تەڭگەنىڭ باعامى وزگەرۋىنە بايلانىستى قاراپايىم حالىقتىڭ العاشقىدا ابىرجىپ قالعانى شىندىق. وندايدا تۇتىنۋشىلارعا كوممۋنالدىق قىزمەت كورسەتەتىن كاسىپورىنداردىڭ بىردەن ەسكە ءتۇسەتىنى دە بەلگىلى. الايدا, قوبالجيتىنداي ەشتەڭە جوق. ۇكىمەت باعانىڭ ەرىكسىز ءوسۋىنە جول بەرمەۋدىڭ بارلىق ءمۇمكىندىكتەرىن قاراستىرۋدا. ءبىزدىڭ مەكەمە تۇتىنۋشىلارعا ەلەكتر قۋاتىن جەتكىزۋمەن اينالىسادى. ءبىز ءوز تاراپىمىزدان اقش دوللارىنىڭ تەڭگەگە شاققانداعى باعامىنىڭ كوتەرىلۋىنەن ءبىزدىڭ جۇمىسىمىزعا ەشقانداي اسەر بولمايتىنىن جەتكىزگىمىز كەلەدى. ەلەكتر قۋاتىن جەتكىزۋ بۇرىنعى 3,85 تەڭگە شاماسىندا ۇستالادى. بۇعان بولا ەشبىر الاڭداۋشىلىق بولماۋى ءتيىس. بۇل باعا ۇستىمىزدەگى جىلدىڭ اياعىنا دەيىن بەكىتىلىپ كەتتى. ەندى ونى ەشكىم دە وزگەرتە المايدى.
ال, مەكەمەنىڭ جوسپارلى جۇمىستارىنا كەلسەك, ولار دا ۋاقتىلى اتقارىلاتىن بولادى. بيىلعى جىلى تۇسكەن پايدادان ينۆەستيتسيالىق باعدارلامالاردى جۇزەگە اسىرۋعا 867900 مىڭ تەڭگە قارالدى. بۇعان كاسىپورىننىڭ قوندىرعىلارى جاڭارتىلادى, قايتا جاراقتاندىرىلادى. سونداي-اق, ءۇستىمىزدەگى جىلى 283300 مىڭ تەڭگەگە كۇردەلى جوندەۋ جۇمىستارى جۇرگىزىلەدى. شىنىن ايتقاندا, كوپتەگەن ماتەريالداردى ەلىمىزدىڭ كاسىپورىندارىنان الامىز. بىرقاتارىن رەسەيدەن الامىز. سولاردىڭ بارلىعىمەن قوندىرعىلار مەن ماتەريالداردى جەتكىزۋگە كەلىسىمشارت جاسالىپ قويىلدى. ولارعا اقش دوللارىنىڭ تەڭگەگە شاققانداعى كوتەرىلۋىنىڭ ەشقانداي دا اسەرى بولمايدى. دەگەنمەن, كەيبىر باعاداعى اۋىتقۋشىلىقتى ءوز كۇشىمىزبەن شەشۋدىڭ مۇمكىندىگى قاراستىرىلاتىنىن جاسىرۋدىڭ رەتى جوق. سولاي بولعاننىڭ وزىندە جىل اياعىنا دەيىن ءبىز جەتكىزگەن ەلەكتر قۋاتىنىڭ باعاسى قىمباتتامايدى. كەيبىرەۋلەردىڭ الىپقاشتى سوزدەرىنىڭ نەگىزى جوق. باعا ءتاريفى وزگەرمەيدى, جوسپارلى جۇمىستار ۋاقتىلى جۇرگىزىلەدى. ءبىر سوزبەن ايتقاندا, مەكەمەدەگى قالىپتى جۇمىس ىرعاعى بۇزىلمايدى.
مارات امانعاليەۆ,
«ەنەرگوسيستەما» جشس باس ينجەنەرى.
اقتوبە وبلىسى.