قازاندا اۋا رايى قانداي بولادى؟

قازاندا ورتاشا اۋا تەمپەراتۋراسى ەلدىڭ كوپ بولىگىندە قالىپتى بولادى دەپ كۇتىلەدى. ماڭعىستاۋ, اتىراۋ, قىزىلوردا, باتىس قازاقستان, اقتوبە وبلىستارىنىڭ باسىم بولىگىندە, تۇركىستان وبلىسىنىڭ باتىس جارتىسىندا, قاراعاندى وبلىسىنىڭ وڭتۇستىك-باتىسىندا, قوستاناي وبلىسىنىڭ وڭتۇستىگىندە اۋا تەمپەراتۋراسى نورمادان 1 گرادۋسقا جوعارى بولادى.

«رەسپۋبليكانىڭ باسىم بولىگىندە جاۋىن-شاشىن مولشەرى نورماعا جۋىق بولادى دەپ بولجانعان. جاۋىن-شاشىن ماڭعىستاۋ, قىزىلوردا وبلىستارىندا, اتىراۋ, اقتوبە, تۇركىستان, جامبىل, الماتى وبلىستارىنىڭ باسىم بولىگىندە, قوستاناي وبلىسىنىڭ وڭتۇستىك جارتىسىندا, قاراعاندى وبلىسىنىڭ باتىسى مەن وڭتۇستىگىندە, شىعىس قازاقستان وبلىسىنىڭ وڭتۇستىك-باتىسىندا نورمادان از بولادى», دەدى «قازگيدرومەت» رمك قىزمەتكەرلەرى.

بولجامعا سايكەس, رەسەيدىڭ ەۋروپالىق اۋماعى ارقىلى وتەتىن سكانديناۆيا مەن بارەنتس تەڭىزى اۋداندارىنان سۋىق انتيتسيكلون قازاننىڭ باسىندا رەسپۋبليكانىڭ باتىس جارتىسىندا اۋا رايىن قالىپتاستىرادى.

«قازاقستاننىڭ سولتۇستىگىندە, شىعىسىندا, وڭتۇستىك-شىعىسىندا جانە ورتالىعىندا, كەرىسىنشە, باتىس جانە وڭتۇستىك تسيكلونداردىڭ جىراسىنان جانە بەلسەندى فرونتال بولىكتەردىڭ وتۋىنە بايلانىستى جاۋىن-شاشىن (جاڭبىر, قار, تۇمان جانە كوكتايعاق قۇبىلىستارى, سولتۇستىكتە جەلدىڭ كۇشەيۋى, تومەن بۇرقاسىن) بولجانادى, قازاقستاننىڭ تاۋلى اۋداندارىندا قاتتى جاۋىن-شاشىن بولۋى مۇمكىن», دەپ ءتۇسىندىردى مەتەورولوگيالىق قىزمەت وكىلدەرى.

سينوپتيكتەر مالىمەتىنشە, ايدىڭ ءبىرىنشى ونكۇندىگىندە سولتۇستىك-باتىس انتيتسيكلوننىڭ باتىس وڭىرلەرگە ءوتۋى اسەرىنەن اۋا تەمپەراتۋراسى تۇندە 1-3 گرادۋسقا دەيىن, كۇندىز +10+15 گرادۋسقا دەيىن تومەندەيدى.

ەلدىڭ وڭتۇستىك جانە وڭتۇستىك-شىعىسىندا ءبىرىنشى ونكۇندىكتىڭ ورتاسىندا تۇندە 1-3 گرادۋسقا دەيىن, كۇندىز +5+13 گرادۋسقا دەيىن سۋىتادى.

قازاننىڭ ەكىنشى جانە ءۇشىنشى ونكۇندىكتەرىندە جەكەلەگەن كۇندەرى جىلۋدىڭ قىسقا مەرزىمدى تولقىنى كۇتىلەدى, كۇندىز اۋا +13+18 گرادۋسقا دەيىن, رەسپۋبليكانىڭ وڭتۇستىك-باتىسىندا, وڭتۇستىگىندە, وڭتۇستىك-شىعىسىندا +19+25 گرادۋسقا دەيىن جىلىنادى.

قازاقستاننىڭ سولتۇستىك جارتىسىندا اۋا تەمپەراتۋراسى تۇندە-4-10 گرادۋسقا دەيىن, كۇندىز -2+3 گرادۋسقا دەيىن, وڭتۇستىك جارتىسىندا - تۇندە -5+5 گرادۋسقا دەيىن, كۇندىز +7+12 گرادۋسقا دەيىن تومەندەۋى بولجانعان.