ۇلتتىق ۆاليۋتانىڭ 20 پايىز مولشەرىندەگى باعام وزگەرىسى جونىندەگى شەشىمگە اركىم ءارتۇرلى پىكىر ايتىپ جاتىر. ءبىر توپ حالىقتىڭ قالتاسى ورتاياتىن بولدى دەسە, ەكىنشى توپ ءونىمىن ەكسپورتتاۋشىلاردىڭ باعى جاندى دەپ جاتىر. ول سوزدەردىڭ قاي-قايسىسى دا قيسىندى. دەسەك تە بۇل جولى اۋىلدارىمىزداعى ازىق-ت ۇلىك ءوندىرىپ, ەكسپورتتاۋشىلارعا اقشا تۇسەدى دەگەن ۇمىتتەمىز. ەسكەرتە كەتەيىك, بۇدان ءبىر-ەكى جىل بۇرىن ەلباسىمىز قازاقستاننىڭ ەت ەكسپورتتاۋ مۇمكىندىگىن ارتتىرۋ جونىندە سالا قىزمەتكەرلەرىنىڭ الدىنا ۇلكەن مىندەت جۇكتەگەن. مىنە, سول مىندەتتى ورىنداۋ جولىندا بيىل ناقتى قادام جاسالاتىندىعىن ۇكىمەتتىڭ سوڭعى مالىمدەمەلەرىنەن ەستىپ-بىلدىك. بيىلعى جىلى شامامەن 60 مىڭ تونناداي ەت ەكسپورتتايدى ەكەنبىز. مىنە, وسى ەت ەلگە ۆاليۋتا تۇسىرەدى ەمەس پە؟ ارينە, ول دوللار كۇيىندە بولماق. ەندى سول سىرتقا ەت ساتقاننان تۇسەتىن ءار 100 دوللاردان اۋىلدارىمىزداعى ەت ءوندىرۋشى اعايىننىڭ قالتاسىنا 3000 تەڭگە تۇسەدى ەكەن. ءار تايىنشادان 30 مىڭ تەڭگە ارتىق تۇسەدى. بۇل از اقشا ەمەس. ەگەر اۋىل شارۋاشىلىعى مينيسترلىگى مەن جەرگىلىكتى اكىمدىكتەر بىرلەسىپ جۇمىس ىستەسە, وندا ەلىمىزدىڭ استىق ەمەس ەت ەكسپورتتاۋ مۇمكىندىگىن ارتتىرا وتىرىپ, اۋىلدارىمىزدى جاقسارتىپ الامىز.
كەيدە ءىستى ءاپ-ادەمى باستاپ, ونىڭ ناتيجەسىن ەسەپتەي كەلگەندە جەر شۇقىلاپ قالاتىنىمىز بار. بايقاۋىمشا, بۇل جولى بۇعان دەيىن بولعان سونداي كەمشىلىك ورىن المايتىن سەكىلدى. ولاي دەيتىن سەبەبىم, ۇكىمەت باسشىسىنىڭ ءوزى ايماق اكىمدەرىمەن سەلەكتورلىق جينالىس وتكىزگەندە جانار-جاعارماي باعاسىنىڭ وسپەۋىن تالاپ ەتتى. ول – ول ما, سەرىك احمەتوۆ باعام وزگەرىسى ەنگەن العاشقى كۇندە «كۇدىكتى» نىسانداردا بولىپ, جاعدايدى ءوزى باقىلاپ شىقتى. بۇل ەندى ناعىز شارۋاقورلىق پەن مەملەكەتشىلدىكتىڭ كورىنىسى. مىنە, وسىنداي قىراعىلىق ناۋقاندىق ءىس بولىپ قالماۋى كەرەك. ەگەر ءبىز جانار-جاعارمايدىڭ باعاسى كەشەگە دەيىنگى دەڭگەيىنەن وسپەۋىن قامتاماسىز ەتە الساق, وندا ءسوز جوق, 11 اقپان كۇنگى باعام وزگەرىسى قازاقستاننىڭ ەكونوميكاسىن العا جىلجىتاتىن يگىلىك بولىپ شىعادى. ال ەگەر مۇناي ونىمدەرىنىڭ باعاسىن كۇرت وسىرۋگە جول بەرسەك, وندا ەڭبەكتىڭ زايا كەتكەنى. ويتكەنى باعام وزگەرىسى ءونىمنىڭ وزىندىك قۇنىن سىرتقى باسەكەگە قابىلەتتى ەتۋ ءۇشىن جاسالدى ەمەس پە؟! ال جانارماي باعاسى وسسە سول ءۇمىتىمىز شايقالادى. اتقارۋشى بيلىكتىڭ ايماقتاعى وكىلدەرى وسى ماسەلەگە قىراعى بولعانى ءجون. بالكىم, ۇكىمەت مۇناي ءوندىرىپ, ەكسپورتتاۋدان مول پايداعا كەنەلەتىن وتاندىق جانە شەتەلدىك ينۆەستورلاردى ىشكى رىنوكتى ارزان مۇنايمەن قامتاماسىز ەتەتىندەي ءبىر قاۋلى قابىلدار؟ قايتكەن كۇندە دە ەنەرگيا كوزىنىڭ باعاسى وسپەۋى ءتيىس.
ساعىندىق ساتىبالدين,
ەكونوميكا عىلىمدارىنىڭ دوكتورى,
ۇعا اكادەميگى, ءال-فارابي اتىنداعى
قازۇۋ پروفەسسورى.