تۇرسىنعازىنىڭ ەسكىرمەيتىن اندەرى

اباي, مۇحتار, شاكارىم سەكىلدى ۇلىلار تۋعان توپىراقتا وسكەن دارىندى ونەرپازدىڭ قازاق ءان ونەرىندە الار ءوز ورنى بار. ارداقتى ازاماتتىڭ ءوزى ونەر جولىندا ءتالىمىن كورگەن ء«ۇش ۇستازى» تۋرالى: «مەن جۇسىپبەك ەلەبەكوۆتىڭ شاكىرتى بولعانىما باقىتتىمىن. ول كىسى ۇنەمى: «سەن سازگەرلىكپەن اينالىساسىڭ» دەپ ايتاتىن, سول كىسىنىڭ كورەگەندىگى مە, مەن ون جىلدان كەيىن ءان شىعارا باستادىم. ەكىنشى ۇستازىم, رەجيسسەر ەسمۇحان وباەۆ: «سەنى اسىرايتىن قارا دومبىراڭ» دەيتىن, ول ماعان تالاي ءرول بەرىپ ساحناعا شىعاردى. ءۇشىنشى ۇستازىم – كومپوزيتور تەمىرجان بازارباەۆ. 1979 جىلى العاش ءانىم ء«سابي بولعىم كەلەدىنى» جازعاندا اق باتاسىن بەرىپ, كوپ تاربيەلەگەن تالىمگەرىم ەدى...» دەپ ايتقان ەكەن.

تۇرسىنعازى اعامىز اقيىق اقىن مۇقاعالي ماقاتاەۆتىڭ ءبىراز ولەڭدەرىنە ءان جازدى, سونىڭ ىشىندە ەلگە كەڭىرەك تانىلعان ء«سابي بولعىم كەلەدى», «دا­ريعا, دومبىرامدى بەرشى ماعان», «قا­زاعىم-اي», «اياگوز ارۋ», «وتىزدان اسىپ بارامىن», «مەن سەنى ساعىنعاندا», «ساناۋلى كۇن», «نەنى اڭسايمىن» دەگەن تۋىندىلارىن ەرەكشە ايتۋعا بولادى. كومپوزيتوردىڭ ء«سابي بولعىم كەلەدى» دەگەن اتپەن اندەر جيناعى دا جارىق كورگەن.

ايتا كەتەيىك, تالانتتى تۇلعانى ەسكە الۋعا ارنالعان جىپ-جىلى اسەرگە تو­لى ءان كەشىن ەلوردالىق فيلارمونيا سە­مەي قالاسى اكىمدىگىنىڭ قولداۋىمەن بىرگە ۇيىم­داستىردى. كونتسەرت بارىسىندا اتالعان ونەر مەكەمەسىنىڭ «حالىق ءانى» ءبولىمىنىڭ انشىلەرى − قازاقستاننىڭ ەڭبەك سىڭىرگەن قايراتكەرلەرى گۇلزيرا بوكەيحان, ايگۇل قوسانوۆا, گۇلميرا سارينا, مادەنيەت سالاسىنىڭ ۇزدىكتەرى سەكەن سىزدىقوۆ, نۇراي تاناباەۆ, بەرىك وماروۆ, حالىقارالىق جانە رەس­پۋب­ليكالىق بايقاۋلاردىڭ لاۋرەاتتارى دانيار مۇقان, پەريزات تۇراروۆا, ساۋلەجان تاعزيا, وزگەرىس شەرىكباي, وسى ءبولىمنىڭ كوركەمدىك جەتەكشىسى – تەلمان نۇركەنوۆ, فيلارمونيانىڭ «شالقىما» حالىق بي ءانسامبلى, «سارىارقا» فول­كلورلىق ءانسامبلى ونەر كورسەتىپ, كەشتىڭ كورىگىن قىزدىردى.

ال قازاقستاننىڭ ەڭبەك سىڭىرگەن قاي­راتكەرلەرى رامازان ستامعازيەۆ, ەركىن شۇكىمانوۆ, كلارا تولەنباەۆا, تولعانباي سەمباەۆ, ناريمان ابدراحمانوۆ كەشكە قوناق رەتىندە قاتىسىپ, سازدى ناقىشقا تولى اندەرىمەن تىڭدارماندارىنىڭ قۇلاق قۇرىشىن قاندىردى.