6 كۇندە 121 قۇقىق بۇزۋشى, 500 جايسىز وتباسى مەن بالالار ەسەپكە الىندى
وبلىستا قولعا الىنعان “وتباسى جانە مەكتەپ” ءىس-شاراسىنىڭ نەگىزگى ماقساتى – قوعامعا زياندى باعىتتاعى جاسوسپىرىمدەر توبىن انىقتاۋ. ويتكەنى, بۇگىندە كامەلەتكە تولماعانداردىڭ قۇقىق بۇزۋشىلىعى, ەسىرتكىگە تاۋەلدىلىگى بەلەڭ الىپ وتىرعانى جالعان ەمەس. بالالاردىڭ قاراۋسىز قالۋى مەن ولارعا اتا-انالارى مەن ەرەسەكتەر تاراپىنان قاتىگەزدىك تانىتۋ, قىلمىستى ىستەرگە تارتۋ دەرەكتەرى دە بار.
ءىس-شاراعا جەرگىلىكتى اتقارۋشى ورگاندار, پروكۋراتۋرا, ءبىلىم بەرۋ, دەنساۋلىق ساقتاۋ مەكەمەلەرى, “نۇر وتان” حدپ جاستار قاناتىنىڭ فيليالدارى جانە كامەلەتكە جاسى تولماعاندار ءىسى جونىندەگى كوميسسيا قاتىستى.
وپەراتسيانىڭ التى كۇنى ىشىندە پوليتسيا بولىمشەلەرىنە ءارتۇرلى قۇقىق بۇزعان 918 كامەلەتكە تولماعاندار جەتكىزىلدى. ولاردىڭ ساباقتان جالتارعاندارى – 134, كومپيۋتەرلىك كلۋبتاردا جۇرگەندەرى – 55, قاراۋسىز قالعاندارى – 137. سونداي-اق, اكىمشىلىك جاۋاپكەرشىلىككە 175 ەرەسەك تۇلعا تارتىلدى. ولاردىڭ ىشىندە ۇل-قىزدارىنا تاربيە بەرۋ پارىزدارىنا نەمقۇرايدى قاراعان – 120 اتا-انا بار. تۇنگى ۋاقىتتا جاسوسپىرىمدەردىڭ كوڭىل كوتەرۋ ورىندارىندا جۇرۋىنە جول بەرگەن كافە, كلۋبتاردىڭ 13 قىزمەتكەرلەرى دە قۇقىق قورعاۋشىلار نازارىنان تىس قالعان جوق.
كامەلەتكە تولماعاندار ءىسى ءجونىندەگى قىزمەتكەرلەر جاسوسپىرىمدەرگە تەمەكى ونىمدەرىن ساتقان 22 ساتۋشى, تۇنگى ۋاقىتتا بالالاردىڭ كوڭىل كوتەرۋ ورىندارىندا جۇرۋىنە جول بەرگەن 19 اتا-انا مەن جامبىل اۋدانىنىڭ اسا اۋىلىندا ءجاسوسپىرىمدەردى سپيرتتىك ىشىمدىكتى قولدانۋعا يتەرمەلەگەن 1 دەرەكتى انىقتادى. جالپى, وپەراتسيا بارىسىندا 337 كامەلەتكە تولماعان مەن 146 جايسىز وتباسى ەسەپكە قويىلدى, قۇقىقتىق تاقىرىپتا 1500-دەن استام ءىس-شارالار مەن لەكتسيالار وتكىزىلدى.
قالالىق №1 پوليتسيا ءبولىمىنىڭ كامەلەتكە جاسى تولماعاندار ءىسى جونىندەگى ينسپەكتسياسىنىڭ قىزمەتكەرى, پوليتسيا كاپيتانى س. تاشلانوۆا تاراز قالاسىنىڭ 4-شاعىن اۋدانىنداعى ۇيلەردىڭ بىرىنەن تاستاندى بالاعا تاپ بولعان. انىقتاي كەلە, بەيتانىس ايەل سول ۇيدەگى ەگدە اپايعا بىرەر مينوتتەن كەيىن كەلىپ الىپ كەتەمىن دەپ 1,5 جاسار قىزدى ۇستاتىپ, ءىزىن جاسىرىپتى.
تاراز قالاسىنداعى №41 مەكتەپ-گيمنازيانىڭ ينسپەكتورى, پوليتسيا اعا لەيتەنانتى م.بايعۇبەكوۆا “بولاشاققا ەسىرتكىسىز جانە زياندى ادەتسىز!” ءىس-شاراسىنا قاتىسقان وقۋشىلاردىڭ تاعىلىمى زور عيبرات العانىنا قۋانادى. سول كۇنى مەكتەپ-گيمنازيانىڭ اۋلاسىندا وقۋشىلار, اتا-انالار, ۇستازدار مەن قالا قوناقتارى جينالعان. اتتى اسكەر مەن كينولوگ پوليتسەيلەر جان-جانۋارلاردى ۇيرەتۋدەگى ءوز شەبەرلىكتەرىن كورسەتكەن. ەسىرتكىمەن كۇرەس جانە قوعامدىق ءتارتىپتى ساقتاۋدا قىزمەتتىك يتتەر مەن اتتاردى پايدالانۋ ەرەكشەلىكتەرى دە وقۋشىلاردىڭ قىزىعۋشىلىعىن وياتقان.
– جىل باسىنان بەرى 30 اتا-انا قۇقىعىنان ايىرىلدى. الدىن الۋ جۇمىسى ناتيجەسىندە جاسوسپىرىمدەر قىلمىسى 14 پايىزعا ازايدى, – دەيدى پوليتسيا قىزمەتكەرلەرى.
كوسەمالى ساتتىباي ۇلى.
جامبىل وبلىسى.