تاشكەنتتە ورتالىق ازيا ەلدەرىنىڭ كاسىپوداقتارى كەڭەسى قۇرىلدى, دەپ حابارلايدى Egemen.kz قازاقستان رەسپۋبليكاسى كاسىپوداقتار فەدەراتسياسىنىڭ مەديا ورتالىعىنا سىلتەمە جاساپ.
وزبەكستان استاناسى – تاشكەنتتە قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين, وزبەكستان كاسىپوداقتار فەدەراتسياسىنىڭ توراعاسى كۋدراتۋللا رافيكوۆ جانە تاجىكستان تاۋەلسىز كاسىپوداقتار فەدەراتسياسىنىڭ توراعاسى ماليكشو نەماتزودا ورتالىق ازيا ەلدەرىنىڭ كاسىپوداقتارى كەڭەسىن (واەكك) قۇرۋ تۋرالى حاتتاماعا قول قويدى.
ورتالىق ازيا ەلدەرىنىڭ كاسىپوداقتارى كەڭەسىنىڭ ءبىرىنشى قۇرىلتاي جينالىسىنا قاتىسۋشىلارعا ارناعان سوزىندە وزبەكستان كاسىپوداقتار فەدەراتسياسىنىڭ توراعاسى قۋدراتۋللا رافيكوۆ ءۇش مەملەكەتتىڭ ءىرى كاسىپوداق بىرلەستىكتەرىن بىرىكتىرۋ تۋرالى شەشىمنىڭ ورتاق بولعانىن اتاپ ءوتتى.
ول قۇرىلىپ جاتقان كەڭەستىڭ ماقساتى واەكك مۇشەلەرىنىڭ ەڭبەككەرلەردىڭ الەۋمەتتىك-ەڭبەك, كاسىپتىك, ەكونوميكالىق جانە باسقا دا زاڭدى قۇقىقتارى مەن مۇددەلەرىن, كاسىپتىك وداقتاردىڭ قۇقىقتارى مەن قىزمەتىندەگى كەپىلدىكتەرىن قورعاۋ جونىندەگى ءىس-ارەكەتتەرىن بىرىكتىرۋ ەكەنىن باسا ايتتى. قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين ورتالىق ازيا ەلدەرىنىڭ كاسىپوداقتارى كەڭەسىنىڭ قۇرىلۋى ورتالىق ازيا ايماعىنداعى 15 ميلليوننان استام ەڭبەككەرلەردىڭ لايىقتى ەڭبەك ستاندارتتارىنا جانە ول ءۇشىن ءادىل تولەمگە ۇمتىلىسىندا ىنتىماقتاستىقتى بەكىتۋگە مۇمكىندىك بەرەتىنىن جانە حالىقارالىق كاسىپوداقتار بىرلىگىن نىعايتۋعا اسەر ەتەتىندىگىن اتاپ ءوتتى. قركف باسشىسى كەڭەس قىزمەتىنىڭ باعىتتارى بويىنشا بىرقاتار ۇسىنىستار جاسادى.
«بىرىنشىدەن, جىل سايىن ورتالىق ازيا ەلدەرىنىڭ سۋبوڭىرلىك كاسىپوداق فورۋمىن وتكىزۋ, وندا ءبىز كاسىپوداق قىزمەتىنىڭ وزەكتى ماسەلەلەرىن تالقىلاپ, ورتاق كوزقاراستاردى ازىرلەي الامىز. ءبىرىنشى فورۋمدى 2022 جىلى قازاقستاندا وتكىزۋدى ۇسىنامىن. ەكىنشىدەن, وزبەكستان كاسىپوداقتار فەدەراتسياسى جانىنان قۇرىلاتىن كاسىپوداقتار اكادەمياسىنىڭ بازاسىندا (ەگەر وزبەكستاندىق ارىپتەستەر كەلىسسە) بىرىڭعاي ءبىلىم بەرۋ حابىن قالىپتاستىرۋ, وندا ءبىزدىڭ وكىلدەر تۇراقتى نەگىزدە جاڭا ءبىلىم الىپ, كاسىپوداقتىڭ وزىق تاجىريبەلەرىمەن الماسا الاتىن بولادى. ۇشىنشىدەن, ءبىزدىڭ ەلدەردىڭ كاسىپوداق شيپاجايلارىندا كاسىپوداق مۇشەلەرىنە ساناتورلىق-ساۋىقتىرۋ قىزمەتتەرىن كورسەتۋ ءۇشىن كاسىپوداقتىق ساۋىقتىرۋ جانە ءتۋريزمنىڭ بىرىڭعاي كارتاسىن ازىرلەۋ», دەپ ساتىبالدى داۋلەتالين ارىپتەستەرىمەن ءوز كوزقاراسىن ءبولىستى.
تاجىكستاننىڭ تاۋەلسىز كاسىپوداقتارىنىڭ اتىنان فەدەراتسيا توراعاسى ماليكشو نەماتزودا كەڭەس مۇشەلەرىنىڭ ورتاق ماقساتى – ەڭبەك ادامىنىڭ مۇددەلەرى مەن قۇقىقتارىن قورعاۋدى ۇستانۋ ەكەندىگىن ەرەكشە اتاپ ءوتتى.
ورتالىق ازيا ەلدەرىنىڭ كاسىپوداقتارى كەڭەسى مۇشەلەرىنىڭ ءبىرىنشى قۇرىلتاي جينالىسىنىڭ جۇمىسىنا ۇلتتىق كاسىپوداق ورتالىقتارى دەلەگاتسيالارىنىڭ مۇشەلەرىنەن باسقا, ۆيدەوكونفەرەنتسبايلانىسى ارقىلى حالىقارالىق ەڭبەك ۇيىمىنىڭ ەۋروپا جانە ورتالىق ازيا ءبولىمىنىڭ باسشىسى سەرگەيۋس گلوۆاتسكاس, حەۇ-نىڭ شىعىس ەۋروپا جانە ورتالىق ازيا بويىنشا بيۋروسىنىڭ ەڭبەككەرلەر قىزمەتى جونىندەگى باس مامانى گوچا الەكساندريا جانە بەاك اتقارۋشى حاتشىسى انتون لەپپيك قاتىستى. حەۇ جانە حكك وكىلدەرى جاڭا ايماقتىق كاسىپوداقتار بىرلەستىگىنىڭ قۇرىلۋىن قۇپتاپ, جاڭا قۇرىلىمدى ىلگەرىلەتۋ مەن دامىتۋدا جان-جاقتى قولداۋ كورسەتۋگە دايىن ەكەندىكتەرىن ءبىلدىردى.