بۋرابايداعى “جاسىل ورمان” شيپاجايى ونەگەلى ىستەرىمەن جۇرتشىلىق نازارىن اۋدارىپ كەلەدى. ماسەلەن, 80 ادامدىق ۇجىم ءوزىنىڭ بيىلعى قىزمەتىنىڭ باستى باعىتى ۇلى جەڭىستىڭ 65 جىلدىعىنا ارنالعاندىعىن ايشىقتى كورسەتە بىلۋدە.
– بىز كوكتەمگى-جازعى ماۋسىمدا سولتۇستىك قازاقستان وبلىسىنىڭ 400 تۇرعىنىنا قىزمەت كورسەتۋدى مىندەتىمىزگە العانبىز, –دەيدى شيپاجاي ديرەكتورى دۇيسەنبەك امانجولوۆ. – جۋىردا العاشقى 40 قوناعىمىز قونىستاندى. ولاردىڭ بارلىعى سوعىس جانە ەڭبەك ارداگەرلەرى. دايىندىق جۇمىستارىن ەرتە باستاپ, بارلىق قولايلى جاعدايلارمەن قامتاماسىز ەتۋگە تىرىستىق, ءتىپتى جيىرما جىلدان بەرى جۇمىس ىستەمەي تۇرعان ءليفتتى دە قوزعالىسقا قوستىق. ارداگەرلەرىمىز ەم-دومنىڭ 40 جانە تۋريستىك مارشرۋتتاردىڭ 19 ءتۇرىن پايدالانا الادى.
كەزەكتى ءىسساپار بارىسىندا “جاسىل ورمانعا” ءبىزدىڭ دە جولىمىز تۇسكەن. بۇل كۇنى جەڭىستىڭ 65 جىلدىعىنا ارنالعان ەركىن كۇرەستەن ايماقتىق جارىس قىزىپ جاتىر ەكەن. وعان اقمولا, سولتۇستىك قازاقستان وبلىستارى مەن استانا قالاسىنىڭ 170 بالعىن سپورتشىسى قاتىسىپ, بەس سالماق دارەجەسىندە باق سىناستى. جارىستىڭ باس تورەشىسى بولات ءابدىلدين ءبىرىنشى رەت وتكىزىلىپ وتىرعان سايىستا سولتۇستىك قازاقستان وبلىسىنىڭ ءۋاليحانوۆ جانە تايىنشا اۋداندارىنىڭ, اقمولا وبلىسىنىڭ ەسىل جانە استراحان اۋداندارىنىڭ وكىلدەرى ەرەكشە كوزگە تۇسكەنىن ايتتى.
ال, تانىمال باپكەرلەردىڭ ءبىرى كسرو چەمپيونى بەكىم جاپاروۆ ەكى كۇنگە سوزىلعان جارىستىڭ تاربيەلىك ءمانى زور ەكەندىگىن اتاپ كورسەتتى. جارىستى ۇيىمداستىرۋ شىعىنىن ءوز موينىنا العان شيپاجاي باسشىلىعى اۋىل بالالارىنا ۇمىتىلماس قۋانىش سىيلادى. ونىڭ اشىلۋىندا دەمالۋشى سوعىس جانە ەڭبەك ارداگەرلەرىنىڭ اق باتاسىن بەرۋى بالعىن سپورتشىلاردى قاناتتاندىرعانى انىق. ۇزدىك بالۋاندارعا شيپاجايدىڭ ارنايى توسبەلگىلەرى تاپسىرىلىپ, سىي-سياپاتتار ۇلەستىرىلدى.
باقبەرگەن امالبەك, اقمولا وبلىسى.