قر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ حالىقتى ۆاكتسيناتسياعا تارتۋدىڭ زاڭدىلىعى تۋرالى ايتتى, دەپ حابارلايدى Egemen.kz.
«ۆاكتسيناتسياعا, ۇتىس ويىندارى مەن سىيلىقتارعا كەلەتىن بولساق, بۇل جەردەگى تاجىريبە الەمدىك ەكەنىن كورۋگە بولادى. بارلىق جەردە, ءتىپتى ەڭ دامىعان ەلدەردە دە مۇنداي قۇرالدار ۆاكتسيناتسيالاۋعا شاقىرۋ ماقساتىندا قولدانىلادى. دەگەنمەن, قازاقستاندا ۆاكتسيناتسيا ەرىكتى بولىپ قالا بەرەدى», دەدى مارات شورانوۆ وكق بريفينگىندە.
بۇعان دەيىن م.شورانوۆ ەمحانالارداعى دارىگەرلەردىڭ جەتىسپەۋشىلىگىنە قاتىستى تۇسىنىكتەمە بەرگەن بولاتىن.
«جالپى, 2020 جىلمەن سالىستىرعاندا حالىققا جوسپارلى مەديتسينالىق كومەك كورسەتۋ جاعدايى ايتارلىقتاي تۇزەلدى. ءىس جۇزىندە بارلىق ەمحانالار, ءبىرىنشى بۋىنداعى مەديتسينالىق قىزمەتتەردى جەتكىزۋشىلەر, مەملەكەتتىك تە, جەكە دە, حالىقپەن تولىق كولەمدە جۇمىس ىستەيدى. ءيا, مۇمكىن, جەكەلەگەن جەتكىزۋشىلەردە كادرلىق ماسەلەلەر تۋىنداۋى مۇمكىن. وزدەرىڭىز بىلەتىندەي, كوپتەگەن رەسۋرستار كوروناۆيرۋستىق ينفەكتسيامەن كۇرەسۋگە تىكەلەي جىبەرىلدى. الايدا, ءبىز الەۋمەتتىك مەديتسينالىق ساقتاندىرۋ قورىمەن جۇمىس اياسىندا وڭىرلەرمەن وسى ماسەلەلەردى ۇنەمى باقىلاۋدا ۇستايمىز», دەپ اتاپ ءوتتى دەنساۋلىق ساقتاۋ مينيسترلىگىنىڭ وكىلى.