پرەمەر-ءمينيستردىڭ ءبىرىنشى ورىنباسارى ءاليحان سمايىلوۆتىڭ توراعالىعىمەن Nur Otan پارتياسىنىڭ سايلاۋالدى باعدارلاماسىن ىسكە اسىرۋ جونىندەگى شتاب وتىرىسى ءوتتى, دەپ حابارلادى ۇكىمەت باسشىسىنىڭ ءباسپاسوز قىزمەتى.
شتاب وتىرىسىندا ستۋدەنتتەرگە جاتاقحانادان ورىن بەرۋ, حالىقتىڭ ءالجۋاز توپتارىنا الەۋمەتتىك كومەك كورسەتۋ, مۇمكىندىگى شەكتەۋلى جاندارعا ارنالعان ينفراقۇرىلىمدى جاقسارتۋ ماسەلەلەرى قارالدى.
تالقىلاۋعا تۇسكەن ماسەلەلەردىڭ ءبىرى 2025 جىلعا قاراي كوللەدجدەر مەن ۋنيۆەرسيتەتتەر جاتاقحانالارىنان كەمىندە 50 مىڭ جاڭا ورىندى پايدالانۋعا بەرۋ بولدى. بيىلعى 1 قىركۇيەكتەگى جاعداي بويىنشا 1924 ورىنعا ارنالعان 10 جاتاقحانا پايدالانۋعا بەرىلدى. وسى جىلدىڭ اياعىنا دەيىن 12 185 ورىندىق قوسىمشا 37 جاتاقحانانى پايدالانۋعا بەرۋ جوسپارلانىپ وتىر.
كەزدەسۋ قورىتىندىسى بويىنشا قىسقا مەرزىمدە مۇددەلى مەملەكەتتىك ورگاندارعا مەملەكەتتىك تاپسىرىستى ورنالاستىرۋ مەحانيزمىن جەتىلدىرۋگە بايلانىستى ۇسىنىستاردى قاراۋ تۋرالى بۇيرىق بەرىلدى. سونداي-اق جالعىز باستى قارت ازاماتتارعا قوسىمشا الەۋمەتتىك قولداۋ تۇرلەرى جونىندە ايتىلدى. اتاپ ايتساق, قيىن جاعدايعا تاپ بولعان جالعىزىلىكتى جاندارعا بىرجولعى ماتەريالدىق كومەك كورسەتۋ, ءدارى-دارمەكپەن قامتاماسىز ەتۋ, ساناتوري-كۋرورتتىق ەمدەلۋ, تۇرعىن ءۇيىن جوندەۋگە قول ۇشىن بەرۋ سىندى ماسەلەلەر كوتەرىلدى. ەرەكشە قاجەتتىلىكتەرى بار ادامدار ءۇشىن پاندۋستار ورناتۋ, ارنايى ليفتتەر, دارەتحانالار سالۋ جانە زاعيپ جاندارعا ارنالعان باعىتتاۋىش بەلگىلەر ورناتۋ جايى دا قوزعالدى.
بۇگىندە قوعامدىق باقىلاۋدىڭ ايماقتىق توپتارىنىڭ مونيتورينگ وبەكتىلەرى بويىنشا جۇمىسى جانداندىرىلىپ جاتىر. جيىندا مۇگەدەكتەردى جۇمىسقا ورنالاستىرۋ بويىنشا جۇرگىزىلىپ جاتقان جۇمىستار لەگى دە تالقىلاندى. ءبىرىنشى جارتىجىلدىقتىڭ قورىتىندىسى بويىنشا جۇمىسپەن قامتىلعان مۇگەدەكتەر ۇلەسى جۇمىسپەن قامتۋ ورتالىقتارىنا جۇگىنگەن ەڭبەككە جارامدى مۇگەدەكتەردىڭ 29,7%-ىن قۇرايدى.
پرەمەر-ءمينيستردىڭ ءبىرىنشى ورىنباسارى مۇگەدەكتەردى جۇمىسپەن قامتۋ ماسەلەلەرى بويىنشا قولداۋ شارالارى كەشەنىن قاراستىرۋدى (وقىتۋ, جۇمىس ورىندارىن قايتا جابدىقتاۋ, جالاقىنىڭ ءبىر بولىگىن سۋبسيديالاۋ, جۇمىسپەن قامتۋ كۆوتاسىنىڭ ساقتالۋىن باقىلاۋ) قامتاماسىز ەتۋدى جانە جۇمىسپەن قامتۋ ماسەلەسىنە ەرەكشە نازار اۋدارۋدى تاپسىردى. بۇل شارالار 2025 جىلعا دەيىن ازىرلەنگەن ۇلتتىق جۇمىسپەن قامتۋ جوباسىندا كورىنىس تابۋى ءتيىس.