اقش پرەزيدەنتى باراك وباما 28 قاڭتار كۇنى كەشكىسىن كونگرەسس الدىندا «ەلدىڭ جاعدايى تۋرالى» جولداۋىن جاسادى. ءسوزى بارىسىندا ول ۇكىمەتپەن كەلىسىم جاساعان كومپانيالار قىزمەتكەرلەرىنىڭ ەڭبەكاقى دەڭگەيىن ساعاتىنا 10,1 دوللارعا دەيىن كوتەرۋ تۋرالى جارلىققا قول قويعانىن مالىمدەدى.
اقش پرەزيدەنتى كونگرەستە جولداۋىن جاسادى
اقش پرەزيدەنتى باراك وباما 28 قاڭتار كۇنى كەشكىسىن كونگرەسس الدىندا «ەلدىڭ جاعدايى تۋرالى» جولداۋىن جاسادى. ءسوزى بارىسىندا ول ۇكىمەتپەن كەلىسىم جاساعان كومپانيالار قىزمەتكەرلەرىنىڭ ەڭبەكاقى دەڭگەيىن ساعاتىنا 10,1 دوللارعا دەيىن كوتەرۋ تۋرالى جارلىققا قول قويعانىن مالىمدەدى.
«اسسوشەيتەد پرەسس» اگەنتتىگىنىڭ حابارلاۋىنشا, جارلىق 2015 جىلدىڭ باسىندا كۇشىنە ەنەدى. بۇل ورتا تاپتاعى ازاماتتاردىڭ جاعدايىن جاقسارتۋعا مۇمكىندىك بەرەدى. پرەزيدەنت ءوز جولداۋىندا, سونداي-اق, ورتا تاپ وكىلدەرىنىڭ ەڭبەك نارىعىندا باسەكەلەستىككە قابىلەتتىلىگىن ارتتىرۋ ءۇشىن ولاردى كاسىبي قايتا دايارلاۋ باعدارلاماسىن ازىرلەۋ قاجەتتىگىن دە اتاپ وتكەن. باراك وبامانىڭ اتاپ وتۋىنشە, بۇل شارالاردىڭ بارلىعى ورتا تاپتى نىعايتادى جانە ەل ەكونوميكاسىنىڭ ءوسۋ قارقىنىن جەدەلدەتەدى. سونىمەن قاتار, پرەزيدەنت جولداۋدا اقش كونگرەسى مەن فەدەرالدىق ۇكىمەت اراسىندا ءوزارا قارىم-قاتىناس ماسەلەسىنە دە ەرەكشە نازار اۋدارعان.
قىرىقتان استام ادام سۋ تاسقىنىنىڭ قۇربانى بولدى
سوڭعى اقپاراتتارعا قاراعاندا, بوليۆياداعى سۋ تاسقىنىنان 40-تان استام ادام مەرت بولىپ, 20 مىڭعا جۋىق تۇرعىن باسپاناسىز قالعان. تابيعات اپاتىنا بايلانىستى بوليۆيا بيلىگى ەلدە توتەنشە جاعداي ەنگىزدى.
قازىرگى كەزدە تابيعات اپاتى سالدارىمەن كۇرەسكە اسكەري كۇشتەر دە جۇمىلدىرىلىپ وتىر. سۋ تاسقىنىنان ەلدىڭ لا-پاس, بەني, سانتا-كرۋس جانە كوچابامبا ايماقتارى كوپ زارداپ شەككەن سياقتى. كەيبىر دەرەكتەر بويىنشا, كۋرورتتى رۋررەناباك قالاسىندا جەر كوشۋى سالدارىنان كەمىندە 10 ادام وپات بولعان. بۇل ەلدى نوسەر جاۋىن وتكەن جىلدىڭ قىركۇيەگىنەن بەرى ءجيى مازالاپ كەلەدى.
ۋكراينا شەنەۋنىكتەرىنىڭ كەلۋىنە شەكتەۋ ەنگىزدى
كانادا ۇكىمەتى ۋكراينانىڭ جوعارى لاۋازىمدى شەنەۋنىكتەرىنە ەل اۋماعىنا كەلۋگە شەكتەۋ ەنگىزدى. كوشى-قون ىستەرى جونىندەگى مينيستر كريس الەكساندردىڭ مالىمدەۋىنشە, بۇل جاڭا شارا بىردەن كۇشىنە ەنگەن.
كانادا بيلىگى بۇل شەشىمدى ۋكراينالىق بيلەۋشى ەليتا مۇشەلەرىنىڭ ەلدەگى قارسىلىق اكتسياسىنا قاتىسۋشىلارعا قارسى جاساعان ءىس-قيمىلىنا بايلانىستى دەپ تۇسىندىرەدى. «كانادا ەركىندىك پەن دەموكراتيا جولىندا ەرلىك كورسەتكەن ۋكراينا حالقىن ءالى دە قولدايدى», دەپ اتاپ ءوتىپتى ك.الەكساندر. سونىمەن قاتار, مينيستر «ءبىز وپپوزيتسيانىڭ ءۇنىن وشىرۋگە تىرىسقان بىرقاتار ۋكراينالىق شەنەۋنىكتەردىڭ كاناداعا كەلۋىنە شەكتەۋ قويىپ وتىرمىز», دەگەن كورىنەدى مالىمدەمەسىندە. بىراق, ول شەكتەۋدىڭ كىمدەرگە قويىلعانىن اتاماعان.
وسىنداي دا قىزىق وقيعا بولادى ەكەن
شۆەتسيا تۇرعىنى توماس حولمبەرگ پاتەرىن توناماق بولعان 21 جاستاعى ۇرىنى پاتەرىنە شاقىرىپ, وعان ىستىق ىقىلاس تانىتقان جانە كوفە قايناتىپ, قوناق رەتىندە كۇتىپتى.
وقيعا بىلاي بولعان ەكەن. ءتۇن ورتاسىندا جاس جىگىت حولمبەرگتىڭ پاتەرىنە بالكون ارقىلى كىرمەك بولعان. پاتەر يەسى مەن ونىڭ زايىبى تاسىر-تۇسىردان ويانىپ, بالكونعا قاراسا, وندا تۇرعان بەيتانىس ادامدى كورەدى. بالكوندى اشقان پاتەر يەسى ۇرىنى ىشكە كىرگىزەدى. ونى اس بولمەسىنە شاقىرىپ, كوفە ۇسىنادى. «ول باقىتسىز ادام كەيپىندە بولدى, – دەپ ايتادى حولمبەرگ. – توڭعان ەكەن, ءبىر جۇتىم كوفە وعان كەرەك ەكەنىن ءبىلدىم دە, پاتەر ىشىنە كىرگىزۋگە شەشىم قابىلدادىم». ونىڭ بۇل ۇسىنىسىنا ۇرى قارسى بولماپتى, كوفەنى ۇرتتاي وتىرىپ ول توناۋعا ارەكەتتەنگەنى ءۇشىن ءۇي يەسىنەن كەشىرىم سۇراعان ەكەن. ەش قارسىلىق تانىتپاي, ۇرى پوليتسيانىڭ كەلۋىن دە كۇتىپتى.
گۇلنارا كاريموۆانىڭ بيزنەس-سەرىكتەسى ۇستالدى
ماسكەۋدىڭ «شەرەمەتەۆو» اۋەجايىندا فرانتسيا ازاماتى, بيزنەسمەن ەريك كوكيني ۇستالدى. وعان وزبەكستان اۋماعىندا تۇرعان كەزىندە ەكونوميكالىق قىلمىستار جاسادى دەگەن كۇدىك كەلتىرىلىپ وتىر.
رەسەيلىك پوليتسەيلەردىڭ اقپاراتتارى بويىنشا, ە.كوكينيگە وزبەكستان تارابى مەملەكەتارالىق ىزدەۋ جاريالاعان. «فەرعانا» اگەنتتىگىنىڭ حابارلاۋىنشا, كوكيني بىرقاتار جىلدار بويى وزبەكستاندا كاسىپكەرلىكپەن بەلسەندى ارالاسقان كورىنەدى. سونىمەن بىرگە, ول تاشكەنتكە وزبەكستان پرەزيدەنتىنىڭ ۇلكەن قىزى گۇلنارا كاريموۆانىڭ بيزنەسىن قۇرۋ ءۇشىن پارفيۋمەريا بۇيىمدارىن جەتكىزۋدى ۇيىمداستىرعان دەگەن دەرەكتەر بار. ايتا كەتەيىك, سوڭعى كەزدەرى وزبەكستاندا گۇلنارا كاريموۆاعا جاقىن بىرنەشە ادام قاماۋعا الىنعان بولاتىن.
قىسقا قايىرىپ ايتقاندا:
رەسپۋبليكاشىلار پارتياسىنان سايلانعان امەريكالىق كونگرەسسمەن مايكل گريمم نيۋ-يوركتىڭ NV1 تەلەارناسىنىڭ ءتىلشىسى مايكل سكوتتان ونىڭ اتىنا قاۋىپ توندىرەتىن ءسوز ايتقانى ءۇشىن كەشىرىم سۇرادى. كونگرەسسمەن تەلەارنا تىلشىسىنە «سەنى ءبىر ساۋساعىممەن جانشىپ تاستايمىن» دەگەن كورىنەدى.
رەسەيدىڭ فەدەراتسيا كەڭەسى ەلدىڭ جوعارعى جانە جوعارى اربيتراجدىق سوتتارىن بىرىكتىرۋ تۋرالى زاڭ جوباسىن بەكىتتى. زاڭعا سايكەس رەسەيدە ەندى جوعارعى سوت قانا قىزمەت ەتەدى.
ليتۆا پرەزيدەنتى داليا گريباۋسكايتە كيەۆتەگى قاقتىعىستاردا جارالانىپ, ۆيلنيۋس قالاسىنا ەمدەلۋگە جەتكىزىلگەن ۋكراينالىقتار اراسىندا بولدى. ول «ادامدارعا قارسى جابايى كۇش قولدانۋدى ەشقاشان اقتاۋعا بولمايدى» دەسە كەرەك.
جاپونيادا ەكى اسكەري وقۋ-جاتتىعۋ ۇشاعى جاتتىعۋ كەزىندە سوقتىعىسىپ قالدى. ۇشاقتاعى ۇشقىشتار زارداپ شەككەن جوق.
ينتەرنەت ماتەريالدارى نەگىزىندە ازىرلەندى.