كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆتىڭ توراعالىعىمەن رۇقسات بەرۋ جۇيەسىن جەتىلدىرۋ ماسەلەلەرى جونىندەگى ۆەدومستۆوارالىق كوميسسيانىڭ ون ءبىرىنشى وتىرىسى ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
وتىرىستا بيزنەستىڭ دامۋىنا كەدەرگى كەلتىرەتىن نورمالاردى جويۋ تۇرعىسىندا زاڭنامالارعا رەۆيزيا جاساۋ ماسەلەلەرى قارالدى. مەملەكەت باسشىسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىندا وسىنداي تاپسىرما بەرگەن بولاتىن.
كوميسسيا وتىرىسىنىڭ قورىتىندىسىندا 43 زاڭنامالىق نورمالاردى جويۋ جانە قاراپايىمداندىرۋ تۋرالى شەشىم قابىلداندى.
اتاپ ايتقاندا, اكىمشىلىك قۇقىق بۇزۋشىلىقتار تۋرالى كودەكسكە رۇقساتتار بەرۋ مەرزىمىن بۇرمالاعانى جانە ولاردى بەرۋدەن نەگىزسىز باس تارتقانى ءۇشىن شەنەۋنىكتەردىڭ جاۋاپكەرشىلىگىن بەلگىلەيتىن تۇزەتۋ قاراستىرىلۋدا.
جەر كودەكسىندە ەلدى مەكەندەر شەڭبەرىندە قۇرىلىس سالۋعا جەر تەلىمدەرىن الۋ پروتسەدۋراسى جەڭىلدەتىلەدى, «ءبىر تەرەزە» قاعيداتى ەنگىزىلەدى, قۇجاتتاردى بەرۋ مەرزىمى قىسقارادى.
ونىڭ سىرتىندا سالىق كودەكسىندە الكوگولدى ونىمدەر جانە ججم ساتۋ سالاسىنداعى قىزمەتتى جۇزەگە اسىراتىن كاسىپكەرلەردى باقىلاۋ-كاسسالىق ماشينا ورناتۋعا مىندەتتەيتىن مەرزىم 2014 جىلدىڭ 1 شىلدەسىنەن 2015 جىلدىڭ 1 شىلدەسىنە دەيىن ۇزارتىلاتىن بولدى.