الماتىنىڭ المالى اۋدانىنداعى بىرقاتار عيماراتتار ءبىر كۇنگە سۋىق سۋدان اجىراتىلادى, دەپ حابارلايدى Egemen.kz.
27 تامىز كۇنى ساعات 9:00-دەن 20:00-گە دەيىن المالى اۋدانىنىڭ ءشارىپوۆ-قاراساي باتىر - بايزاقوۆ-تولە بي كوشەلەرىنىڭ قيىلىسىندا ورنالاسقان تۇرعىن ۇيلەر مەن باسقا دا عيماراتتارعا سۋىق سۋ بەرۋ توقتاتىلادى.
«سۋىق سۋمەن جابدىقتاۋ قىزمەتتەرىنە ەنگىزىلەتىن شەكتەۋلەر ماگيسترالدىق جەلىلەرگە جاڭا سۋ قۇبىرىن قوسۋ ءۇشىن قاجەت», دەپ ءتۇسىندىردى «الماتى سۋ» مكك ءباسپاسوز قىزمەتى.
سۋدان اجىراتۋ ۋاقىتىندا دەنساۋلىق ساقتاۋ, ءبىلىم بەرۋ وبەكتىلەرىنە جانە الەۋمەتتىك سالانىڭ وزگە دە عيماراتتارىنا اۆتوتسيستەرنالارمەن سۋ جەتكىزۋ ۇيىمداستىرىلاتىن بولادى.