كەشە ورتالىق كوممۋنيكاتسيالار قىزمەتىنىڭ مىنبەرىندە «قازاقستان-2050» جالپىۇلتتىق قوزعالىسىنىڭ ءبىر توپ مۇشەلەرى پرەزيدەنت ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنا سايكەس وزدەرىنىڭ ويلارىن ايتىپ, جۋرناليستەرگە بريفينگ بەردى.
كەشە ورتالىق كوممۋنيكاتسيالار قىزمەتىنىڭ مىنبەرىندە «قازاقستان-2050» جالپىۇلتتىق قوزعالىسىنىڭ ءبىر توپ مۇشەلەرى پرەزيدەنت ن.نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنا سايكەس وزدەرىنىڭ ويلارىن ايتىپ, جۋرناليستەرگە بريفينگ بەردى.
كەزدەسۋدى قوزعالىس ءتوراعاسى دانات جۋمين اشىپ, ءجۇرگىزىپ وتىردى. الدىمەن ول قوزعالىستىڭ وتكەن جىلدىڭ 6 جەلتوقسانىندا دۇنيەگە كەلگەنىن ايتىپ ءوتتى. ونىڭ ماقساتى ەلباسىنىڭ «قازاقستان-2050» ستراتەگياسىن ىسكە اسىرۋ جولىندا جاستاردىڭ كۇشى مەن ءبىلىمىن بىرىكتىرۋگە باعىتتالعان. وعان تۇرتكى بولعان پرەزيدەنتتىڭ «بولاشاق» ستيپەندياسىنىڭ 20 جىلدىعىنا ارنالعان فورۋمدا ايتقان ءسوزى ەكەن. سونىمەن بىرگە, بۇل قوزعالىسقا «بولاشاق» ستيپەندياسى ارقىلى وقىماعان جاستاردى دا تارتتىق. ءبىزدىڭ قوزعالىسىمىز قاتارداعى قوعامدىق ەمەس, جۇيەلى تۇردە قۇرىلعان ۇيىم, دەدى ول.
ودان ءارى د.جۋمين قوزعالىستىڭ بۇگىنگى كۇنگە دەيىن اتقارىپ جاتقان جۇمىستارى تۋرالى ايتتى. ءبىزدىڭ ەڭ باستى جۇمىسىمىز پرەزيدەنتتىڭ ستراتەگياسىن حالىققا ءتۇسىندىرۋ, ونىڭ اسا زور ماقساتىن اشىپ كورسەتۋ بولىپ تابىلادى. ونى ىسكە اسىرۋعا ءاربىر ازاماتتىڭ قاتىسۋىنىڭ ماڭىزدى ەكەنىن حالىققا جەتكىزۋگە تىرىسۋدامىز. بۇل قۇجات ءبىزدىڭ بولاشاق ۇرپاعىمىزدىڭ جارقىن ءومىر سۇرۋىنە قاجەتتى باعدارشام ەكەنىن ءاربىر قازاقستاندىققا ۇعىندىرىپ, ونىڭ قانشالىقتى تەرەڭدىكتى قامتيتىنىن جەتكىزەمىز. ءوزىنىڭ جانە ۇرپاعىنىڭ بولاشاعىن قازاقستانمەن بايلانىستىرعىسى كەلەتىن ءاربىر ازامات ءۇشىن بۇل ستراتەگيانىڭ ورىندالۋى وتە ماڭىزدى. ءبىز سونى حالىققا ۇعىندىرۋ جولىندا ەڭبەك ەتىپ كەلەمىز, دەدى شەشەن.
ەكىنشى بولىپ ءسوزدى جاس بيزنەسمەن, قوزعالىس بەلسەندىسى مۇحتار مانكەەۆ الدى. ول دا قوزعالىستىڭ ماقساتىنا توقتالدى. ءبىزدىڭ ماقساتىمىز ەلباسى ن.نازارباەۆتىڭ «قازاقستان-2050» ستراتەگياسىن قولداۋ ارقىلى ەلىمىزدى دامىعان 30 ەلدىڭ قاتارىنا ەنگىزۋگە اتسالىسۋ بولىپ تابىلادى. ءبىزدىڭ بارلىق قىزمەتىمىز وسى ىسكە جۇمىلدىرىلعان دەي كەلىپ, ول 2014 جىلعى ناقتى جۇمىستار تۋرالى ايتتى.
ءسوز كەزەگى وزىنە تيگەندە بەلگىلى بالالار كارديوحيرۋرگى دميتري گوربۋنوۆ جولداۋدىڭ دەنساۋلىق ساقتاۋ سالاسى تۋرالى ايتىلعان باعىتتارىنا توقتالىپ, وندا كوتەرىلگەن ماسەلەلەردىڭ ءوزىنىڭ كوڭىلىن كونشىتكەنىن اتاپ ءوتتى. ماسەلەن, پرەزيدەنتتىڭ قازاقستاندا مەديتسينالىق ءتۋريزمنىڭ بەلسەندى ءتۇردە دامىعانىن قالايتىنى وتە ورىندى ەكەنىن جەتكىزدى. بۇل ءبىزدىڭ مەديتسينامىزدىڭ كورشى ەلدەرگە قاراعاندا, جوعارى دەڭگەيگە كوتەرىلۋىنە مۇمكىندىك بەرىپ, سول ەلدەر ازاماتتارىنىڭ قازاقستاندا ەمدەلىپ, وسىندا وتا جاساتۋعا تىرىسۋشىلىعىن ارتتىرار ەدى, دەدى شەشەن.
ودان ءارى د.گوربۋنوۆ وزدەرىنىڭ كلينيكالارىنداعى جۇمىستارعا توقتالىپ, وعان جاقىن شەتەلدەردەن دە پاتسيەنتتەردىڭ كوپتەپ كەلە باستاعانىن تىلگە تيەك ەتتى. ءسوزىنىڭ قورىتىندىسىندا پرەزيدەنتتىڭ قازاقستاندىقتاردىڭ ورتاشا جاسى 80-گە جەتۋى جولىندا قىزمەت ەتۋ كەرەكتىگى تۋرالى ايتقانى وتە ورىندى ەكەنىن اتاپ ءوتتى.
«قازاقستان-2050» جالپىۇلتتىق قوزعالىسىنىڭ ءبىر بەلسەندىسى ۇلتتىق بيوتەحنولوگيا ورتالىعىنىڭ قىزمەتكەرى, جاس عالىم, گەنەتيك ايشا ىسقاقوۆا ەكەن. ءسوز كەزەگى وزىنە تيگەندە ول جولداۋدا عىلىمعا وتە كوپ كوڭىل بولگەنىنە ءتانتى بولعانىن جەتكىزدى. عىلىم سالاسىنداعى ىزدەنىستەردى قارجىلاندىرۋ كولەمى ءىجو-ءنىڭ 3 پايىزى كولەمىنە جەتكەلى وتىرعانى عىلىم جولىنداعى جاستاردىڭ بەلسەندىلىگىن ارتتىرا ءتۇسەرى ءسوزسىز. عىلىمي جولمەن داميتىن ەكونوميكاعا تەك وسىنداي قامقورلىقپەن عانا قول جەتكىزۋگە بولادى. سونىڭ ىشىندە اگروونەركاسىپتىك كەشەننىڭ دامۋىنا دا عىلىمي جەتىستىكتەردى پايدالانۋدىڭ ماڭىزدىلىعى تۋرالى كوپتەگەن ويلار جاسالدى. ەندى جولداۋداعى وسى تالاپتاردىڭ ءبارى دە ىسكە اسىرىلادى دەگەن ۇمىتتەمىز, دەدى جاس عالىم.
بريفينگتىڭ سوڭىندا جينالعاندار جۋرناليستەردىڭ كوپتەگەن سۇراقتارىنا جاۋاپ بەردى.
جاقسىباي سامرات,
«ەگەمەن قازاقستان».