الەمدىك قارجى رىنوگىندا دوللار باعامىنىڭ تومەندەۋى اقش ەكونوميكاسىنىڭ كوتەرىلۋىنە الىپ كەلدى. دوللارعا قاراعاندا باسقا ۇلتتىق ۆاليۋتالار باعامىنىڭ كوتەرىلۋى كوپتەگەن ەلدەردىڭ ەكونوميكاسىنا كەرى اسەرىن تيگىزە باستادى. وسىدان كەلىپ, سوڭعى ۋاقىتتا 22 دامۋشى ەلدىڭ ۇلتتىق ۆاليۋتالارى السىرەدى. الەمدىك ەكونوميكاعا بارىنشا ينتەگراتسيالانعان قازاقستان بۇل جاعدايدان سىرت قالا المادى. وسىعان بايلانىستى قارجى رەتتەۋشىسى رەتىندە ۇلتتىق بانك تەڭگە باعامىن وزگەرتۋ تۋرالى شەشىم قابىلدادى. ەل ەكونوميكاسى ءۇشىن, وتاندىق تاۋار وندىرۋشىلەر ءۇشىن بۇل وتە ءتيىمدى قولداۋ بولىپ تابىلادى. «الز» جشس وسى جاعدايعا بايلانىستى وزىنە قاتىستى 2-باسىمدىقتى ەرەكشە اتاپ وتەدى. بىرىنشىدەن, ءبىزدىڭ سەرىكتەستىكتىڭ نەسيەلىك مىندەتتەمەلەرىنىڭ ءبارى ۇلتتىق ۆاليۋتاعا نەگىزدەلگەن. ءبىز دوللار باعامىنىڭ اۋىتقۋىنا تاۋەلدى ەمەسپىز. سونىمەن قاتار, ەكسپورتقا شىعاراتىن ونىمدەرىمىزدەن تۇسەتىن كىرىس اقش دوللارى ەسەبىنەن بولادى.
ەكىنشىدەن, ءبىز تابىسىمىزدىڭ 90 پايىزىنا جۋىعىن ەكسپورتقا شىعاراتىن بولات بۇيىمدارىمىزدىڭ ەسەبىنەن الامىز. سورتتى جانە قالىپتى پروكاتتاردى ءبىز سوڭعى ۋاقىتتا ىشكى رىنوكقا دا كوپتەپ شىعارا باستادىق. مىنە, ناق وسى ىشكى رىنوكتا ءبىزدىڭ ونىمدەرىمىز يمپورتتىق ونىمدەرمەن باسەكەلەستىككە تۇسە الماي قالدى. سەبەبى, يمپورتتىق ارزان ونىمدەر ءبىزدىڭ شىعارعان ونىمدەرىمىزدىڭ وزىندىك قۇنىنىڭ قىمباتتاۋىنا ىقپال ەتتى. تەڭگە باعامىنىڭ وزگەرۋىنە بايلانىستى ەندى «الز» جشس شىعاراتىن بولات پروكاتتار ىشكى رىنوكتا يمپورتتىق ونىمدەرگە قاراعاندا باسەكەگە قابىلەتتى بولادى. تەڭگە باعامىنىڭ وزگەرۋىنە بايلانىستى يمپورتتىق ونىمدەردىڭ باعاسى قىمباتتاپ, ولاردىڭ وتاندىق رىنوكقا كوپتەپ كەلۋىنە توسقاۋىل قويىلادى. بۇل وتاندىق تاۋار وندىرۋشىلەردى قورعاۋدىڭ ەڭ ءتيىمدى جولى بولماق.
وسى رەتتە ايتا كەتەتىن ەرەكشە ماسەلە, ۇكىمەت الەۋمەتتىك ماڭىزى بار تاۋارلاردىڭ قىمباتتاماۋىنا بارىنشا باقىلاۋ جاساۋى كەرەك. بۇل رەتتە ءوزىمىزدىڭ ەلىمىزدە وندىرىلەتىن ەنەرگەتيكالىق قۋات كوزدەرىنىڭ باعاسىن تۇراقتاندىرۋدىڭ ماڭىزى ەرەكشە. ەگەر گاز, جىلۋ جانە ەلەكتر قۋاتىنىڭ باعاسى تۇراقتى بولاتىن بولسا, وتاندىق تاۋار وندىرۋشىلەر ەشقانداي قوسىمشا شىعىنعا ۇشىرامايدى. ءوز كەزەگىندە ولار وندىرەتىن تاۋارلارىنىڭ باعاسىن قىمباتتاتپايدى. سوندىقتان ىشكى رىنوكتا الىپساتارلىققا جول بەرمەۋ باستى مىندەت بولىپ تابىلادى.
ساۋلە بايمۇحامبەتوۆا,
«الز» جشس-ءنىڭ قارجى ديرەكتورى.