قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە قازاقستان حالقى اسسامبلەياسى وكىلدەرىنىڭ, دەپۋتاتتاردىڭ, قوعام قايراتكەرلەرىنىڭ قاتىسۋىمەن ەلباسى جولداۋىندا ايتىلعان مىندەتتەر جايى تالقىلانعان بريفينگ ءوتتى.
قازاقستان پرەزيدەنتى جانىنداعى ورتالىق كوممۋنيكاتسيالار قىزمەتىندە قازاقستان حالقى اسسامبلەياسى وكىلدەرىنىڭ, دەپۋتاتتاردىڭ, قوعام قايراتكەرلەرىنىڭ قاتىسۋىمەن ەلباسى جولداۋىندا ايتىلعان مىندەتتەر جايى تالقىلانعان بريفينگ ءوتتى.
ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ: «قازاقستان حالقى اسسامبلەياسى قازاق جەرىندە مەكەندەگەن كوپتەگەن ۇلتتىڭ وكىلىنە ۇيىتقى بولىپ وتىر», دەي كەلە, ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋى بارىسىندا اسسامبلەيا مودەلىنە شىنايى قىزىعۋشىلىق تانىتىلعانىن جەتكىزدى. «مەملەكەت باسشىسى ءوزىنىڭ بيىلعى جولداۋىندا قازاقستان حالقى اسسامبلەياسى الدىنا «ماڭگىلىك ەل» پاتريوتتىق اكتىسىن ازىرلەۋ جانە قابىلداۋ ءجونىندە ناقتى تاپسىرما قويعان بولاتىن. بۇل ورايدا, پرەزيدەنت بارلىق ساياسي پارتيالاردى, قوعامدىق بىرلەستىكتەردى ءجانە بارشا قازاقستاندىقتاردى «قازاقستان-2050» ستراتەگياسىنىڭ باستى ماقساتتارىنا جەتۋ جولىنداعى جۇمىستارعا بەلسەنە ارالاسۋعا شاقىردى», دەدى.
بريفينگتە ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ەتنوسارالىق جانە دىنارالىق تولەرانتتىلىق ءجونىندەگى يۋنەسكو كافەدراسىنىڭ پروفەسسورى ءادىل احمەتوۆ: «ءبىز قازاقستان حالقى اسسامبلەياسىنىڭ ەلدىڭ بىرلىگىن, تاتۋلىعىن ۇيلەستىرىپ وتىرعان ۇلكەن, الەمدە تەڭدەسى جوق ۇيىم ەكەنىن ايتىپ وتىرۋىمىز كەرەك. جاقىندا ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە يۋنەسكو كافەدراسى اشىلدى. بۇل كافەدرانىڭ اتى دا, زاتى دا قازاقستان حالقى اسسامبلەياسىنىڭ مۇددەسىمەن ساي كەلەدى. مەن 5-6 جىل پارلامەنت سەناتىندا دەپۋتات بولعان كەزىمدە اسسامبلەيا جۇمىسىنا ءجيى قاتىسىپ ءجۇردىم. ەقىۇ توراعاسىنىڭ جەكە ۋاكىلى بولىپ, وسى ۇيىمعا كىرەتىن 57 مەملەكەتتىڭ تەڭ جارتىسىن ارالاپ شىقتىم. سول كەزدە كوڭىلگە ۇيالاعان, ماقتانىشپەن ايتاتىن ءبىر ماسەلە – ءبىزدىڭ ەلىمىزدەگى تۇراقتىلىقتىڭ, قوعامدىق كەلىسىمنىڭ ىرگەتاسى, ۇلتتىق ساياساتتىڭ ىرگەتاسى – قازاقستان حالقى اسسامبلەياسى», دەگەن پايىمىن جەتكىزدى.
ول قۇرىلعانىنا 20 جىلداي ۋاقىت بولعان اسسامبلەيا تۋرالى قوعامدا ءارتۇرلى پىكىرلەردىڭ تۋىنداعانىن, «ونىڭ نە كەرەگى بار» دەۋشىلەردىڭ دە كەزدەسكەنىن ايتىپ ءوتتى. «بۇل ۇلكەن ءتۇسىنىسپەۋشىلىكتەن تۋعان دۇنيە دەپ ايتار ەدىم. الايدا, قاشاندا بىتكەن ىسكە سىنشى كوپ. ەل تۇراقتىلىعى ءوز-وزىنەن بولا قويعان جوق. سونى ءتۇسىنۋ كەرەك. ءبىر ايتا كەتەرلىگى, اسسامبلەيانىڭ وتكەن جىلعى سەسسياسىندا جاريا ەتىلگەن «ءبىر حالىق – ءبىر ەل – ءبىر تاعدىر» ۇستانىمىنىڭ بيىلعى جولداۋدان دا كورىنىس تاپقانىنا كۋا بولىپ وتىرمىز.
ءبىزدىڭ حالقىمىزدىڭ كەرەمەت قۇندىلىعى بار: «التاۋ الا بولسا, اۋىزداعى كەتەدى. تورتەۋ ءتۇگەل بولسا, توبەدەگى كەلەدى». بۇل ماتەلدىڭ اياسى وتە كەڭ. وسى ءسوزدى جەكە وتباسىنا دا, تىپتەن, قازىرگى ەگەمەندىگىن العان التى تۇركى ءتىلدەس مەملەكەتتەرگە دە قاتىستى ايتسا بولادى. مۇنى 130-دان استام ۇلتتان تۇراتىن ەلىمىزگە قاتىستى ايتساق تا ارتىق ەمەس. دەمەك, الاۋىزدىق بولاتىن بولسا, ول ەلدىڭ بىرلىگى كەتەدى, بىرلىگى كەتكەن مەملەكەتتىڭ تۇتاستىعى, بەيبىتشىلىگى كەتەدى, ول مەملەكەتتىڭ دامۋى دا ءوز-وزىنەن توقتايدى. مىناداي الماعايىپ زاماندا باق بولىپ, باسىمىزعا قونعان قۇندىلىعىمىزدى ۋىسىمىزدان شىعارىپ الساق, ول ەشقاشان قايتىپ ورالمايدى. سوندىقتان دا ۇلتتىق يدەيا كەرەك. ۇلتتىق يدەيا – ول «قازاقستان-2050» ستراتەگياسى. ۇلتتىق يدەيا – ماڭگىلىك ەل بولۋ. پرەزيدەنت, مىنە, وسىنى بۇكىل حالىققا پاش ەتتى. بۇل ادامنىڭ كوكەيىنە قوناتىن دۇنيە», – دەدى ءا.احمەتوۆ.
قازاقستان پرەزيدەنتى جانىنداعى مەملەكەتتىك باسقارۋ اكادەمياسى ەتنوسارالىق جانە كونفەسسياارالىق قاتىناستار ورتالىعىنىڭ جەتەكشىسى ايگۇل ءسادۋاقاسوۆا «قازاقستان-2050» ستراتەگياسى «ماڭگىلىك ەل» پاتريوتتىق اكتىسىنە نەگىز بولاتىنىنا توقتالا كەلە, بۇل يدەيا سانداعان عاسىرلار بويى جيناقتالىپ, بۇگىنگى زامانعا دەيىن جالعاسىپ كەلە جاتقان نەگىزگى قاعيداتتاردىڭ بولۋىمەن ماڭىزدى ەكەنىن اتاپ ءوتتى. ال قازاقستان پارلامەنتى سەناتىنىڭ دەپۋتاتى, «قازاقستاننىڭ ورىس, سلاۆيان جانە كازاكتار ۇيىمى اسسوتسياتسياسى» قوعامدىق بىرلەستىگى توراعاسىنىڭ ورىنباسارى اناتولي باشماكوۆ «ماڭگىلىك ەل» ۇلتتىق يدەياسى جايلى ءوز پىكىرىن ءبىلدىردى. ول: «مەن پرەزيدەنتتىڭ بارلىق جولداۋلارىن, 10 ۇسىنىسى مەن «ماڭگىلىك ەل» يدەياسىنىڭ 7 تۇجىرىمداماسىن فورمۋلا رەتىندە, قولدانبالى جانە دۇنيەتانىمدىق قۇجات رەتىندە توپتاستىرار ەدىم», دەي كەلە, «ماڭگىلىك ەل» قازاق جەرىن مەكەندەگەن بارلىق ەتنوستار مادەنيەتىن ءوزارا تەڭ دەڭگەيدە دامىتۋدان تۋعان ىزگى يدەيا دەگەن ويىن جەتكىزدى. «دەمەك, بۇل – ءبىزدىڭ بارلىعىمىزدى جۇمىلدىرۋعا ءتيىستى ۇلتتىق يدەيا, ۇلتتىق يدەولوگيا بولۋى ءتيىس», دەدى ول بۇل رەتتە.
بريفينگتە قازاقستانداعى بولگار ەتنومادەني بىرلەستىگىنىڭ ءتوراعاسى ولەگ دىموۆ تا ءسوز الىپ, ەلباسىنىڭ جولداۋىندا ايتىلعان ماسەلەلەر مەملەكەتتى العا جىلجىتۋدا العىشارت بولا الاتىنىن جەتكىزدى.
ءلايلا ەدىلقىزى,
«ەگەمەن قازاقستان».