كەشە باس پروكۋروردىڭ ورىنباسارى اندرەي كراۆچەنكو مەن قازاقستان ينتەرنەت قاۋىمداستىعىنىڭ پرەزيدەنتى شاۆكات سابيروۆ ءوزارا ىنتىماقتاستىق جونىندەگى مەموراندۋمعا قول قويدى.
مەموراندۋمعا قول قويۋدىڭ ماڭىزدىلىعىن ايتا وتىرىپ, اندرەي كراۆچەنكو باس پروكۋراتۋرا مەن قازاقستان ينتەرنەت قاۋىمداستىعىنىڭ بەلسەندى ارەكەتتەسۋى پروكۋراتۋرا ورگاندارىنىڭ ۇكىمەتتىك ەمەس ۇيىمدارمەن ءوزارا ءىس-قيمىلدى جولعا قويۋدىڭ جالعاسى بولىپ تابىلاتىنىن اتاپ ءوتتى.تاراپتار ينتەرنەت جەلىسىنىڭ قازاقستاندىق سەگمەنتىندە قۇقىققا قايشى كونتەنتتىڭ تارالۋىنا قاتىستى وزەكتى ماسەلەلەردى شەشۋگە باعىتتالعان كۇش-جىگەردى شوعىرلاندىرۋدى كوزدەپ وتىر. سوڭعى جىلدارى پروكۋراتۋرا ورگاندارى ينتەرنەت-كەڭىستىكتە زاڭسىز ماتەريالداردىڭ تارالۋىنىڭ جولىن كەسۋ ماقساتىندا 2011 جىلدان باستاپ باسقا دا مەملەكەتتىك ورگاندارمەن بىرلەسىپ 90 000-نان استام ينتەرنەت-رەسۋرستاردىڭ مونيتورينگىن جۇزەگە اسىرىپ, ەكسترەميزم جانە تەرروريزم يدەيالارىن ناسيحاتتاۋ, سونداي-اق, جارىلعىش قۇرىلعىلاردى قولدان جاساۋ ادىستەرى تۋرالى اقپاراتتاردى تاراتۋدىڭ انىقتالعان فاكتىلەرى بويىنشا جۇمىس جۇرگىزدى. استانا جانە الماتى قالالارىنىڭ سوتتارى اتالعان مەرزىم ىشىندە 596 ينتەرنەت-رەسۋرستىڭ ءونىمىن قازاقستان اۋماعىندا تاراتىلۋىن زاڭسىز دەپ تانۋ جونىندەگى پروكۋرورلاردىڭ ارىزدارىن قاناعاتتاندىردى.
وسىلايشا تاراپتار اتقارىلىپ جاتقان جۇمىستىڭ تيىمدىلىگىن ارتتىرۋ بويىنشا بىرلەسكەن ۇسىنىستاردى جۇزەگە اسىرۋ ءۇشىن ءوزارا ارەكەتتەسۋدىڭ ءتۇرلى نىساندارىن پايدالانۋ, اقپاراتپەن تۇراقتى الماسۋ, سونداي-اق, حالىقارالىق تاجىريبەنى پايدالانۋ جونىندە كەلىستى, دەپ حابارلادى باس پروكۋراتۋرانىڭ ءباسپاسوز قىزمەتى.