندەتتەرى تۇر. بۇل مىندەتتەر ءبىرىنشى بەسجىلدىقتىڭ ەنشىسىندە-تۇعىن, الەمدىك نارىقتاعى كۇردەلى احۋالعا بايلانىستى بۇل شارۋانىڭ شامالى ىركىلىپ قالعانى راس. بۇيىرتسا, ەكىنشى بەسجىلدىقتا بۇل جۇمىس جالعاسادى. «ارسەللورميتتالتەمىرتاۋ» الدىندا تۇرعان جىلىنا 6 ملن. توننا بولات ءوندىرۋ مىندەتى دە كەلەسى بەسجىلدىققا وتەدى. بۇدان بىلاي مەيلىنشە شاعىن مەتاللۋرگيا دامىتىلادى. اتاپ ايتقاندا, شويىن, قۇبىر, جوعارى ساپالى تەمىر-رۋدالىق شيكىزات ءوندىرىسى العا باسادى. ال ءتۇستى مەتاللۋرگياداعى قازىرگى ءوندىرىس كولەمىن ساقتاپ قالۋىمىز كەرەك. مەملەكەت باسشىسى قويعان مىندەتتەرگە ساي, بۇگىندە سيرەك مەتالدار ءوندىرۋ بويىنشا بەلسەندى جۇمىس جاسالىپ جاتىر, دەدى ا.راۋ.
ءباسپاسوز ءماسليحاتىندا ماشينا جاساۋ سالاسى دا نازاردان تىس قالمادى. ۆيتسە-ءمينيستردىڭ سوزىنە باقساق, ماشينا جاساۋ سالاسىنىڭ بارلىق سەكتورى دەرلىك يندۋستريالاندىرۋدىڭ ەكىنشى بەسجىلدىعىنا ەنەدى. وندا نەگىزىنەن تەمىرجول ماشيناسىن جاساۋ سالاسى باستى نازاردا كورىنەدى. بۇل سالا ءبىرىنشى بەسجىلدىقتا جاقسى ءوسىم كورسەتكەندىكتەن, كەلەسى بەسجىلدىقتا دا سول دەڭگەيدەن كورىنۋگە قول جەتكىزىلەتىندىگى ايتىلدى. سونداي-اق, شەتەلدەرگە ساتۋ بويىنشا ۇلكەن ءمىندەت قويىلىپ, مەملەكەت بۇل ءونىمنىڭ ەكسپورتىنا قولداۋ كورسەتۋدى كوزدەپ وتىر. اۆتوكولىك ونەركاسىبى تۋرالى دا باستالار بەسجىلدىققا ناقتى مىندەتتەر قويىلىپتى. «بۇيىرتسا, 2019 جىلعا قاراي جىلىنا 200 مىڭ اۆتوكولىك شىعارۋ جوسپارلانىپ وتىر. ولار قۇراستىرىلادى جانە وندىرىلەدى», دەدى ا.راۋ.
سونداي-اق, ەلباسىنىڭ قۇرىلىس ماتەريالدارى بويىنشا بەرگەن تاپسىرمالارى دا ورىندالۋ ۇستىندە. بۇگىندە بىرقاتار قۇرىلىس ماتەريالدارىمەن ءوز ەلىمىزدى قامتاماسىز ەتە باستاپپىز. كەلەسى بەسجىلدىقتا تسەمەنت, ارماتۋرا, كافەل-پليتا سياقتى قۇرىلىس ماتەريالدارىمەن ىشكى نارىقتاعى سۇرانىس تولىق قامتاماسىز ەتىلمەك. سانفايانس جونىندە دە بىرقىدىرۋ جۇمىس اتقارىلىپ, قىزىلوردادا تاعى ءبىر شىنى جاسايتىن زاۋىت جوباسى قولعا الىنىپتى.
نۇرباي ەلمۇراتوۆ,
«ەگەمەن قازاقستان».