1998 جىلدىڭ جەلتوقسان ايىندا وسكەمەن قالاسىندا بۇرىنعى قۇرىلىس-مونتاج ۋچاسكەسىنىڭ شەتىندە اسا اۋىر قىلمىس جاسالعان, بەلگىسىز ادام باسىنان بالتامەن ۇرىپ جاس جىگىتتى ولتىرگەن.
ىشكى ىستەر ورگاندارىنىڭ قىزمەتكەرلەرى اتالعان قىلمىستى جاساعان كۇدىكتىنى انىقتاپ, ول 25 جاسار وسكەمەن قالاسىنىڭ تۇرعىنى س. بولىپ شىققان ەدى.
وعان ىزدەۋ سالىندى. 15 جىل بويى پوليتسەيلەر ىزدەستىرۋدەگىنىڭ جۇرگەن جەرىن انىقتاۋعا باعىتتالعان كولەمدى جۇمىس اتقاردى. ناتيجەسىندە, شىعىسقازاقستاندىق پوليتسەيلەر س.-نىڭ ماسكەۋدە جۇرگەنىن انىقتادى.
ماسكەۋگە كەلگەن شقو ءىىد جانە وسكەمەن قالاسى ءىىب جەدەل ۋاكىلدەرى كۇدىكتىنىڭ ىزىنە ءتۇستى. ونىڭ جالعان ات جامىلىپ, قولدان باسقا اتقا قۇجاتتار جاساعانى انىقتالدى. وعان قوسا, بوتەن اتتى جامىلىپ شاعىن بيزنەس – اۆتوشەبەرحانا اشقان.
ايلالارىنا قاراماستان, كۇدىكتى بارلىق ىزدەرىن جاسىرا المادى. ماسكەۋ قالاسىنىڭ قۇقىق قورعاۋ ورگاندارى قىزمەتكەرلەرىنىڭ كومەگىمەن ىزدەستىرۋدەگى قاماۋعا الىندى. ەندى ول وسكەمەن قالاسىنا ەكستراديتسيالانعاننان كەيىن زاڭدى جاۋاپكەرشىلىككە تارتىلاتىن بولادى, دەپ حابارلادى شقو ءىىد-ءنىڭ ءباسپاسوز قىزمەتى.