گازەتىمىزدىڭ وتكەن جىلعى 28 قاراشا كۇنگى 263-نومىرىندە «باسشىلار ەمەس, كىلەڭ مىندەتىن اتقارۋشىلار» دەپ وبلىستاعى ەرتىس اۋدانىنان ماقالا جازعان بولاتىنبىز. ماقالادا اۋداندىق اكىمدىكتەن باستاپ, بولىمدەرىندە باسشىلارى جوق, اۋداندىق ءبىلىم ءبولىمىنىڭ باسشىسى مايا باگيەنوۆا, مادەنيەت, تىلدەردى دامىتۋ, دەنەشىنىقتىرۋ جانە سپورت ءبولىمىنىڭ باسشىسى جانار دۇيسەمبينا, اۋداندىق مادەنيەت ءۇيىنىڭ ديرەكتورى ەلميرا ايمۇحانوۆا, تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى تولەش بەكپاۋوۆ, ىشكى ىستەر ءبولىمىنىڭ باسشىسى سەرىك ۇسەنوۆتەر تۇگەلىمەن مىندەتىن اتقارىپ جۇرگەندەرى ايتىلدى.
گازەتىمىزدىڭ وتكەن جىلعى 28 قاراشا كۇنگى 263-نومىرىندە «باسشىلار ەمەس, كىلەڭ مىندەتىن اتقارۋشىلار» دەپ وبلىستاعى ەرتىس اۋدانىنان ماقالا جازعان بولاتىنبىز. ماقالادا اۋداندىق اكىمدىكتەن باستاپ, بولىمدەرىندە باسشىلارى جوق, اۋداندىق ءبىلىم ءبولىمىنىڭ باسشىسى مايا باگيەنوۆا, مادەنيەت, تىلدەردى دامىتۋ, دەنەشىنىقتىرۋ جانە سپورت ءبولىمىنىڭ باسشىسى جانار دۇيسەمبينا, اۋداندىق مادەنيەت ءۇيىنىڭ ديرەكتورى ەلميرا ايمۇحانوۆا, تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى تولەش بەكپاۋوۆ, ىشكى ىستەر ءبولىمىنىڭ باسشىسى سەرىك ۇسەنوۆتەر تۇگەلىمەن مىندەتىن اتقارىپ جۇرگەندەرى ايتىلدى.
سويتسەك, قىزىق بولعاندا, ءالى كۇنگە دەيىن ەرتىس اۋدانىندا «مىندەتىن اتقارىپ جۇرگەندەر» قاتارى كوبەيمەسە, ازايماپتى دا. ال, ءبىز بارعاندا ەل گازەتىنەن حابارى جوق, ءبىر-ەكى اۋىز قازاق تىلىندە ازەر سويلەپ تۇرعان اۋدان اكىمىنىڭ ورىنباسارى قىزمەتىن اتقارىپ جۇرگەن ديدار قاليجانوۆا ءسىڭلىمىز ايتەۋىر, مىندەتىن اتقارىپ جۇرگەن كۇيى ورنىنان كەتىپتى. سوندا اۋدان اكىمى نىعمان پىشەنباەۆ ەشقانداي تاجىريبەسى جوق جاپ-جاس قىزدى اۋدان اكىمىنىڭ الەۋمەتتىك سالالار جونىندەگى ورىنباسارى ەتىپ قالاي تاعايىنداماق بولدى ەكەن؟ ەندى ديدار ءسىڭلىمىزدىڭ ورنىنا اكىمنىڭ ورىنباسارى مىندەتىن اتقارۋعا اكىمنىڭ كەڭەسشىسى قىزمەتىن اتقارعان نۇرجان قاليەۆ كەلىپتى. وعان قوسا قۇرىلىس, ساۋلەت ءبولىمىنىڭ باسشىسى لاۋازىمىنىڭ مىندەتىن اتقارۋشى, جەر قاتىناستارى ءبولىمىنىڭ باستىعى دا ورنىنان كەتىپ, ول ورىندارعا دا مىندەتىن اتقارۋشىلار كەلسە كەرەك. ەرتىس اۋىلىنداعى №2 قازاق مەكتەبىنىڭ ديرەكتورى زەينەتكەرلىككە كەتكەن سوڭ, ديرەكتوردىڭ مىندەتىن مارجان كوشەرباەۆا اتقارىپ ءجۇر. ەندى نە ىستەۋ كەرەك؟ جۇمىس باستان اسادى. ەلباسى جولداۋىنداعى مىندەتتەردى كىم ورىندايدى؟ ماماندار اكىمگە جاعۋ, ۇناۋ ءۇشىن ەمەس, ەل ءۇشىن ەڭبەك ەتەدى. اۋداندا ءبىلىمدى, بىلىكتى ماماندار جوق دەپ وسىلاي وتىرا بەرەمىز بە؟ وندا پاتەرلەرىن, جەڭىلدىكتەرىن بەرىپ, جاس مامانداردى شاقىرايىق. قولدا باردىڭ قادىرىن بىلگەن دۇرىس. مىندەتىن اتقارىپ جۇرگەن مامانداردىڭ ءبارى دە تۋعان اۋىلدارى مەن اۋداندا قىزمەت جاساعىسى كەلىپ, وقۋ بىتىرگەن سوڭ, اۋىلدارىنا ورالعاندارىن دا ەسكەرەيىك.
وبلىسقا جاڭادان كەلگەن باسشى قانات بوزىمباەۆ قازىر اۋدان, اۋىلداردى ارالاپ, ەل ىشىمەن تانىسىپ ءجۇر. ال, ەرتىس اۋدانىندا سۋ, جول ماسەلەسى وتە قيىن. پوشتا بولىمشەلەرى جابىلۋدا. تۇرعىندار بولسا, جۇيەلى, ناقتى جۇمىستى كۇتىپ وتىر. سوندىقتان ءالى كۇنگە دەيىن ايلاپ مىندەتىن اتقارىپ جۇرگەن ءبولىم باسشىلارىن ەرتىس اۋدانىنا بارعان ساپارى كەزىندە وبلىس اكىمى قانات بوزىمباەۆتىڭ ءوزى تاعايىنداپ كەتپەسە, باسشىنىڭ مىندەتىن اتقارۋشىلاردىڭ ازايار ءتۇرى كورىنبەيتىندەي.
فاريدا بىقاي,
«ەگەمەن قازاقستان».
پاۆلودار وبلىسى,
ەرتىس اۋدانى.