«نۇر-سۇلتان-پەتروپاۆل» تاسجولىندا 7 كولىك سوقتىعىسىپ, 4 ادام اۋرۋحاناعا ءتۇستى, دەپ جازادى Egemen.kz پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
ۆەدومستۆونىڭ مالىمەتىنشە, بيىلعى جىلعى قازاننىڭ 31-دە كەشكى ساعات 18:08-دە ءبىرجان سال اۋدانى پوليتسياسىنىڭ كەزەكشى بولىمىنە «نۇر-سۇلتان-پەتروپاۆل» اۆتوجولىنىڭ 186 شاقىرىمىندا جول-كولىك وقيعاسى بولعانى تۋرالى حابار تۇسكەن.
«انىقتالعانداي, پەتروپاۆل قالاسى باعىتىندا ءجۇرىپ كەلە جاتقان نۇر-سۇلتان قالاسىنىڭ 22 جاستاعى تۇرعىنى باسقارعان «Toyota Camry» اۆتوكولىگى جولدىڭ ورتاسىنداعى قيسىق سىزىقتى بىلەۋگە سوعىلعان. سونىڭ سالدارىنان ءتۇرلى ماركالى جەتى كولىك سوقتىعىسقان. جول اپاتىنان ءتورت جولاۋشى زارداپ شەگىپ, بۇلاندى اۋداندىق اۋرۋحاناسىنا جەتكىزىلدى. ونىڭ ىشىندە بىرەۋى 9 جاسار بالا», دەدى ۆەدومستۆودان.
قازىرگى كەزدە, وسى وقيعاعا بايلانىستى قىلمىستىق كودەكستىڭ 345-ءشى بابى 2-بولىگى «جول قوزعالىسى ەرەجەلەرىن بۇزۋ» بويىنشا سوتقا دەيىنگى تەرگەۋ امالدارى جۇرگىزىلۋدە.
مەديتسينالىق كۋالاندىرۋدىڭ قورىتىندىسىنا سايكەس جۇرگىزۋشىلەر ساۋ بولعان.