قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى قاجىلار قاۋىمداستىعىنىڭ وكىلدەرىن جانە قاجىلىق كومپانيا باسشىلارىن ۇلى ساپاردى تابىس كوزىنە اينالدىرماۋعا شاقىردى.
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى قاجىلار قاۋىمداستىعىنىڭ وكىلدەرىن جانە قاجىلىق كومپانيا باسشىلارىن ۇلى ساپاردى تابىس كوزىنە اينالدىرماۋعا شاقىردى.
قمدب توراعاسى ءمۇفتياتتا وتكەن باسقوسۋدا قازاقستان قاجىلارى قاۋىمداستىعىنا, فيرما جەتەكشىلەرىنە قاجىلىق ساپارىن جەتىلدىرۋ جۇمىستارىنا قاتىستى بىرنەشە ماسەلەنى شەشۋگە پارمەن بەردى. اتاپ ايتساق, بىرىنشىدەن, قاجىعا باراتىن وتانداستارىمىزدى جاپپاي ساۋاتتاندىرۋ, ولارعا اعارتۋشىلىق باعىتتا تۇسىندىرمە جۇمىستارىن جۇرگىزۋ. ەكىنشىدەن, جەرلەستەرىمىزدى ءدىني باسقارمانىڭ ءدىني ادەبيەتتەرىمەن قامتاماسىز ەتۋ. ۇشىنشىدەن, قاجىلىقتى تابىس كوزىنە اينالدىرماۋ, كەرىسىنشە, ساۋاپقا كەنەلۋدى كوزدەۋ. تورتىنشىدەن, قايىرىمدىلىق باعىتتا قارجىلىق مۇمكىندىگى شەكتەۋلى ازاماتتاردى قاجىلىققا تەگىن اپارۋ. بەسىنشىدەن, حالىق اراسىندا ۇلىق ساپاردىڭ ءمانى مەن ماڭىزىن ءتۇسىندىرۋ ءۇشىن ارنايى كەزدەسۋلەر, فيلمدەر, بەينەروليكتەر شىعارۋ.
«قاجىلىقتى ناسيحاتتاۋ جۇمىسى جاندانسا, حالقىمىز اللانىڭ ءۇيى – قاعباعا بارۋعا ىقىلاس تانىتادى. قاجىلىق – تەڭدەسسىز ساۋاپقا كەنەلەتىن ساپار. سوندىقتان بۇعان اسا جاۋاپكەرشىلىكپەن قاراۋىمىز كەرەك. يمان جولىنا تۇسە الماي جۇرگەن قانشاما باۋىرلارىمىز قاجىلىقتان كەيىن جاڭا ءومىر باستايدى. مىنەزى تۇزەلىپ, يمانى ارتادى. ءبىز وسىعان ءمان بەرۋگە ءتيىسپىز. قاجىلىق تابىس تابۋ ەمەس, ول ساۋاپقا بولەنۋ. وسىنى ويلايىق», – دەدى ەرجان قاجى مالعاجى ۇلى.
قازاقستان قاجىلارى قاۋىمداستىعىنىڭ وكىلدەرى باس ءمۇفتيدىڭ بۇل باستاماسىن قولدايتىنىن جەتكىزدى. بۇل يگى ءىس-شارالار قمدب-نىڭ قاجىلىق بولىمىمەن بىرلەسە اتقارىلاتىن بولادى.
اعابەك قونارباي ۇلى,
قمدب ءباسپاسوز حاتشىسى.