وتكەن جۇمادا ورتالىق تەلەكوممۋنيكاتسيالار قىزمەتى الاڭىندا قىزىلوردا وبلىسىندا ىندەتتىڭ تارالۋىن بولدىرماۋ باعىتىندا جاسالىپ جاتقان جۇمىستار بارىسى ايتىلدى. بريفينگكە وبلىس اكىمىنىڭ ورىنباسارى بالجان شامەنوۆا, وبلىستىق سانيتارلىق-ەپيدەميالوگيالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا مەن دەنساۋلىق ساقتاۋ باسقارماسى باسشىسىنىڭ ورىنباسارى جالعاسبەك ۇسەنوۆ قاتىستى.
وبلىس اكىمىنىڭ ورىنباسارى وڭىردە ىندەت جۇقتىرعان 17 247 ادام تىركەلسە, ونىڭ 91 پايىزى ايىعىپ شىققانىن اتاپ ءوتتى. بىلتىر باستالعان ىندەتتىڭ بيىل ءورشي تۇسكەنى بايقالىپ وتىر. مىسالى, وتكەن جىلى كوروناۆيرۋس ينفەكتسياسىن 3 392 تۇرعىن جۇقتىرسا, بيىل جىل باسىنان تىركەلگەن ناۋقاستار سانى 13 855-كە جەتكەن. اسىرەسە, شىلدە, تامىز ايلارىندا بويىنان ىندەت بەلگىسى بايقالعاندار قاتارى ارتتى. پنەۆمونيامەن اۋىرعان 2 266 ناۋقاستىڭ 2 048-ءى ايىعىپ شىققان. وتكەن 2 ايدا وكپەسى قىسىلعاندار دا كۇرت كوبەيىپتى.
– وبلىستا قازىر 1 160 ينفەكتسيالىق توسەكتىك ورىنداعى جۇكتەمە 30 پايىز بولىپ وتىر. ايتقان جەردەن اۋلاق, دەگەنمەن ەپيدەميالىق احۋال ۋشىعا قالعان جاعدايدا ينفەكتسيالىق جانە پروۆيزورلىق ستاتسيونارلاردا ورىن سانىن 3 200-گە دەيىن ۇلعايتۋعا مۇمكىندىك بار. بيىل قۇرىلىسى بىلتىر باستالعان مودۋلدىك ستاتسيونار ىسكە قوسىلىپ, ناۋقاستارعا جاعداي جاساۋ, ولاردىڭ ساۋلىعىن باقىلاۋ جاقسارا ءتۇستى, – دەدى وبلىس اكىمىنىڭ ورىنباسارى.
بالجان مورالىقىزى ىندەتتى بولدىرماۋ شارالارى اياسىندا ءدارى-دارمەك قورىن قالىپتاستىرۋعا باسا ءمان بەرىلىپ وتىرعانىنا دا توقتالدى. ءدال قازىر وڭىردە 2 ايلىق قور بار. بۇل ءۇشىن جەرگىلىكتى بيۋدجەتتەن 488 ملن تەڭگە بولىنگەن. باسقا دا قاجەتتى قۇرال-جابدىقتار تاپشىلىعى بايقالىپ تۇرعان جوق. مامان كادرلار دا جەتكىلىكتى.
وبلىستا ۇجىمدىق يممۋنيتەتتى قالىپتاستىرۋ ماقساتىندا ەكپە الۋعا قابىلەتتى 401 مىڭ تۇرعىننىڭ 291 237-ءسى ەكپەنىڭ 1 كومپونەنتىن الدى. ەكپەنىڭ ەكىنشى بولىگىن سالۋ دا كەستەگە سايكەس جۇرگىزىلۋدە. وڭىردە 106 ەگۋ كابينەتى تۇراقتى جۇمىس ىستەپ تۇر. 167 مونيتورينگتىك توپ اي باسىنان بەرى 524 نىسانعا تەكسەرىس جۇرگىزىپ, كارانتين تالاپتارىن بۇزۋدىڭ 65 دەرەگى انىقتالدى.
بريفينگتە ناۋقاستارعا مەديتسينالىق قىزمەت كورسەتۋ, جالعان ۆاكتسينا پاسپورتىن جاساتۋ, ىندەت سالدارىنان كوز جۇمعاندار سانى تۋرالى ساۋالدار قويىلدى. وبلىس اكىمى ورىنباسارىنىڭ ايتۋىنشا, جىل باسىنان بەرى 451 ادام كوروناۆيرۋس پەن پنەۆمونيادان قايتىس بولعان.
– بۇرىننان قانت ديابەتى مەن گيپەرتونياعا شالدىققان جاسى ۇلكەن كىسىلەرگە بۇل دەرت وڭاي ءتيىپ وتىرعان جوق. وسىعان بايلانىستى قازىر جاسى ۇلعايعان تۇرعىندار اراسىندا ۆاكتسينانىڭ پايداسى جايلى ۇگىت-ناسيحات جۇمىستارى جۇرگىزىلىپ جاتىر, – دەدى ايماق باسشىسىنىڭ ورىنباسارى.
بالجان شامەنوۆا جالعان ۆاكتسينا پاسپورتىن بەرۋى مۇمكىن دەگەن ەكى ەمحانادا تەكسەرۋ جۇمىستارى جۇرگىزىلىپ جاتقانىن دا ايتىپ ءوتتى.
قىزىلوردا وبلىسى