ENRس توبىنىڭ قۇرامىنا كىرەتىن كاسىپورىندا اۋلەتىمەن بولات بالقىتۋشى بولىپ كەلە جاتقان بايمولديندەردىڭ بۇگىنگى ۇرپاعىمەن تانىسۋدىڭ ءساتى ءتۇستى. سونىڭ ءبىرى – وسى زاۋىتتا 29 جىل جۇمىس جاساپ, №1 پەشتىڭ ايتۋلى بالقىتۋشىسىنا اينالعان, جۇمىسشىدان بريگاديردىڭ دارەجەسىنە كوتەرىلگەن مارات بايمولدين. ءوزى ەلۋگە كەلىپ قالدىم دەگەنمەن, ەڭبەك شىنىقتىرعان ازامات قاجىرلى, ءسوزى بايسالدى.
– ءوزىم قالادا ءوستىم, – دەپ باستادى اڭگىمەسىن مارات, – اقتوبەنىڭ مادەني اعارتۋ ۋچيليششەسىن ءبىتىردىم. رەجيسسەرلىك ماماندىق الدىم. سويتە تۇرا, مەن دە اكە جولىمەن بالقىتۋشى بولىپ كەتتىم. ءبىزدى «بايمولديندەر» دەسە, بۇل زاۋىتتا, ءتىپتى قارا مەتاللۋرگيا سالاسىندا ءبارى بىلەدى. ويتكەنى, وسىندا اكەم بەركىن جۇمىس ىستەدى بالقىتۋشى بولىپ. اكەمنىڭ تۋعان ءىنىسى تولەۋ بايمولدين وسى زاۋىتتىڭ ءبىرىنشى تسەحىندا بالقىتۋشى بولىپ, قازاق كسر-ىنىڭ ەڭبەك سىڭىرگەن مەتاللۋرگى اتانعان, جاڭالىق اشىپ, مەملەكەتتىك سىيلىققا يە بولعان ادام. شەشەم ءازيما, جەڭگەلەرىم ماليكا, بەيبىت زاۋىتتىڭ قويما شارۋاشىلىعىندا جۇمىس ىستەدى. قازىر اپام سارا سول سالادا جۇمىس اتقارادى. تولەۋ اعامنىڭ بالاسى مۇرات بالقىتۋشى بولىپ ءجۇر. مەنىڭ ۇلىم ەركىن دە ەڭبەك جولىن بالقىتۋشىلىقتان باستاپ, بەس جىلدان سوڭ باسقا جۇمىسقا اۋىستى. وندىرىستەن قول ۇزبەي وقىپ, كەدەننىڭ وقۋىن ءبىتىرىپ ەدى, قازىر جايساڭدا قىزمەتتە.
ماراتتىڭ اڭگىمەسىنەن تۇيگەنىمىز, بايمولديندەر اۋلەتىنىڭ ەر-ازاماتتارى تۇگەل بالقىتۋشىلىق كاسىپتى قالاعان دا, ايەلدەر جاعى قويما شارۋاشىلىقتارىندا قىزمەت اتقارىپ وتىرعان. ۋاقىت وتە كەلە, سولاردىڭ ارقايسىسى ءوز بالالارىن زاۋىتقا جۇمىسقا تارتقان. بەركىن اقساقالدىڭ وتباسىمەن قاتار, ونىڭ ءىنىسى تولەۋدىڭ دە بارلىق قارىنداستارى, اپالارى وسى جەردەن كاسىپ تاپقان.
جۇمىسشى اۋلەتىنىڭ اراسىندا ەڭبەك وتىلدەرىن قوسىپ ەسەپتەيتىن ءداستۇر بار. بايمولديندەر اۋلەتى زاۋىتتاعى ءوز جۇمىس وتىلدەرىن 570 جىل دەپ ەسەپتەيدى. زاۋىت ىسكە قوسىلعاننان كەيىن توعىزىنشى جىلى بايمولديندەردىڭ ۇلكەنى زاۋىت تابالدىرىعىن اتتاسا, سودان بەرگى كاسىپورىننىڭ الپىس جىلدان استام تاريحى بايمولديندەر اۋلەتىمەن تىكەلەي بايلانىستى. ءبىر سۇيسىنەرلىگى, ولاردىڭ قاي-قايسى دا وزدەرى ەڭبەك ەتكەن كەزدە ابىروي بيىگىندە بولعان.
مارات ءوزىنىڭ قول جەتكەن بيىگىن «بىلتىر «ەڭبەك داڭقى» مەدالىن جانە 200 مىڭ تەڭگە سىيلىق اقشا الدىم. كەڭەس كەزىندە-اق, جەتى جىل بالقىتۋشى بولىپ جۇمىس جاساعاننان كەيىن پاتەرگە قولىم جەتتى», دەپ سيپاتتايدى.
ءبىر كەزدە ونەر مەكتەبىنەن ساباق العان, نەگىزگى ماماندىعى رەجيسسەر بولعاندىقتان زاۋىت كوركەمونەرپازدارىنىڭ ۇيتقىسى ەكەن. وسىنداعى تۇراقتى ءانسامبلدىڭ مۇشەسى. كوڭىلدى تاپقىشتار كلۋبىنا قاتىسادى. مادەني-سپورتتىق شارالاردىڭ بىرىنەن قالمايدى. «بۇل كىسىسىز ءبىرىنشى تسەحتىڭ ونەر بايقاۋى وتپەيدى. جاسى ەلۋدەن اسسا دا, ءبارىنىڭ بەل ورتاسىندا جۇرەدى», دەدى ءبىر قۇربىسى ول تۋرالى.
مۇندا كەلەتىن نەگىزىنەن اقتوبەنىڭ ق.جۇبانوۆ اتىنداعى ۋنيۆەرسيتەتىنىڭ مەتاللۋرگيا فاكۋلتەتىن بىتىرگەن جاستار ەكەن. العاش وتقا جاقىنداعاندا ولاردىڭ دا ءبىرازى توزبەي, جۇمىستان شىعىپ كەتەتىن كەرىنەدى. ەندى بىرقاتارى بىرەر جىل بالقىتۋشى بولىپ, جوعارى بىلىمىنە قاراي قىزمەت بابىندا جوعارىلاپ كەتەدى ەكەن. باستاپقىدا, ولارعا دا تالىمگەرلىك كورسەتەتىن مارات سىندى تاجىريبەلى مەتاللۋرگتەر. سولاردان كەلىپ ۇيرەنىپ, زاۋىتتان ءوز ورنىن تابادى.
ءبىز اڭگىمەلەسكەن بۇگىنگى مەتاللۋرگتەر زاۋىت باسشىلىعى تاراپىنان كورسەتىلىپ وتىرعان قامقورلىققا ريزا ەكەندەرىن ءبىلدىردى. «بارلىق مۇمكىندىك بار. ءبىر مەزگىل تەگىن تاماق بەرىلەدى. ەم الۋعا جاعداي جاسالعان. ارنايى «ەۆرازيا» پروفيلاكتوريى جۇمىس ىستەيدى. جىل بويىنا ەم-دوم الۋ ءۇشىن ءار ادامعا 120 مىڭ تەڭگە قارجى اۋدارىلادى. زاۋىت جۇمىسشىلارىنىڭ بالالارىنا جازدا لاگەردە دەمالۋعا تەگىن جولداما بولىنەدى. ەڭبەك دەمالىسىمىز – 46 كۇن» دەستى.
زاۋىتتىڭ پەشتەرى سونبەيدى. سول ءبىرىنشى پەشتە اۋىسىمدىق تارتىپپەن 4 بريگادا جۇمىس ىستەيدى. اۋىسىمدىق جۇمىس كەستەسى بويىنشا ءتۇن-كۇن رەتىمەن اۋىسىپ كەلىپ وتىرادى. جۇمىس ۇزاقتىعى – 8 ساعات. اراسىندا ءبىر كۇن دەمالىس, قالعان ۋاقىتتا جۇمىس جالعاسا بەرەدى. پەشتە قۇرىش قايناپ, وت وزەندەر اعادى. سونىڭ جانىندا بۇگىندە بايمولديندەر اۋلەتىنەن ەڭبەك ءوتىلى 29 جىلدى قۇرايتىن مارات ءجۇر.
ساتىبالدى ءساۋىرباي,
«ەگەمەن قازاقستان»,
امانقوس ورىنعاليەۆ,
جۋرناليست.
اقتوبە وبلىسى.