كوروناۆيرۋس ينفەكتسياسىنا قارسى ەكپە الۋدىڭ ماڭىزدىلىعىن ءاربىر تۇرعىن سەزىنبەيىنشە, بۇل تىعىرىقتان الىپ شىعار جولدى تابۋ قيىننىڭ قيىنى بولىپ تۇر. قازىرگى ۋاقىتتا وسى ماسەلەنىڭ ءتۇيىنىن شەشۋدىڭ امالدارىن قاراستىرىپ جاتقان ارەكەتتەردىڭ بارىنە دە تۇسىنىستىكپەن قاراۋعا تۋرا كەلەدى. مىسالى, تۇرعىنداردى ۆاكتسينا الۋعا ىنتالاندىرۋ.
تاياۋدا «ارسەلورميتتال تەمىرتاۋ» كومپانياسى وسى باعىتتا يگى ءىس-شارا ۇيىمداستىرىپ, ۆاكتسينا سالدىرعان قىزمەتكەرلەر اراسىندا ەكى Lada Vesta اۆتوكولىگىن ۇتىسقا ويناتتى.
ونلاين رەجىمىندە بولات جانە كومىر دەپارتامەنتتەرىنىڭ قىزمەتكەرلەرى اراسىندا وتكەن ۇتىس ويىنىندا جەڭىمپازدار كەزدەيسوق ساندار گەنەراتورىنىڭ كومەگىمەن انىقتالدى. ويىننىڭ اشىقتىعىن قامتاماسىز ەتۋ ماقساتىندا باقىلاۋشىلار رەتىندە كاسىپوداق وكىلدەرى مەن قىزمەتكەرلەرى, سونداي-اق جۋرناليستەر مەن بلوگەرلەر قاتىستى.
ۇتىس ويىنىنىڭ قورىتىندىسى بويىنشا, مەتاللۋرگيا زاۋىتىنداعى كونۆەرتورلىق تسەحتىڭ دانەكەرلەۋشى-جوندەۋشىسى نۇرحان سماعۇلوۆ پەن ءتۇسىپ كۇزەمباەۆ اتىنداعى شاحتانىڭ جەلدەتۋ جانە قاۋىپسىزدىك تەحنيكاسى ۋچاسكەسىنىڭ جەراستى ەلەكتر سلەسارى تالعات شاۋعىمبەكوۆ جەڭىمپاز دەپ تانىلىپ, سۋ جاڭا تەمىر تۇلپارلاردى تاقىمعا باستى.
ۇتىس يەگەرىنىڭ ءبىرى نۇرحان سماعۇلوۆتىڭ كومپانيادا جۇمىس ىستەپ جۇرگەنىنە ءبىر جىل دا بولماعان. جولى بولعىش جۇمىسشى اۆتوكولىك ۇتقانىن تۇنگى اۋىسىمنان كەلگەن بەتتە تسەحتاعى ارىپتەستەرىنەن ەستىپتى.
ال ەكىنشى ۇتىسكەر تالعات شاۋعىمبەكوۆ بولسا, ويىن ونلاين ءوتىپ جاتقاندا جەر استىنداعى جۇمىس ناريادىن ورىنداپ ءجۇرىپتى. اۆتوموبيلگە يە بولعانىن جەر ۇستىنە كوتەرىلگەندە ءبىر-اق ەستىگەن.
تەمىر تۇلپارلاردان بولەك, ونلاين ۇتىس كەزىندە تۇرمىستىق تەحنيكانى ساتىپ الۋعا ارقايسىسىنىڭ نومينالى 50 مىڭ تەڭگە بولاتىن 20 سەرتيفيكات تا ويناتىلدى.
بۇل يگى جوبا الداعى ۋاقىتتا دا جالعاسىن تاباتىنىن ايتادى ۇيىمداستىرۋشىلار. مىسالى, 14 قازان كۇنى تەمىر كەنى دەپارتامەنتى مەن ەنشىلەس كاسىپورىندار قىزمەتكەرلەرى اراسىندا تاعى دا اۆتوكولىكتەر ويناتىلماقشى.
قاراعاندى وبلىسى