قر سىبايلاس جەمقورلىققا قارسى ءىس-قيمىل اگەنتتىگى مەن قر قارجى مونيتورينگى اگەنتتىگى اراسىندا ىنتىماقتاستىق تۋرالى مەموراندۋم جاسالدى, دەپ جازادى Egemen.kz.
قول قويۋ ءراسىمى بارىسىندا سىبايلاس جەمقورلىققا قارسى قىزمەتتىڭ باسشىسى م.احمەتجانوۆ مەموراندۋمنىڭ مەملەكەت باسشىسىنىڭ قىلمىستىق جولمەن تابىلعان اكتيۆتەردى ىزدەۋگە قاتىستى تىكەلەي تاپسىرماسى – follow the money قاعيداتى اياسىندا ازىرلەنگەنىن اتاپ ءوتتى.
ۆەدومستۆو باسشىسىنىڭ ايتۋىنشا, ەكى جاقتى بىرلەسكەن ارەكەتتەر لاۋازىمدى تۇلعالار تاراپىنان سىبايلاس جەمقورلىق پەن كولەڭكەلى بيزنەستىڭ جولى كەسىلۋىنە ىقپال ەتەدى. بىرلەسكەن قۇجات ورگانداردىڭ الدىنا قويىلعان مىندەتتەردى ورىنداۋ بويىنشا تىعىز ءوزارا ءىس-قيمىل جاسايتىن پلاتفورما بولادى دەپ كۇتىلۋدە.
م.احمەتجانوۆتىڭ پىكىرىنشە, مەموراندۋم ەكى مەملەكەتتىك ورگاننىڭ سىبايلاس جەمقورلىققا جانە كولەڭكەلى ەكونوميكاعا قارسى ءىس-قيمىل سالاسىنداعى مەملەكەتتىك ساياساتتى ىسكە اسىرۋداعى ءوزارا ارەكەت, سونداي-اق سىبايلاس جەمقورلىق پەن ەكونوميكالىق قۇقىق بۇزۋشىلىقتاردىڭ الدىن الۋعا, انىقتاۋعا, جولىن كەسۋگە, اشۋعا جانە تەرگەپ-تەكسەرۋدە وڭ ناتيجە بەرمەك.
مەموراندۋم اياسىندا سىبايلاس جەمقورلىققا جانە كولەڭكەلى ەكونوميكاعا قارسى بىرلەسكەن ءىس-شارالار, الدىن الۋلار جۇرگىزىلمەك. ەكى مەملەكەتتىك ورگان جۇمىس تاجىريبەسىمەن جانە قىلمىستىڭ جاي-كۇيى, سىبايلاس جەمقورلىق جانە ەكونوميكالىق قىلمىستاردى اشۋ جانە تەرگەۋ ادىستەرى مەن تاسىلدەرى تۋرالى اقپارات الماسىپ وتىرادى.