بيىلدان باستاپ قازاقستاننىڭ كاسىپقوي فۋتبول ليگاسىنىڭ باستاماسىمەن ۇيىمداستىرىلعان جاڭا فورماتتاعى فۋتبولدان قازاقستان كۋبوگى جارىسىنىڭ توپتىق كەزەڭدەگى ويىندارى اياقتالدى. ءبىر جارىم ايعا سوزىلعان باسەكەدە ءار توپتا ۇزدىك اتانعان ەكى كوماندا شيرەك فينالعا جولداما الدى.
قازاقستان كۋبوگى جولىنداعى جارىستى ۇيىمداستىرۋشىلار بيىلعى ءتۋرنيردى بارىنشا تارتىستى ءارى قىزىقتى وتكىزۋ ءۇشىن الدىمەن ءبىرىنشى جانە ەكىنشى ليگا كوماندالارى اراسىندا ءۇش كەزەڭنەن تۇراتىن ىرىكتەۋ ويىندارىن وتكىزىپ, ىرىكتەۋدەن ىركىلمەي وتكەن ەڭ ۇزدىك ەكى كلۋبقا پرەمەر-ليگا كوماندالارىمەن بىرگە توپتىق كەزەڭدە ويناۋعا مۇمكىندىك بەردى. ال بۇعان دەيىنگى ەرەجە بويىنشا كۋبوك ويىندارىندا ءبىرىنشى ليگا مەن پرەمەر-ليگا كوماندالارى جەرەبە ارقىلى ءبىر-بىرىمەن كەزدەسىپ, جەڭىسكە جەتكەن كوماندا 1/16, 1/8 سياقتى كەلەسى كەزەڭدەرگە وتەتىن ەدى.
ءسويتىپ جاڭا فورماتتاعى قازاقستان كۋبوگىنىڭ ءبىرىنشى جانە ەكىنشى كەزەڭىنە ءبىرىنشى جانە ەكىنشى ليگادان بارلىعى 14 فۋتبول كلۋبى قاتىستى. ولاردىڭ 12-ءسى جەرەبە بويىنشا ءوزارا جۇپ قۇراپ, ءبىرىنشى كەزەڭدە ويناسا, قالعان ەكى كوماندا ەكىنشى كەزەڭنەن باستاپ سىنعا ءتۇستى. العاشقى ەكى ىرىكتەۋ ويىندارىنا «يگiلiك», «وقجەتپەس», «اقسۋ», «قىران», «وڭتۇستىك اكادەمياسى», «ماقتاارال», «ەكىباستۇز», «التاي», «SD Family», «رۋزاەۆكا», «جاس قىران», «ياسسى-تۇركiستان», «جەڭىس» جانە سديۋسشور № 8 (نۇر-سۇلتان ق.) كوماندالارى قاتىستى.
باستاپقى ەكى كەزەڭنىڭ قورىتىندىسى بويىنشا, ءتۋرنيردىڭ سوڭعى ىرىكتەۋ كەزەڭىنە ەلوردانىڭ سديۋسشور №8, شىمكەنتتىڭ «وڭتۇستىك اكادەمياسى», ەكىباستۇزدىڭ «اقسۋ» جانە تۇركىستان وبلىسىنىڭ «ماقتاارال» كوماندالارى ءوتتى. ءۇشىنشى كەزەڭنىڭ جەرەبەسى بويىنشا توپتىق كەزەڭگە شىعۋ ءۇشىن سديۋسشور №8 مەن «وڭتۇستىك اكادەمياسى» جانە «ماقتاارال» مەن «اقسۋ» كوماندالارى كەزدەستى. ءبىر ويىننان تۇراتىن باسەكەدە جەڭىسكە جەتكەن سديۋسشور №8 جانە «ماقتاارال» كلۋبتارى پرەمەر-ليگا كوماندالارىمەن ويناۋعا مۇمكىندىك الدى.
ال ءبىر جارىم ايعا جالعاسقان توپتىق كەزەڭدە پرەمەر-ليگانىڭ 14 جانە ىرىكتەۋ كەزەڭىنەن وتكەن ءبىرىنشى جانە ەكىنشى ليگانىڭ 2 كومانداسى ءتورت توپقا ءبولىنىپ, ءوزارا شيرەك فينال جولداماسىن ساراپقا سالدى. ءسويتىپ ءوز توبىنان دارالانىپ شىققان قاراعاندىنىڭ «شاحتەر», پەتروپاۆلدىڭ «قىزىلجار», قوستانايدىڭ «توبىل», تارازدىڭ «تاراز», ەلوردانىڭ «استانا», قىزىلوردانىڭ «قايسار», اقتاۋدىڭ «كاسپي» جانە الماتىنىڭ «قايرات» كلۋبتارى جارىستى ودان ءارى جالعاستىرۋعا مۇمكىندىك الدى.
وسىدان بىرەر كۇن بۇرىن 1/4 فينالدىڭ جەرەبەسى تارتىلىپ, جارتىلاي فينالدىڭ جولداماسىن ساراپقا سالاتىن ءتورت جۇپ انىقتالدى. جەرەبە بويىنشا, «تاراز» – «شاحتەر», «قايرات» – «قايسار», «استانا» – «كاسپي», «قىزىلجار» – «توبىل» كلۋبتارى ءوزارا سىنعا تۇسەدى. شيرەك فينالدىڭ ءبىرىنشى ويىندارى 21 جانە 22 تامىز كۇندەرىنە بەلگىلەنسە, قارىمتا كەزدەسۋلەر 22 قىركۇيەككە جوسپارلانعان. جارىستىڭ 1/4 جانە 1/2 فينالدىق ساتىلارىندا كوماندالار ەكى ويىننان وتكىزەدى. فينال 28 قاراشاعا بەلگىلەنگەن.
قازاقستان فۋتبول فەدەراتسياسىنىڭ حابارلاۋىنشا, شيرەك فينالدىڭ ءبىرىنشى ويىنى جۋىردا عانا ومىردەن وزعان تانىمال سپورت ءجۋرناليسى امانگەلدى سەيىتحانوۆتى ەسكە الۋمەن باستالادى. «قازاقستان كاسىپقوي فۋتبول ليگاسى وسىنداي شەشىمگە كەلدى. شيرەك فينالدىڭ 4 ويىنى دا ءبىر مينۋتتىق ۇنسىزدىكتەن باستالادى», دەلىنگەن فەدەراتسيانىڭ حابارلاماسىندا.
سونىمەن قاتار قازاقستان كاسىپقوي فۋتبول ليگاسى (قكفل) كۋبوك ويىندارىنىڭ الدىندا شىلدە ايىنداعى OLIMPBET-قازاقستان چەمپيوناتى مەن OLIMPBET-قازاقستان كۋبوگىنىڭ ۇزدىك ويىنشىسىن انىقتادى. ۇزدىكتەردى انىقتاۋ بارىسىندا ساۋالداماعا قاتىسۋشى باپكەرلەر مەن كوماندا كاپيتاندارى ءۇش ويىنشىدان تۇراتىن ءتىزىمىن اتادى. العان ورىنعا بايلانىستى ويىنشىلارعا ۇپاي بەرىلدى: 1-ورىن ءۇشىن – 3 ۇپاي, 2-ورىن ءۇشىن – 2 ۇپاي, 3-ءۇشىنشى ورىن ءۇشىن – 1 ۇپاي. بارلىق ۇپايلاردى قوسۋ ارقىلى قورىتىندى شىعارىلدى.
ساۋالداما ناتيجەسىندە وتكەن ايدىڭ ۇزدىك ويىنشىسى دەپ «شاحتەر» كلۋبىنىڭ تاجىريبەلى شابۋىلشىسى ايدوس تاتتىباەۆ تانىلدى. ول 21 ۇپايعا يە بولدى. اتالعان تىزىمدە ەكىنشى ورىنعا ەلوردالىق «استانا» كلۋبىنىڭ كوشباسشىسى مارين توماسوۆ ورنالاستى. ول تاتتىباەۆتان ءبىر ۇپاي كەم جينادى. ءۇشىنشى ورىن «قايرات» كومانداسىنىڭ شابۋىلشىسى ارتۋر شۋشەناچەۆكە بۇيىردى. ول 12 ۇپايعا قول جەتكىزدى.
جۇلدەنى جەڭىمپازعا OLIMPBET-فۋتبولدان قازاقستان كۋبوگىنىڭ 5-تۋرىنداعى «شاحتەر» – «ورداباسى» ويىنىنىڭ الدىندا قكفل اتقارۋشى ديرەكتورى قۋانىش باقىتبەكوۆ تاپسىردى.