استاناداعى ورتالىق كوممۋنيكاتسيالار قىزمەتىندە ۇلتتىق ۆاليۋتانىڭ ايىرباس باعامىنا تۇزەتۋ ەنگىزىلۋىنە بايلانىستى دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ, مينيسترلىكتىڭ مەديتسينالىق جانە فارماتسەۆتيكالىق قىزمەتتى باقىلاۋ كوميتەتى توراعاسىنىڭ ورىنباسارى لاريسا پاك پەن «سك-فارماتسيا» ۇيىمىنىڭ باسشىسى شولپان احمەتتىڭ قاتىسۋىمەن كەزەكتى بريفينگ بولىپ ءوتتى.
ءىس-شاراعا ارنايى كەلگەن وكىلدەردىڭ ايتۋىنشا, اقشا ايىرباس قۇنىنىڭ وزگەرۋىنە وراي دەنساۋلىق ساقتاۋ مينيسترلىگى ەلىمىزدە ءدارى-دارمەككە باعانىڭ وسۋىنە جول بەرمەۋ ماقساتىندا جەرگىلىكتى اتقارۋشى ورگاندارمەن بىرلەسە وتىرىپ شۇعىل شارالار قابىلداپتى. بارلىق وڭىرلەردە اكىمدەردىڭ ورىنباسارلارى جەتەكشىلىك ەتەتىن جۇمىس توپتارى قۇرىلىپ, ولاردىڭ قۇرامىنا – دەنساۋلىق ساقتاۋ باسقارمالارىنىڭ, دسم مەديتسينالىق جانە فارماتسەۆتيكالىق قىزمەتتى باقىلاۋ كوميتەتىنىڭ اۋماقتىق دەپارتامەنتتەرىنىڭ, «نۇر وتان» پارتياسىنىڭ, ايەلدەر ءىسى جانە دەموگرافيالىق-وتباسىلىق ساياسات جونىندەگى ۇلتتىق كوميسسيانىڭ, فارماتسەۆتيكالىق وندىرۋشىلەردىڭ جانە وزگە دە مۇددەلى قۇرىلىمداردىڭ وكىلدەرى ەنىپ وتىر ەكەن.
بريفينگتە جۇمىس توبىنىڭ مۇشەلەرى دارىحانالارعا كۇن سايىن تەكسەرىسكە شىعىپ, قورىتىندىسىندا دارىلەردىڭ باعاسىنا مونيتورينگ جاريالاپ, فارماتسەۆتيكالىق كومپانيالارمەن ءتۇسىندىرۋ جۇمىستارى جۇرگىزىلىپ جاتقانىن ايتتى.
2014 جىلعى 13 اقپاندا دەنساۋلىق ساقتاۋ ءمينيسترى س.قايىربەكوۆا «فارمقىزمەتتى قولداۋ جانە دامىتۋ قاۋىمداستىعى», فارماتسەۆتيكالىق ونىمدەر ديستريبيۋتورلارى, فارماتسەۆتيكالىق فيرمالار وكىلدىكتەرى, «قازاقستاننىڭ فارممەديندۋسترياسى» قاۋىمداستىعى جانە «ۇلتتىق دەنساۋلىق ساقتاۋ پالاتاسىمەن» ەڭ قاجەتتى دارىلىك قۇرالدارعا باعانى ۇستاپ تۇرۋ تۋرالى مەموراندۋمعا قول قويىپتى.
مەموراندۋمعا قول قويۋداعى ماقسات, تەگىن مەديتسينالىق كومەكتىڭ كەپىلدىك بەرىلگەن كولەمىنە كىرمەگەن, الەۋمەتتىك جاعىنان از قامتىلعان تۇرعىندار ءجيى قولداناتىن 200-دەن استام دارىلەرگە باعا شەگىن بەلگىلەۋ جانە دارىلەرگە قويىلاتىن ۇستەمە باعانى تومەندەتۋگە باعىتتالعان وزگە دە ءىس-شارالار قابىلداۋ بولىپ تابىلادى. ەڭ نەگىزگىسى, دارىلىك قۇرالدارعا باعانى تۇراقتى ۇستاپ تۇرۋ شارالارى دەنساۋلىق ساقتاۋ مينيسترلىگىنىڭ باقىلاۋىندا بولادى.
امبۋلاتوريالىق جانە ستاتسيونارلىق دەڭگەيدە ەمدەۋدى ەسكەرە كەلە, تەگىن دارىمەن قامتاماسىز ەتىلەتىن ءدارى-دارمەكتەر ءتىزىمى جاڭارتىلعان. 2014 جىلدىڭ 1 قاڭتارىنان باستاپ حالىقتىڭ الەۋمەتتىك جاعىنان از قورعالعان توپتارىنا (18 جاسقا تولماعان بالالار, جۇكتى انالار, ۇلى وتان سوعىسى ارداگەرلەرى, مۇگەدەكتەر, «التىن القا», «كۇمىس القا» يەگەرلەرى, الەۋمەتتىك كومەك الۋشىلار, ءارتۇرلى جاستاعى زەينەتكەرلەر) جەكەلەنگەن اۋرۋلار بويىنشا (ارتەريالىق گيپەرتەنزيا, جۇرەك اۋرۋى, جۇرەك كەمىستىگى) قوسىمشا تەراپيا بەكىتىلگەن. بۇعان دەيىن ولارعا 50 پايىز جەڭىلدىكپەن ساتىلىپ كەلگەن دارىلەر 2012 جىلدان باستاپ تەگىن بەرىلەتىن بولعانىن دا ەسكە سالدى. وسى ماقساتتا 2013 جىلى 3,8 ملرد.-تان ارتىق, 2014 جىلى 4,1 ملرد.-تان استام تەڭگە جۇمسالماق.
تەگىن مەديتسينالىق كومەكتىڭ كەپىلدىك كولەمى شەڭبەرىندە امبۋلاتوريالىق دەڭگەيدە دارىلىك پرەپاراتتارمەن ۋاقىتىندا قامتاماسىز ەتۋگە بايلانىستى ماسەلەلەردى شەشۋ ماقساتىندا ساتىپ الۋ ەرەجەلەرىنە وزگەرتۋلەر ەنگىزىلگەن. ۆيتسە-ءمينيسترى ەرىك ءبايجۇنىسوۆ ەلىمىزدەگى 11 149 ءدارىحانا مەن فارماتسەۆتيكالىق نىسانداردى تۇگەلدەي باقىلاۋعا الۋدىڭ قيىندىق تۋدىرىپ وتىرعانىن ەسكە سالىپ, ەگەر قاي جەردە بولعانىنا قاراماستان ءدارىحانالاردىڭ قىمباتتاۋعا جول بەرىپ وتىرعانىن بىلگەن ازاماتتار مينيسترلىك تاراپىنان قۇرىلعان ارناۋلى ورىندارداعى تەلەفونعا حابارلاسسا, وعان دەر كەزىندە شارا قولدانىلاتىنىن جەتكىزدى.
بەرىك سادىر,
«ەگەمەن قازاقستان».