مەملەكەت باسشىسىنىڭ قازاقستان حالقىنا ارناعان جولداۋىنان كەيىن باس پروكۋراتۋرانىڭ كەڭەيتىلگەن القا ءماجىلىسى بولدى.
مەملەكەت باسشىسىنىڭ قازاقستان حالقىنا ارناعان جولداۋىنان كەيىن باس پروكۋراتۋرانىڭ كەڭەيتىلگەن القا ءماجىلىسى بولدى.
القا جۇمىسىنا پرەزيدەنت كومەكشىسى – قاۋىپسىزدىك كەڭەسىنىڭ حاتشىسى قايرات قوجامجاروۆ, پرەزيدەنت اكىمشىلىگىنىڭ جاۋاپتى قىزمەتكەرلەرى, باس پروكۋراتۋرا ورتالىق اپپاراتىنىڭ, قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ, باس اسكەري جانە باس كولىك پروكۋراتۋرالارىنىڭ قىزمەتكەرلەرى, وبلىستىق جانە ولارعا تەڭەستىرىلگەن پروكۋرورلار, بەينەكونفەرەنتسيالىق بايلانىس رەجىمىندە وبلىستىق, قالالىق جانە اۋداندىق دەڭگەيدەگى پروكۋراتۋرالار قىزمەتكەرلەرى قاتىستى.
القادا باس پروكۋرور مەملەكەتتىك اپپارات پەن قۇقىق قورعاۋ ورگاندارىنىڭ الدىنا پرەزيدەنت نۇرسۇلتان نازارباەۆ قويعان ستراتەگيالىق ءمىندەتتەردى جەتكىزدى. اسحات داۋىلباەۆ بارلىق جەكە قۇرامعا باعدارلامالىق قۇجاتتىڭ ەرەجەلەرىن مۇقيات زەردەلەۋدى, جولداۋدا كورسەتىلگەن تاپسىرمالاردى جۇزەگە اسىرۋ ءجونىندەگى ءىس-شارالار جوسپارىن ءازىرلەۋ بويىنشا جۇمىس توبىن قۇرۋدى تاپسىردى. سونداي-اق, جينالىستا پروكۋراتۋرا ورگاندارىنىڭ وتكەن جىلعى جۇمىس قورىتىندىلارى تالقىلاندى, پرەزيدەنت بەرگەن تاپسىرمالاردى ەسكەرە وتىرىپ, قىزمەتتىڭ الداعى كەزەڭگە ارنالعان نەگىزگى باعىتتارى ايقىندالدى.
بۇدان كەيىن ءسوز سويلەگەن قاۋىپسىزدىك كەڭەسىنىڭ حاتشىسى قايرات قوجامجاروۆ, قۇقىق قورعاۋ ورگاندارىنىڭ ءتيىمدىلىگىن, زاڭدىلىق پەن قۇقىقتىق ءتارتىپتىڭ دەڭگەيىن ودان ءارى ارتتىرۋ, شيەلەنىستى جاعدايلاردى ەسكەرتۋ جانە ەكسترەميزم مەن تەرروريزمگە توسقاۋىل قويۋدىڭ ۇتىمدى تەتىكتەرىن ازىرلەۋ جونىندەگى مەملەكەت باسشىسىنىڭ تاپسىرمالارىن ورىنداۋداعى پروكۋراتۋرانىڭ ۇيلەستىرۋشىلىك ءرولىن اتاپ كورسەتە وتىرىپ, «قازاقستان-2050» ستراتەگياسىن جۇزەگە اسىرۋداعى قاداعالاۋ ورگاندارى جۇمىسىنىڭ باسىم باعىتتارىن بەلگىلەدى. ءماجىلىس بارىسىندا زاڭدىلىقتىڭ جاي-كۇيى جانە پروكۋرورلىق قاداعالاۋدىڭ ءارتۇرلى قىرلارى ەگجەي-تەگجەيلى تالقىلانىپ, شەشىمىن تابۋى ءتيىس پروبلەمالىق ماسەلەلەر كوتەرىلدى, الداعى كەزەڭگە ارنالعان باسىم باعىتتار ايقىندالدى.
«قازاقستان-2050» ستراتەگياسىن, سونداي-اق, پرەزيدەنتتىڭ 2013 جىلعى قاڭتاردا قۇقىق قورعاۋ ورگاندارىمەن وتكىزگەن جينالىستا بەرگەن تاپسىرمالارىن جۇزەگە اسىرۋ پروكۋراتۋرا ورگاندارى قىزمەتىنىڭ نەگىزگى وزەگىنە اينالدى. ماقساتقا باعىتتالعان جۇمىستاردىڭ ناتيجەسىندە بەرىلگەن تاپسىرمالاردىڭ تولىقتاي جانە بەلگىلەنگەن مەرزىمىندە ورىندالۋىنا قول جەتكىزىلدى. قۇقىق قورعاۋ قىزمەتىن جەتىلدىرۋدىڭ ماڭىزدى باعىتتارى بويىنشا جەمىستى زاڭنامالىق جۇمىس جىلدىڭ باستى قورىتىندىلارىنىڭ ءبىرى بولدى. جاڭا قىلمىستىق جانە قىلمىستىق ءىس جۇرگىزۋ كودەكستەرى پارلامەنت قاراۋىنا ەنگىزىلدى. قۇقىق قورعاۋ جۇيەسىن ودان ءارى جاڭعىرتۋدىڭ, ءدىني ەكسترەميزم مەن تەرروريزمگە قارسى ءىس-قيمىلدىڭ مەملەكەتتىك باعدارلامالارى, قۇقىق قورعاۋ ورگاندارىنىڭ كادر ساياساتى تۇجىرىمداماسى, قۇقىق قورعاۋ جانە ارنايى مەملەكەتتىك ورگاندار باسشىلارىنىڭ پرەزيدەنتتىك رەزەرۆىن قالىپتاستىرۋ ەرەجەسى دايىندالدى جانە ولاردى ەلباسى بەكىتتى. وزگە دە وزەكتى قۇقىقتىق اكتىلەر بويىنشا جۇمىس جالعاسۋدا.
قاداعالاۋ قىزمەتىنىڭ اياسىندا پروكۋرورلاردىڭ باستى كۇش-جىگەرى حالىقتىڭ الەۋمەتتىك ءالسىز جىكتەرىنىڭ, كاسىپكەرلەردىڭ جانە مەملەكەتتىڭ زاڭدى قۇقىقتارى مەن مۇددەلەرىن قورعاۋ پروبلەمالارىنا باعىتتالدى. سىبايلاس جەمقورلىق جانە ەكسترەميزم كورىنىستەرىنە قارسى تۇرۋ بويىنشا اۋقىمدى جۇمىستار جۇرگىزىلگەن. 450 مىڭنان استام زاڭدىلىقتىڭ بۇزىلۋى انىقتالىپ, 32 مىڭنان استام زاڭسىز قۇقىقتىق اكتىلەردىڭ كۇشى جويىلدى. 735 قىلمىستىق ءىس قوزعالدى. 670 مىڭ ازاماتتىڭ قۇقىقتارى قالپىنا كەلتىرىلدى, ولاردىڭ اراسىندا 155 مىڭ كامەلەتكە جاسى تولماعاندار, 14,5 مىڭ مۇگەدەكتەر مەن قارتتار ۇيلەرىندەگى ادامدار بار. ازاماتتاردىڭ قۇقىقتارىن بۇزعاندارى ءۇشىن 11 مىڭعا جۋىق لاۋازىمدى تۇلعا جانە پروكۋرورلىق قاداعالاۋ اكتىلەرى بويىنشا بارلىعى 60 مىڭنان استام قۇقىق بۇزۋشىلار ءارتۇرلى جاۋاپكەرشىلىككە تارتىلدى.
راديكالدىق ءدىني يدەولوگيانى تاراتۋدىڭ جولىنا توسقاۋىل قويۋعا باعىتتالعان جۇمىس جۇرگىزۋدىڭ ناتيجەسىندە سوتتاردىڭ شەشىمىمەن تەرروريزم جانە ەكسترەميزم يدەيالارىن ناسيحاتتاۋشى 596 دەسترۋكتيۆتى ينتەرنەت-رەسۋرسقا كىرۋ توقتاتىلدى. كەزەكشى پروكۋرورلار ينستيتۋتىنىڭ جەمىستى قىزمەت ەتۋى ناتيجەسىندە ىشكى ىستەر ورگاندارىنىڭ قىزمەتتىك بولمەلەرىنەن زاڭسىز ۇستالىپ وتىرعان 2 مىڭعا جۋىق ازامات بوساتىلدى. نەگىزسىز جۇرگىزىلىپ كەلگەن 672 جەدەل-ىزدەستىرۋ ءىس-شارالارى توقتاتىلدى. پروكۋرورلاردىڭ نارازىلىعى بويىنشا 1432 تۇلعاعا قاتىستى 1142 سوت اكتىلەرى زاڭعا سايكەس كەلتىرىلدى.
قىلمىستىق قۋدالاۋ ورگاندارىنىڭ 2,5 مىڭنان استام لاۋازىمدى تۇلعالارى ەسەپكە الۋ-تىركەۋ ءتارتىبىن بۇزۋ جانە قىلمىستى جاسىرۋ فاكتىلەرى ءۇشىن جاۋاپكەرشىلىككە تارتىلدى.
پروكۋرورلاردىڭ ارالاسۋىنان كەيىن مەملەكەتتىڭ كىرىسىنە 8 ميللياردقا جۋىق تەڭگەنى, ازاماتتار مەن زاڭدى تۇلعالاردىڭ پايداسىنا 14 ميلليارد تەڭگەنى ءوندىرۋ تۋرالى سوت اكتىلەرى ورىندالدى.
القا جۇمىسىنىڭ قورىتىندىسى بويىنشا باس پروكۋرور وڭىرلىك پروكۋرورلارعا قاداعالاۋ قىزمەتىنىڭ تيىمدىلىگىن ودان ءارى ارتتىرۋ, ەل پرەزيدەنتىنىڭ جولداۋىنداعى تاپسىرمالاردى جۇزەگە اسىرۋ بويىنشا ناقتى مىندەتتەر قويدى.
الەكساندر تاسبولاتوۆ,
«ەگەمەن قازاقستان».