قازىرگى كەزدە اۋىل ايەلدەرىن قولداۋ باعدارلاماسى اياسىندا قازاقستاندا 81 ايەل ءوز ءىسىن دامىتىپ وتىر. رەسپۋبليكالىق كوميسسيانىڭ شەشىمىمەن ولارعا گرانت بەرىلدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قازاقستاننىڭ اۋىل ايەلدەرى فورۋمىن ۇيىمداستىرۋ كوميتەتىنىڭ ءتورايىمى مايرا ايسينا مالىمدەدى, دەپ حابارلايدى Egemen.kz وكق-عا سىلتەمە جاساپ.
ونىڭ ايتۋىنشا, ۇمىتكەرلەر ءوتىنىم بەرگەن سوڭ, كوميسسيا مۇشەلەرى ساراپتاما جاساپ, شەشىم شىعارادى.
«جىل سايىن 3 مىڭعا جۋىق ايەل وتىنىشتەرىن بەرەدى, ءبىز ولارعا بيزنەس جوبالاردى جازۋعا كومەكتەسەمىز, ال گرانت العاننان كەيىن سۇيەمەلدەپ وتىرامىز. قازىر 81 ايەل جۇمىس ىستەپ جاتىر, ولار 200-گە جۋىق جاڭا جۇمىس ورنىن اشتى. ءبىز ولارمەن ۇدايى بايلانىستا بولىپ, جۇمىستارىن ودان ارى جالعاستىرۋعا كومەكتەسەمىز. كۇندەلىكتى حابارلاسىپ وتىرامىز», دەدى م.ايسينا.