قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ وقىتۋشى-پروفەسسورلارى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ رەكتورى, پروفەسسور قازىباي قارا ۇلى بوزىموۆ باستاعان دەلەگاتسياسىمەن كەزدەستى. بۇل تۋرالى قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ءباسپاسوز حاتشىسى اقەركە جولماحانوۆا حابارلادى.
قوناقتار الدىمەن ۋنيۆەرسيتەتتىڭ «ەلباسى جانە تاۋەلسىز قازاقستان» وقۋ-كورمە زالىندا بولىپ, تاۋەلسىزدىك جىلدارى ەلىمىزدىڭ قول جەتكىزگەن تابىستارىن بەينەلەيتىن قۇجاتتارمەن تانىستى. دەلەگاتسيا مۇشەلەرى وركەنيەتتەر ورداسى بولعان سىر وڭىرىندەگى ارحەولوگيالىق جانە تاريحي-مادەني قۇندى ەسكەركىشتەردەن سىر شەرتەتىن «ارحەولوگيا جانە ەتنوگرافيا» عىلىمي-زەرتتەۋ ورتالىعىنىڭ كورمە زالىن دا ارالاپ كوردى. وسى رەتتە, ارحەولوگيالىق قازبا جۇمىستارى ناتيجەسىندە تابىلعان جادىگەرلەرگە قوناقتاردىڭ ەرەكشە نازار اۋدارعانىن اتاپ وتكەن ءجون.
قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ رەكتورى, پروفەسسور قىلىشباي بيسەنوۆ ءماجىلىس زالىندا وتكىزىلگەن جيىندا ءبىلىم ورداسىنىڭ بۇگىنگى كۇنى اتقارىپ وتىرعان جۇمىستارى مەن مەملەكەت باسشىسى نۇرسۇلتان نازارباەۆتىڭ جاقىندا قازاقستان حالقىنا ارناعان جولداۋىنان تۋىنداعان مىندەتتەرگە كەڭىنەن توقتالىپ ءوتتى. ال ءوز كەزەگىندە ءسوز العان باتىس قازاقستان اگرارلىق-تەحنيكالىق ۋنيۆەرسيتەتىنىڭ رەكتورى ق. بوزىموۆ ەكى ۋنيۆەرسيتەت اراسىنداعى ارىپتەستىك قارىم-قاتىناستى جوعارى باعالادى. ۋنيۆەرسيتەت باسشىلارى ودان ءارى ءوزارا ارىپتەستىك-ىنتىماقتاستىق جونىندەگى مەموراندۋمعا قول قويدى. بۇگىنگى تاڭدا ەكى وقۋ ورنى اگرارلىق سالادا PhD دوكتورلارىن بىرلەسىپ دايىنداۋدا. وسىنداي يگى باستاما بىلىكتى كادرلار دايارلاۋعا, ۋنيۆەرسيتەتتەر اراسىنداعى وزىق تاجىريبەنى بولىسۋگە نەگىز قالايتىنى انىق.
ءامىرحان الماعانبەتوۆ.
دەرەككوز: قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ءباسپاسوز قىزمەتى.
فوتو: اقەركە جولماحانوۆا.